الموضوع: هبيع سخان الغاز وبفكر أجيب كهربا فوري .. أي نصائح ؟؟

المشاركة الأصلية كتبت بواسطة hani945

أنا معنديش سخان كهرباء فورى ، أنا عندى العادى
بس أنا هقول لحضرتك حاجة مهمة
الميزة فى السخانات العادية عموما ، إنها فى خلال 60 دقيقة بتكون المياه درجة ارتفعت بدرجة مناسبة جداً وفى نفس الوقت إنت بتقدر تتحكم فى درجة الحرارة المطلوبة إما من السخان نفسه أو من خلاط المياه ، حتى لو ضغط المياه اتغير هتلاقى إن المياه درجة حرارتها ماختلفتش كتير ، ولا هى بتلسع وتشوى زى السخانات الغاز ، ولا هى بتبقى متلجة .
وبالنسبة لمشكلة الفاتورة دى حلها سهل جداً ، حضرتك لو بصيت على تيكت السخان اللى فيه المواصفات هتلاقى القدرة بتاعته مكتوبة بالوات وغالباً السخانات الـ 50 لتر قدرتها بتبقى حوالى 1200 وات فقط .
يعنى فى 30 يوم الاستهلاك هيكون بالظبط حوالى 36 كيلو وات ، بس بشرط تشغله الـــ 60 دقيقة وتفصله ، وممكن تقلل الاستهلاك أكتر وتشغله نصف ساعة بس تقوم تقلل الاستهلاك للنصف ، لكن المشكلة اللى عند أغلب الناس إنها بتسيب السخان شغال طول النهار ، فكل لما حد يفتح الحنفية يجيب ماية سخنة درجة حرارة المياه داخل السخان تنخفض يقوم الترموستات يشغل السخان تانى علشان يسخن المياه تانى وهكذا يفضل طول النهار السخان شغال والعداد عمال يلف .

فعلا ميزة السخانات الكهربا العادية دي إنك بتتحكم في درجة الحرارة من الحنفية نفسها مش كل شوية أقعد ألف البكرة وتقعد تزود وتنقص بالعشر درجات في سخانات الغاز ! حاجة مقرفة بصراحة
وفكرة إني أفصله لما يسخن المية دي هجربها لأني فعلا كنت بسيبه شغال 24 ساعة في اليوم
أشكرك على الإفادة أخي هاني