الموضوع: سؤال مهم النقل على الثانى بدون دوس بنزين

على حسب ما أنا فهمت... حضرتك بتطلع على الأول عادي.. يعني بتدوس بنزين والعربية تتحرك ... وبعدين تدوس دبرياج وتشيل رجلك من على البنزين و تعشق التاني وتشيل رجلك من على الدبرياج وبعدين تدوس بنزين..

صح كده؟؟

عموما.. الموضوع يعتمد على حسب العربية نفسها


فيه عربيات تانية بتضطر تدوس بنزين سنة صغيرة علشان تحافظ على دوران الموتور ثابت أثناء النقل .. وكان بيحصل معايا الموضوع ده أيام ما كنت سايق التويوتا كريسيدا

العربيات الحديثة (والإنجكشن بالذات) ممكن تخلي الموتور مستمر في الدوران لمدة ثواني عشان ما تضطرش تدوس بنزين وتوازن دوران الموتور مع حركة العربية.

لو ده اللي بيحصل معاك يبقى مفيش مشكلة.



الفكرة الأساسية والصح اللي المفروض يحصل في جميع الأحوال .. إنك ما تخليش فيه أي حركة غير طبيعية تحصل في العربية.

إزاي؟؟


يعني لما تيجي تعشق الغيار اللي بعده.. لازم العربية تمشي بسلاسة... ما تحسش إن العربية نتشت ولا لقدام ولا لـوَرا.

نتشة العربية دي لو فضلت تحصل كتير بتأثر جامد في قواعد الموتور واسطوانة الدبرياج.

وعلشان أقربلك الصورة... تخيل اتنين ماشين مع بعض وماسكين إيدين بعض... لو واحد فيهم وقف فجأة أو طلع يجري فجأة... إيه اللي هيحصل لإيد التاني؟؟؟

يا خلع يا مزق :)



...

المشاركة الأصلية كتبت بواسطة geelypanda

لأ مش بيحصل أي حاجة غريبة و العربية بتمشي بسلاسة و دة اللي اتعلمته في كورس السواقة

مش شرط إن اللي اتعلمته في كورس السواقة يكون صح دايما على فكرة.. لأن زي ما قلت لحضرتك المسألة بتختلف من عربية للتانية..

وشطارتك بعد كده إنك تكيف نفسك مع طريقة سواقة كل عربية.



...

المشاركة الأصلية كتبت بواسطة geelypanda

تمام ماهو عشان كدة ب سأل وكمان لما سألت المدرب قالي ماتدوسش بنزين علي الأول عشان العربية ماتنطش منك لقدام والأفضل إني أبدا ادوس بنزين خفيف علي التاني والتالت و هكذا

ما دام لسه بتتعلم يبقى الكلام ده ماشي..

إنما بعد شوية.. هتبقى رجلك خدت على توقيت رفع الدبرياج.. وهيبقى نظام الأول من غير بنزين ده ما ينفعش.

ده غير إن الحركة دي غالبا بتهلك اسطوانة الدبرياج.. ﻹنك مضطر تاخد وقت لحد ما العربية تبدأ تتحرك.. وكل الوقت ده الاسطوانة بتتآكل نتيجة الاحتكاك

وما تنساش إن اسطوانة الدبرياج معمولة من نفس مادة تيل الفرامل.

فياريت تحاول تتجاوز المرحلة دي بسرعة.


...