ايه احسن اتوماتيك زيرو لاتزيد عن 120 الف جنيه ؟؟ محتار وأرجو المساعدة

السلام عليكم،
أعضاء المنتدى الكرام انا عضو جديد ومحتاج مساعدة لأني محتار جداً.. عاوز أجيب عربية زيرو أتوماتيك بس مش عاوز أدفع أكتر من 120 ألف وده بالكتير أوي (مش هقدر أزود جنيه) وياريت لو كان التمن أقل طبعاً لأني هضطر أستلف..

عاوز عربية سيدان وتكون عائلية (تشيل 5 راكب مستريحين) بس برضو بنكهة شبابية (لو كان ينفع يعني) لأني شاب وبحب برضو اجري لما اكون لوحدي.. لاتقل عن 1500 سي سي ولا تقل عن مثلا 90 حصان لأني متعود على الفيرنا وموتورها القوي وهتصعب عليا نفسي اوي لو سقت عربية ضعيفة.. وياريت صيانتها وقطع غيارها تكون مش غالية (ممكن متوسطة بس بلاش الغالي)..

انا اساساً معايا فيرنا مانيوال فول اوبشن موديل 2010 ودي كانت اول عربية اركبها.. وبصراحة بحبها جداً وصعبان عليا ابيعها بس مشكلتي الوحيدة إني خلاااااااااااااص تعبت من السواقة المانيوال خصوصاً في الزحمة.. انا بسوق كتير في شوارع زحمة زي شارع الهرم ووسط البلد والبلد كلها اساسا بقت زحمة حتى الدايري والمحور.. رجلي خلاص تعبتني وكرهت دواسة الدبرياج والسواقة المانيوال..

أفيدوني أفادكم الله...
شكراً

ممكن بيرسونا او اوبترا شكل قديم

شكرا عالرد... لكن هو فيه اوبترا كوري زيرو؟؟ أصل النيو اوبترا طلعت للأسف صيني :( !!!!
ياريت لو تعرف بتتباع فين تقولي.. بس ياترى هتعدي ال 120 ألف ؟؟؟ انا عاوزها اتوماتيك متنساش..

والبيرسونا عجبتني جداً جداً وكنت بفكر فيها بس لقيت سعرها عالي وقلت الاوبترا احسن لان قطع غيارها منتشرة وصيانتها هتكون اسهل ليا لأني ماليش في مشاوير مراكز الصيانة واللف عليهم وكده.. انا عاوز عربية لو عطلت مني في اي منطقة أصلحها في مكان قريب ومش محتاج أدور على مراكز الصيانة اللي بتفهم فيها وأسأل الناس وألف عليها وكده..

اعتقد صنى اتو فئه اولى ممكن تكون كويسه ب 110 الف

اقتباس:

---

المشاركة الأصلية كتبت بواسطة m-sabry

شكرا عالرد... لكن هو فيه اوبترا كوري زيرو؟؟ أصل النيو اوبترا طلعت للأسف صيني :( !!!!
ياريت لو تعرف بتتباع فين تقولي.. بس ياترى هتعدي ال 120 ألف ؟؟؟ انا عاوزها اتوماتيك متنساش..

---

موجود منها دفعه 2014 بس مش كتير وزياده ايرباج وطاره مالتى
سعرها مش هايزيد عن 120
اسأل فى المعارض وهتلاقى ان شاء الله

اقتباس:

---

المشاركة الأصلية كتبت بواسطة m-sabry

والبيرسونا عجبتني جداً جداً وكنت بفكر فيها بس لقيت سعرها عالي وقلت الاوبترا احسن لان قطع غيارها منتشرة وصيانتها هتكون اسهل ليا لأني ماليش في مشاوير مراكز الصيانة واللف عليهم وكده.. انا عاوز عربية لو عطلت مني في اي منطقة أصلحها في مكان قريب ومش محتاج أدور على مراكز الصيانة اللي بتفهم فيها وأسأل الناس وألف عليها وكده..
البيرسونا سعرها 116 تقريبا ومش هاتزيد عن 120
بس شكلها كده مش هتناسبك

---

كتير قالوا الصني الجديدة مش حلوة.. ومش عارف برضو الشكل القديم بتاعها فيه منه زيرو دلوقتي ولا خلص ؟؟ لو حد يعرف اجيبها منين يقولي.. هي او الاوبترا الشكل القديم برضو (الكوري)

شكرا جزيلاً على الرد السريع :)

اوبترا شكل قديم زى مقال جاجوار بية

BYD L3 Auto
عربية كاملة وواسعة وشكلها جميل وب98000

الbyd عربيه ممتاااااااااااااااااااااا اااااااااااازه وافضل من الصني والاتراج وسيارات كتير عربيه نعمه وعمليه واقتصاديه وجميله وكمليات وامااااااااااااااااان البديل التاني وفئه تانيه وفي رأي افضل مافي السوق حتي اول فئه لانسر شارك ب134 موديل 2014 وبعدين يا باشا ارمي 60 الف في البنك واعمل مؤدم 60 الف في المعرض وقسط بضمان الوديعه وخلاص يلا يا عم ادعيلي

شكرا عالرد لكن انا بصراحة مبحبش ال BYD خالص...

طيب ايه رأيكوا في ال Briliance FRV؟؟ سعرها تحفة 97000 اوتوماتيك.. وياترى ايه الفرق بينها وبين ال FRV Cross اللي سعرها 104000 ؟؟ هل فرق السعر يستاهل؟؟ وياترى هي ضيقة ولا تشيل برضو 5 ركاب عادي؟؟ بصراحة بفكر اجيبها..

ولا اجيب افيو اتوماتيك ب 103000 وخلاص؟؟!! انا عارف ان الافيو وحشة بس مش عارف هي وحشة اوي كده ولا لأ؟؟ انا بس بقول اني لو فكرت ابيع بعد 5 سنين مثلا مش هخسر كتير فيها لأنها شيفروليه برضو وأكيد مش هتخسر زي الصيني؟ ولا انا غلطان؟؟

الخلاصة:
يعني مزنقش نفسي و اجيب FRV اتوماتيك ولا أزنق نفسي شوية صغيرين واجيب FRV Cross أو أفيو؟

ولا أزنق نفسي شوية اكتر واجيب برسونا أو أدور عالاوبترا الكوري 2014 او الصني الشكل القديم (لو لقيت منهم يعني) ؟؟؟؟؟؟؟؟؟؟؟؟ :shyy:

مش لازم تكون سيدان المهم متكونش ضيقة..

احب افكركوا اني معايا اساسا فيرنا 2010 فول اوبشن بس مانيوال.. وانا تعبت من السواقي في الزحمة ونفسي اسوق اتوماتيك علشان اريح رجلي شوية...

لسه محتار افيدوني افادكم الله... شكرا

لو مكانك
اوبترا الشكل القديم اوتو
صني الجديده او القديمه
بي واي دي

لو مكانك اجيب افيو اوتوماتيك وخلينى فى المضمون . مهما كانت عيوبها بس هاترحمك من المخاطرة بعربيات اعتماديتها مش متجربة او تطلع فيها عيوب جوهرية . هات الافيو دلوقتى ولما ربنا يكرمك قدام وتعرف تجيب حاجة اعلى ابقى بيع الافيو وهاتجيبلك سعر كويس . وهى فيها كل اللى انت عايزه تقريبا . وبالتوفيق

اوبترا او صني ,, الاتنين واسعين و منتشرين و اعاده بيع اكدي معقوله ,, بس اسمع اوبترا تاكل بنزين ,, لكن الصيني جه انا معرفوش بس ممكن تسال عشان لو العربيه بتفتح بقها علي بدري يبقي ملوش لزمه و كمان اعاده البيه اكيد مش قوي

suzuki swift dzire

تمنها 107 الف ووفر باقى فلوسك

لو مهتم اقرا الموضوع ده :

http://www.nilemotors.net/Nile/439246-2015.html

طالما الفيرنا مريحاك وبتحبها
طب ماتجيب فيرنا اوتوماتك وخليك ف اللي تعرفه
وصيانتها واكسسوارها رخيص ولو وديتها لبتاع الترمس ح يصلحهالك

اقتباس:

---

المشاركة الأصلية كتبت بواسطة hugan

لو مكانك
اوبترا الشكل القديم اوتو
صني الجديده او القديمه
بي واي دي

---

هل الاوبترا الشكل القديم يوجد بها وسائل امان

اقتباس:

---

المشاركة الأصلية كتبت بواسطة m-sabry

السلام عليكم،
أعضاء المنتدى الكرام انا عضو جديد ومحتاج مساعدة لأني محتار جداً.. عاوز أجيب عربية زيرو أتوماتيك بس مش عاوز أدفع أكتر من 120 ألف وده بالكتير أوي (مش هقدر أزود جنيه) وياريت لو كان التمن أقل طبعاً لأني هضطر أستلف..

عاوز عربية سيدان وتكون عائلية (تشيل 5 راكب مستريحين) بس برضو بنكهة شبابية (لو كان ينفع يعني) لأني شاب وبحب برضو اجري لما اكون لوحدي.. لاتقل عن 1500 سي سي ولا تقل عن مثلا 90 حصان لأني متعود على الفيرنا وموتورها القوي وهتصعب عليا نفسي اوي لو سقت عربية ضعيفة.. وياريت صيانتها وقطع غيارها تكون مش غالية (ممكن متوسطة بس بلاش الغالي)..

انا اساساً معايا فيرنا مانيوال فول اوبشن موديل 2010 ودي كانت اول عربية اركبها.. وبصراحة بحبها جداً وصعبان عليا ابيعها بس مشكلتي الوحيدة إني خلاااااااااااااص تعبت من السواقة المانيوال خصوصاً في الزحمة.. انا بسوق كتير في شوارع زحمة زي شارع الهرم ووسط البلد والبلد كلها اساسا بقت زحمة حتى الدايري والمحور.. رجلي خلاص تعبتني وكرهت دواسة الدبرياج والسواقة المانيوال..

أفيدوني أفادكم الله...
شكراً

---

والله انا كنت محتار شكل حضرتك وبعد ماشوفت فى منتدى نايل مورتورز الرائع واعضاء المنتدى المحترمين جدا
افتنعت الحمدالله نيو صنى وان شاء الله هتكون سوبر صلون وده يعتبر نفس السعر الى 123 الف
واهم حاجه انا كنت بدور على فى اى عربية وسائل الامان
وربنا يوفقق

باشا لو لسه ماجبتش لسه عربيه اتو ماتك شبابي ممكن تفكر في الجين 2 بروتن
او معاك الربنو سانديرو او اللوجان الجديده
والاتنين مليانين وسائل امان ليهم شهادات بي كده

نفس الحيره اللى كلنا مرينا بيها وانا شخصيا كنت بفكر فى ال
byd
briliance

الاولى ممتازه بس صينى واعاده البيع مش حلو وكذلك البريليانس

جبت نيوصنى واسعه وعاليه عن الارض وموتور وفتيس ممتاز ولا اروع من كده وسعر اعاده بيع حلو

هى بس عيبها الصاج الخارجى ضعيف ونوعيه تيل الفرامل مش حلوه

الصني والشكل القديم بينزل لسه وكويس ع فكرة لو مش حابب الشكل الجديد :))

من ناحية الكماليات والأمان في رينج السعر ده أنا أرشح لك بالترتيب كده :
1- بيرسونا أو جين2 ... : كماليات ممتازه ومواصفات أمان مش هتلاقيها غير في العربيات أم 150 ثبات ممتاز وموتور كويس ... عيبها : التوكيل وحش في الصيانه بس دلوقتي ناس كتير شغاله فيها وقطع غيارها بقت متوفره
2- صني قديم : ثابته, قويه , توكيل محترم , قطع غيار وصيانه سهله وسعر اعادة بيع ممتاز .... عيوبها : فقييييره جدا في الكماليات يعني ولا abs ولا سماعات ورا ولا أي حاجه (عربيتي على فكره) وعفشتها ناشفه مش مريحه
3- لوجان أو سانديرو : أثبتت كفاءة وانتشرت وتوكيلها كويس وقطع غيارها توفرت وسعرها مناسب وواسعة ... عيبها : خفيفة وغير ثابته على السرعات العاليه وتسارعها بطيء شويه خصوصا الاوتوماتيك .
وربنا يهديك للأصلح ان شاء الله

طيب ليه متفكرش في بيجو 301
عربية فخمة فرنساوي تقفيل اسباني و 1600 سي سي 115 حصان

السيارات الجديدة | بيجو | 301 2015 - ContactCars.com

انا محتار زيك كده بس انا رسيت علىالبيرسونا ان شاء الله...
الصنى الجديدة مش ثابتة اطلاقا بعد 120 انما عربية بحر من جوه...
بصراحة افضل سيارة فى السعر ده البيرسونا او الجين 2 بس البيرسونا اوسع

اقتباس:

---

المشاركة الأصلية كتبت بواسطة moodee_848

انا محتار زيك كده بس انا رسيت علىالبيرسونا ان شاء الله...
الصنى الجديدة مش ثابتة اطلاقا بعد 120 انما عربية بحر من جوه...
بصراحة افضل سيارة فى السعر ده البيرسونا او الجين 2 بس البيرسونا اوسع

---

فعلا البيرسونا أفضل اختيار في الفئة السعرية دي والله أعلم.

لو مش محتاج عربية واسعة يبقى عليك و السوزوكى سويقت الجديدة، محترمة و شغلها نظبف
غير كده يبقى صنى او اوبترا الشكلين القديمين انتشار و سهولة صيانة