الموضوع: هبيع سخان الغاز وبفكر أجيب كهربا فوري .. أي نصائح ؟؟

السلام عليكم يا شباب
سخان الكهربا الأوليمبيك ال60 لتر الحلة الداخلية باظت بعد عشرة عمر دامت أكتر من 8 سنين مصلحتوش فيها إلا حوالي 3 مرات مجرد تغيير هيتر كل كام سنة وبعد نقل وفك وتركيب في أكثر من شقة
فقلت أجيب سخان غاز علشان فواتير الكهربا اللي بتيجي بال250 جنيه شهريا وأستغل وجود الغاز الطبيعي عندي لأن الفاتورة مش بتعدي 10 جنيه واتهورت واشتريت فعلا أوليمبيك برده 10 لتر
بقاله حوالي أسبوع راكب لحد دلوقتي وعايز أقولكم ندمت أشد الندم إني جبته
مش عشان ماركة أوليمبيك السخان نفسه مفيهوش حاجة بس حوار السخان الغاز قمة في القرف خاصة لو ضغط المية عندك مش متظبط لأن أولا بياخد وقت على ما المية تسخن على عكس الكهربا ثانيا مش بيديني مية فاترة لأن أقل درجة حرارة بتبقى 38 وأنا ببقى عايزها متزيدش عن 33 ومفيش حل غير إنك تفتح المية على الآخر وطبعا ده إسراف وتبذير في المية كمان النهاردة وأنا باخد دش مفروض إني مظبطه على 43 تقريبا فجأة لقيته قعد ينزل لحد ما وصل 24 !! ببص لقيت الشعلة طفيت وهو لسة شغال ! طبعا موضوع زي ده حصل في المدينة هنا مع كذا واحد وتسبب في اختناقهم وماتوا ! فقررت قولا واحدا إني هبيعه وأخسر فيه زي ما يكون وهرجع للكهربا تاني
لكن دلوقتي سمعت عن سخانات كهربا فورية غير العادية اللي بتبقى بخزان وإنها بتبقى أوفر لأنها مش هتشتغل غير لما تشغل المية السخنة بس ومش هتفضل محوشة المية وكل ما تبرد تسخنها زي السخانات الكهربا التقليدية
فالسؤال دلوقتي: هل السخانات دي عملية ولا برده هتقابلني نفس مشكلة سخان الغاز وموضوع ضغط المية وتقعد تبرد وتسخن بمزاجها ومتظبطش درجة الحرارة زي ما أنا عايز ؟
أي نصيحة ؟