صيانة ١٨٠ الف سيفيك ٢٠٠٧ وتغير عافشة

**madooomad** · 03-11-2014 09:27 PM

بسم الله الرحمن الرحيم
السلام عليكم ورحمة الله وبركاته يا رجال هوندا...
انهارده توجهت لتوكيل هوندا التجمع الخامس عشان اعمل صيانة ال ١٨٠ الف و حبيت اشاركوا المعلومات عشان نفيد و نستفيد انا طبعا اشتريت العربية من ٦ شهور و هيه ما شاء الله صفقة رابحة بالنسبالي ك حالة عربية و موديل السيفيك ٢٠٠٧ انا اكتشفت ده بعد ما ركبت الاسترا الجديدة و السيفيك الجديدة انهاردة في التوكيل و بصراحة ماستريحتش في اي منهم زي ما انا مستريح الحمدلله في الموديل ده ... المهم عشان ماطولش عليكم لما اشتريت العربية كنت عارف انها محتاجة جلبة اصلاح لعلبة الدركسيون و جلب و قاعدة فايس و استنيت لحد معاد الصيانة اللي كان انهاردة عشان اكشف عليهم كشف نهائي وانهم محتاجين تغيير واا لا... لاني كنت بسمع صوت مش مريحني في المطبات ... المهم الحمدلله العربية كانت محتاجة مع الصيانة مساعدين اثنين قدام كاملين بالسوست و بارات و جلبة اصلاح علبة دركسيون و قاعدة فتيس بكام دول بقي قالي ٧٦٠٠ جنيه تقريبا غير ثمن الصيانة اللي هيه زيت و فلاتر بحوالي ٧٥٠ جنيه ده قبل الخصم بعد الخصم قالي كله بالصيانة ٧٠٠٠ جنيه ... انا قلتله اوك غيرهم و العربية دخلت الساعة ٩ ونص الورشة و كنت متابع الشغل من فوق المهم الناس خلصوا و عامل الصيانه طلع جرب العربية و بعد كده رجع رفعها تاني و نزلها و جاب مهندس الصيانة او مشرف الورشة وطلع جربها معاه ورجعوا رفعوها ولاقيتهم بيلفوا العجل الخلفي ب ايديهم و بعد كدة نزلوها تاني و المهندس كلمني عشان استلمها و قالي كله تمام بس انت محتاج ظبط زوايا و تغيير فردة كاوتش خلفيه و المفاجاه بليتين قدام ....بكام يا هندسة .... البليتين قدام ب ١٩٠٠ جنيه قبل الخصم و ظبط الزوايا ٣١٠ تقريبا المهم انا كنت سالته قبل الصيانه لو حبيت اغير بريكنج سيستم و اركب دشم و سكاكين و كاليبر و تيل ال ٢٠١٠ قدام قالي الفردة الواحدة هاتكلفك ٥٠٠٠ جنيه .... اخيرا قولتله خلاص هيه ضرورية ولا ممكن استني شويه قالي لو استنيت ممكن تدخل في صرة و بدل ال ١٩٠٠ يبقي ٤٠٠٠ قلتله ماشي شكرا و هابقي اكلمك قبل ما اجيلك .... دفعت الفلوس و اخدت الفاتورة ومبصتش فيها الا لما روحت و لقيت الاسعار مكتوبة بالتفصيل ... سريعا كدة لقيت مصنعيات بس بتاعة اليله دي كلها حوالي ١٧٠٠ جنيه !!!!!! و اسعار القطع ٥٣٠٠ الكلام ده بعد الخصم و اضافة الضريبة .... رائيي النهائي الناس في الصيانة كويسين جدا و عارفين شغلهم و العربية اختلفت جداا مفيش لا رزع ولا اي حاجة بس هما طبعااا غاليين جدا ... بس بصراحة انا كدة كدة كانت نيتي اني اركب الحاجات

**madooomad** · 03-11-2014 09:33 PM

السلام عليكم اكملكوا ... انا كدة كدة كنت ناوي اغير الحاجات دي في التوكيل عشان كنت عاوز اضمن انها حاجات جديدة ... لاكن موضوع البلية انا قررت اني اشتري الدشم و القصة دي كلها كاملة من برة استيراد من اي حد من بتوع قطع الغيار لما اجي اغير التيل المرة الجاية و كمان هاركبهم برة بس هافضل مكمل الصيانات الدورية في التوكيل بتاعة الزيوت و الفلاتر و التظبيط ... دلوقتي محتاج نصيحتكوا منين اشتري الديسكات و الدشم و الكايبرات بتاعة السيفيك ٢٠١٠ و تقريبا هايعملوا كام و هما هايكونا جداد ولا مستعملين ؟؟ معلشوجعت دماغكوا و اتمني تكونوا استفدوا بالتقرير الصغير ده

**virus459** · 03-11-2014 11:05 PM

الف مبروك علي الصيانه ياباشا والجنبين موجودين عند مجدي الدسوقي وعند فيصل برده كله استيراد ويعملوا في حدود 2000 وتخلي محمد علي يركبهم وهو شغال في التوكيل برده يعني مابعدتش كتير بس لييييييييييه 1700 مصنعيه هما كانوا بيعملوا ايه

**madooomad** · 03-11-2014 11:15 PM

المشاركة الأصلية كتبت بواسطة virus459

الف مبروك علي الصيانه ياباشا والجنبين موجودين عند مجدي الدسوقي وعند فيصل برده كله استيراد ويعملوا في حدود 2000 وتخلي محمد علي يركبهم وهو شغال في التوكيل برده يعني مابعدتش كتير بس لييييييييييه 1700 مصنعيه هما كانوا بيعملوا ايه

الله يبارك فيك يا باشا انا بصراحة اتصدمت من المصنعيه خصوصا ان المهندس ماجبليش سيرة عن قصة المصنعية و اكتشفتها في الفاتورة بصراحة كتير ...... كل ايتم ركبوها عليها مصنعية منفصلة لوحدها!!!!!

**Waleed_aboammar** · 03-11-2014 11:38 PM

المشاركة الأصلية كتبت بواسطة madooomad

الله يبارك فيك يا باشا انا بصراحة اتصدمت من المصنعيه خصوصا ان المهندس ماجبليش سيرة عن قصة المصنعية و اكتشفتها في الفاتورة بصراحة كتير ...... كل ايتم ركبوها عليها مصنعية منفصلة لوحدها!!!!!

يا باشا الف مبروك الصيانة و عقبال المليون كيلو ان شاء الله بس هي معروفة صيانة التوكيل غالية نار لان الناس مضطرة و هي في الضمان عشان مايروحش عليها إنما بعد الضمان يبقى تشوف الناس اللى فاهمة في العربية كويس و كمان محلات قطع الغيار الاصلى طالما هو ده غرضك و صدقنى هتوفر كتير لان موديلات العربيات الجديدة كلها مفهاش تصليح كله تغيير و الميكانيكى أو العفشجى المتخصص بيكشف بنفس مهارة الناس اللى شغالة في التوكيل بس أهم حاجة تروح عند اللى فعلا معروف عنه انه متخصص في نوع عربيتك و اللى يسأل مايتوهش

... تقبل تحياتى

**Amour_basha** · 04-11-2014 03:40 PM

مبروك يا باشا العربية و الصيانة ربنا يباركلك فيها
انا عملت زيك كدة بضبط اول ماجبتها استنيت صيانة المية الف و ضبط كله فى التوكيل و برده اتصدمت من تكلفة المصنعية
الحاجة الى عايزها للفرامل زى مالاستاذ virus قال كدة حتلاقيها عند مجدى الدسوقى و دى نمرته 012223406486
و فى مسعد و عدلى وفى محمد على الناس بتشكر فية اوى .. و الف مبروك تانى

**madooomad** · 05-11-2014 08:31 AM

الف شكر يا رجالة علي الرد بتاع استفسار الفرامل بس سؤال .. في حد معاه رقم محمد علي او يقدر يوصفلي مكانه .. وكمان كنت محتاج رائيكوا في نوع الكاوتش لاني هاجيب فردتين اللي راكبين عندي فيدرال اجييب اثنين زيهم ولا اغير ل بريدج ستون ولا في حاجة احسن خصوصا ان الجنط عندي ١٧ ٢١٥/٤٥

**gogo510** · 08-11-2014 12:32 AM

الاسعار غاليه جدااااااا كنت ممكن تكشف عندهم وتغير بره ... وبره في عندك مرونه مش لازم تجيب الاصلي في كل حاجه

**gogo510** · 08-11-2014 12:35 AM

بالنسبه لماركه الكاوتش خد الموديل بتاعه وخش ع النت واتاكد من حاجتين انه موفر للبنزين واقل ضوضاء وطبعا الامان دا اولا واخيرا

**pioneerahmed** · 08-11-2014 02:18 PM

المشاركة الأصلية كتبت بواسطة amour_basha

مبروك يا باشا العربية و الصيانة ربنا يباركلك فيها
انا عملت زيك كدة بضبط اول ماجبتها استنيت صيانة المية الف و ضبط كله فى التوكيل و برده اتصدمت من تكلفة المصنعية :b4_556:
الحاجة الى عايزها للفرامل زى مالاستاذ virus قال كدة حتلاقيها عند مجدى الدسوقى و دى نمرته 012223406486
و فى مسعد و عدلى وفى محمد على الناس بتشكر فية اوى .. و الف مبروك تانى

الرقم دة غلط ممكن تكتبة تاني لو سمحت