الموضوع: مافيش فايدة

دلوقت انا عايز رايكم فى موضوع حيرنى ومش لاقى له حل انا طبيب مغترب خارج مصر من 14 سنة ونازل اجازة من اسبوع واحد فقط بعد غياب سنتين تقريبا لقيت تليفونى الثابت مفصولة منه الحرارة من يوم 27 اكتوبر
اتصلت بالشركة المااااسرية قالوا لى تليفونك اتغير رقمه لرقم اخر وعدم وصول الحرارة موش من عندنا من السنترال على اساس انهم شركة فى بلد تانية وكدة يعنى
رحت السنترال من يوم الاحد الماضى 3 مرات ولقيت موظف قاعد على مكتب وقدامه كمبيوتر عتيق تحت بير السلم ولما سالته قال لى انه تليفونك اتغيرت نمرته وركب بالغلط عند شخص تانى وشغال ماشاء الله مظبوط طيب رجعوا الخط يا جماعة ؟معلش لما الفنى اللي اسمه ماجد وهو المسؤل الوحيد عن المنطقة بتاعتكم يوصله مظبوط ويصلح غلطته طيب فين ماجد اعطونى رقمين لتليفون محمل ولا يرد عليهم ابدا وارسلت له رسايل لا يرد
عملت شكوى فى المركز القومى للاتصالات برقم ولما اتصلت بيهم ردت على موظفة باسلوب مبتذل كانى باحجز طاولة فى نايت كلب بعد 14 يوم من الشكوى نقدر نرد عليك ونعرفك حصل ايه فى مشكلتك
بوابة الشكاوى لمجلس الوزراء اتقفلت
النهاردة شركة تى داتا اتصلت بى وبتسالنى عن خدمة الانترنت اخبارها ايه بعد تغيير الخط فحكيت لهم المشكلة من الاول للاخر فرد على خدمة العملا باسلوبهم المقيت المنافق انهم هيتواصلوا مع الاعطال ويردوا على بعد ساعتين وطبعا كله كلام فاضى ولا اتصلوا ولا كانهم يعرفونى قبل كدة
عملت شكوى على الفيس فى صفحة المصرية للاتصالات لغوا المشاركة وعملوا لى بلوك بالرغم انى باتكلم باسلوب مهذب جدا وغيرى شاتمهم شتيمة يعاقب عليها القانون وسايبنها عادى
والسؤال الذى يطرح بلح الان اعمل ايه واروح فين فى مااااسر العزيمة ام الدنيا علشان يرجعوا الخط بتاعى اللى باسمى ومن حقى انى يتوصل عندى ؟
اى حد عنده اى اقتراح تانى؟