الموضوع: نصيحة عاجلة أجيب زيرو ولا مستعمل فى الحدود دى

والله يا جماعة أنا أستفدت منكم جدا جدا جدا جدا ربنا يجزيكم خير

الفورد كويسة وسقتها قبل كدة بس اللى قالقنى منها بيقولوا أن قطع غيارها أغلى ومش متوفرة قوى والميكانيكا مش بيفهموا فيها قوى وطبعا دة يعرض الواحد للنصب كتير كمان مش موفرة قوى فى البنزين

أنا من خلال البحث وكلامكم وكمان إستخدامى للعربية العائلى ومجرد مشاوير خصوصا أنى من نوعيات اللى بيسوق حد أقصى 90 وكمان نقطة تكون واسعة وشنطتها واسعة لقيت أن أفضل إختيارات متاحة بالترتيب

1_ سكودا فليشيا كومبى
2_ سكودا فليشيا
3_ كيا برايد سيدان

تمام كدة ولا أية رأيكم؟

فيات سينا احسن من كل اللى ذكرتهم دول بمراحل. والفورد قطع غيارها مش نادرة للدرجة دي.

بس الفيات سيينا يا باشا فى حدود 30 هتكون حالتها مش كويسة يعنى على الأقل من 35 إلى 40 عشان تبقى الحالة كويسة

الفورد قطع غيارها مش غاليه ومتوفرة واستهلاكها فى البنزين فوق الممتاز
بتعمل معاى 250 كيلو داخلى
وفى السفر 350 ل 400 كيلو فى الصفيحة
وشنطتها بحر والكنبة الخلفي بتتلقب
مع العلم ان اللى معاى 1600 زيتك
مشكله الفورد وتعتبر ميز فى نفس الوقت ان اللى بيفهم فيها قليل كميكانيكا ودى ميزة ان محدش هيفتى
والعفشة اى حد بيشتغل فيها والكهربا والسمكرة والدهان كله واحد

وبالنسب لاختيارتك يبقى الكومبي
هتبقى اكبر من الفليشيا العادية
واحسن من البرايد
والسينا فعلا لو حاله كويسه هتخش ف 40
والتمبرا افضل منها فى الصيانه

وفي نقطه انت مش واخد بالك منها
انت المفروض متسالش على الصيانات انت من القاهرة
والحرفين وجسر السويس والتوفيقية جمبك
امال انا اعمل ايه
انا من دمياط ولما بحتاج حاجة بنزل بورسعيد او المنصور او طنطا وسعات بنزل التوفيقية

لا.. هتلاقي سيينا فى حدود 33 الى 35 بالكتير وحالتها كويسه.. ماتنساش ان الاسعار على النت كلها اسعار مبدأيه لسه فيه فصال وقت الشرا.

المشاركة الأصلية كتبت بواسطة ahmed p880

الفورد قطع غيارها مش غاليه ومتوفرة واستهلاكها فى البنزين فوق الممتاز
بتعمل معاى 250 كيلو داخلى
وفى السفر 350 ل 400 كيلو فى الصفيحة
وشنطتها بحر والكنبة الخلفي بتتلقب
مع العلم ان اللى معاى 1600 زيتك
مشكله الفورد وتعتبر ميز فى نفس الوقت ان اللى بيفهم فيها قليل كميكانيكا ودى ميزة ان محدش هيفتى
والعفشة اى حد بيشتغل فيها والكهربا والسمكرة والدهان كله واحد

وبالنسب لاختيارتك يبقى الكومبي
هتبقى اكبر من الفليشيا العادية
واحسن من البرايد
والسينا فعلا لو حاله كويسه هتخش ف 40
والتمبرا افضل منها فى الصيانه

تمام بس أنا لاحظت أن قطع الغيار غالية فى الفورد ومش معمرة قوى
والسيينا فعلا بداية الحالة الكويسة من أول 37 أو 40 أقل من كدة حالة ضعيفة وهيتصرف عليها دة غير أنى لقيت قطع غيارها غالية مقبض باب بس 90 جنية كمان الــ 1600 بتاعتها ضيقة الميكانيكية بيكرهوا يشتغلوا فيها عشان ضيقة

المشاركة الأصلية كتبت بواسطة ahmed p880

وفي نقطه انت مش واخد بالك منها
انت المفروض متسالش على الصيانات انت من القاهرة
والحرفين وجسر السويس والتوفيقية جمبك
امال انا اعمل ايه
انا من دمياط ولما بحتاج حاجة بنزل بورسعيد او المنصور او طنطا وسعات بنزل التوفيقية

الفكرة مش فكرة ميكانيكية لكن أنا مش عايز أروحلهم كتير أصلا لأن خبرتى معدومة فى العربيات وبالتالى هاكل نصب للصبح منهم

المشاركة الأصلية كتبت بواسطة ahmender

لا.. هتلاقي سيينا فى حدود 33 الى 35 بالكتير وحالتها كويسه.. ماتنساش ان الاسعار على النت كلها اسعار مبدأيه لسه فيه فصال وقت الشرا.

أنا دورت لقيت بداية الحالة الكويسة 37 وقطع غيارها غالية

عموما أنا بإذن الله أستقريت على فليشيا كومبى أو فليشيا عادى أو برايد سيدان بالترتيب كدة

بس تنصحونى بقى أجيب من سوق السيارات ولا من معرض؟

لأن سوق السيارات عرفت أن فية نصب كتييييييييييييير وكمان عايز أعرف لما الواحد يجى يشترى ولقيت العربية كويسة مبدأيا حسب المقاييس العادية شكلها وحالتها العام والموديل وماتزيدش عن 100 ألف كيلو,,,أخدها بنزينة تترفع ويفحصوها ولا أخد معايا سمكرى وميكانيكى ولا أفحصها إزاى؟ ولو لقيت نتيجة الفحص تمام أخدها فى لحظتها وأخلص وأعلق مبلغ للتسجيل فى الشهر العقارى وشهادة البيانات ولا لا؟ لأن فى ناس قالولى بعد ما تترفع وتتفحص ماتسلمهاش للبائع لأنة ممكن يغير فيها حاجة وبعد كدة يقولك ما أنت فحصتها وكمان أنا خايف من موضوع تكون العربية ورقها مضروب أو مسروقة واللى قدامى دة مزور ورقها ولا حاجة هل بقى فى حاجة أو طريقة أو إجراءات أعرف بيها العربية دى مسروقة ولا لأ وأن اللى قدامى دة فعلا صاحبها يعنى مش بالورق وخلاص؟

خلاص اتوكل علي الله الكومبي كويسه
هتلاقيها في السوق كتير اول ما تخش علي تيدك اليمين
هتلاقي الفليشيات والكومبي بالعبيط معظمهم عارفين بعض وتجار
اسعارهم تقريبا متقاربه من 31 ل 38 علي حسب الحاله والموديل
ميغركش شكل العربيه من بره
اهم حاجه اساسيات العربيه
لو مدبهله من بره شويه مش مشكله اهم حاجه الشاسيه ميكون فيه برومه
وهو عموما معظم الموديلات دي رشه فمتسالش هي رشه ولا لا المهم متبقاش رشه حوادث تبقي رش مرمات ونظافه وبص علي العربيه من تحت

موضوع النصب فده كتير فعلا
لو رخصه منتهيه متشتريش الا لما يجدد هو
لما تخلص في البيع في ناس مبترداش تبقي فلوس

وخلي بالك في عربيات انصاص كتير في السوق