يجماعه فى ضرر لو الواحد شال فيشه الايديال كنترول يعنى عطل وظيفته ... يعنى ليها اى اثر جانبى لو شيلتها ؟؟؟
عرض للطباعة
يجماعه فى ضرر لو الواحد شال فيشه الايديال كنترول يعنى عطل وظيفته ... يعنى ليها اى اثر جانبى لو شيلتها ؟؟؟
ياعنى أية تفصلها تقصد تخلعها وتركبها تانى أكيد ولا أى حاجة بس أنما لو تتفك ومتركبش العربيى مش هتمشى أصلا أكيد متقصدش دة
لا با باشا انا اقصد افكها اصلا واعطل شغل الايديال ... بس الكلام ده بعد مشغل العربيه وخليها تسخن كويس جدا وشغل كل الاحمال ... وبعدها والعربيه ديره افصل فيشة الايديال وسيبها مفصوله مركبهاش تانى ... هياثر ع حاجه؟؟ اصل انا عملتها فعلا والعربيه شغاله مفيش مشكله وبمشى وجري بيها ... لكن خايف يكون ع حساب حاجه تبان فى المستقبل ... يارب اكون قدرت اوضح لك قصدى
باشا الايديال كنترول دة مخ العربية وهو الى بيزبط الموتور ودخ البنزين فطبعا مبدا هياثر على استهلاك البنزين وظبطة العربية بس انا مش عارف أنت عايز تفكة لية طالما هو شغال أصلا مش بايظ دة لما بيبوظ بيبرجل العربية اصلا بنزين وكهربا وتنتيش أزاى تمش وتجرى عادى من غير أى تاثير
شوف يا سيدى الفاضل
عندى ال ار بى ام عالى ... طول منا مااشى بالعربيه ع المور تلقيه ناطط 1400 وراس والف سيف مهو نازل الا لما العربيه تقف تماما .. تقف العربيه من هنا ينزل تحت ال 1 زى الباشا ويبقى طبيعى ... تتحرك بالعربيه يعلى معاك وشغال زى الفل مع دواسه البنزين ... هوب تمور العربيه وتسيبها تجرى بسرعتها ... ينزل معاك لحد 1400 برده ويحلف مينزل تحت ال 1 غير والعجل واقف خالص ... المهم بعد مشاورات كتير وتنظيف الحساس وبوابه وفيلم كبير كده ... حد من الزملاء قالى نشيل فيشة البلف اصلا لانه مسؤل عن ال ار بى ام وهو تقريبا متبرمج ع كده ... المهم مطولش عليك قالى ندور العربيه ونشغل احمالنا عليه عادى خالص عشان الكنترول يعرف ان ده العادى بتاع الماتور يعنى الانوار الكاسيت ... الخ والعربيه طبعا تكون سخنت كويس جدا .. ونشيل الفيشه .. الحقيقه عملت كده بقى ال ار بى ام فعلا بينزل بسرعه جدا بمجرد مشيل رجلى من ع البنزين ومور العربيه ينزل زى الفل فعلا تحت ال 1 او يكو 1 بالكتير والحياه حلوه ... فعايز اعرف لو سبته بقه متشال كده يأثر ع حاجه ؟؟ مع العلم ان العربيه مش مبرجله هى بس بتحتاج ظبتة معينه ع دواسه البنزين خدت عليها مع الوقت .... ودى حكايتى مع الانوس ... ومخبيش عليك ال ار بى ام مشكلته مأرقاني يمكن من سنتين لحد موصلت للحل ده .. بس خايف اصلح حاجه ع حساب حاجه تانيه
متهيألى الموتور هيعلى كأن الايدل بايظ
هياثر علي استهلاك البنزين فقط وممكن لو وقفت مفاجي بفرملة قوية العربية تبطل منك وهنا المشكلة ان السيرفو مش هيشتغل ولو احتجت تدوس فرامل سريعة مرة تانية مش هيبقي معاك سيرفو لان الموتور بطل
استااااااذ انا قولت محدش هيفيدنا غير معاليك
جميل يا ريس الكلام ده ... بس فى حجتين
اولا استهلاك البنزين اللى هيبقى فى تاثير عليه ده ....اعتقد هيبقى بالايجااب لان العربيه ماتورها مبقاش عالى مع المور بالعكس ... فبتالى سحب البنزين هيبقى اقل ... ولا انا فاهم غلط؟
ثانيا موضوع السيرفو ده بصراحه انا مش عارف ايه هو ... لكن اللى فهمته ان العربيه هتبطل لو دوست فرامل فجأه وطبعا لو العربيه بطلت مش هلاقى فرامل تلحقنى .... طيب دى ملهاش حل ؟؟
وحاجه اخيره بقه ... حساس السرعه استيراد بيبقى عامل كام ... انا سالت ع البالف بتاع الايديال الراجل قالى 100 جنيه ... طيب حساس السرعه متعرفش يا كبيرنا يعمل كام ... ومصنعيه تغيره تعمل اد ايه؟؟
تحياتى ليك يا كبير محترمين المنتدى
أ/ أحمد
حضرتك لما فتحت الموضوع قبل كده ... رديت على حضرتك في الموضوع ده و كنت بلغت حضرتك اني قريت كويس قبل ما أعمل الخطوه ديه ... و حضرتك جربي و شوفت بعينك
أنا والله على ما أقول شهيد اني عامل كده عندي و بقالي سهرين ماشي بالعربية ....
كل اللى هقدر أقوله العربية أحسن كتييييييييييير
أنا فصله تماما و العربية مش بتبطل منى نهائي الحمد لله في أي حاجه حتى مع التكييف
استهلاك أحسن سحب أحسن من rpm منخفض معدتش بتطلع صوت على الفاضي بدون سحب
لو تحب أحط فيديو للعربية عندي أحطه عشان الناس تصدق
أ/ طارق
الاستهلاك دلوقتي و أنا فاصل الفيشة 10- 12 كم /لتر داخل البلد
16 كم / لتر السريع على سرعه 90-100
السيرفو مالهوش دعوه بالموضوع بتاع صمام السلانسيه ... و الدليل ان البوابه دايما فيها vacum و ده حتى في السلانسيه و كمان على ال rpm ألعالي
و أنا معدل فرامل و لاغي صمام السلانسيه و و الحمد لله الفرامل بتقفش على كل السرعات
على العموم يا جماعه لو حد مش مصدق يجرب ... و مش هيخسر حاجه و هيشوف بعينه
What Are the Functions of an Idle Control Valve? | eHow
ده لينك بيوضح وظيفته فقط التحكم في السلانسيه ........ مالهوش دعوه بأي حاجه تانيه خالص عشان محدش يقولي بيأثر على أي حاجه في الموتور
استاذ محمود
كلامك زى الفل وانا فعلا لما جربت ال RPM ظبت ... بس زى ما وضحت لحضرتك العربيه فعلا وهى ع السلانسيه احيانا تحسها هتبطل و ال rpm بينزل لتحت ويقرب من ال 0 وخصوصا ع السرعات الهديه تحت ال 10كم ولازم تلحقها بزقه بنزين ... لكن غير كده مشوفتش مشاكل ... انا مجربتش اجرى بيها لان تركيزى كان ع مشكله علو ال ار بى ام .... اللى فعلا اتحلت بالشكل ده .. وكنت عايز اطمن بس من باقى الزملاء وخصوصا أ طارق اللى ديما بيخدم الناس لوجه الله ... وكمان كان نفسى اشوف رأى أ محمد ممدوح اللى شكله مشغول بقاله فتره مش بيرد ع موضوعات ...
استاذ طارق طمنا فعلا انه مش هياثر ع حاجه غير استهلاك البنزين واللى حضترك تفضلت وقولت انه فعلا بقى افضل
تانى حاجه أ طارق اشار لنقطه الفرامل والسيرفو .. بس حضرتك كمان طمنتنا من نحيتها ع العموم انا من ساعت مقولتلى وانا شايلها فعلا بس قولت نطمن ليكون ده مع الوقت هياثر ع حاجه ...
تحياتى ليك ولتعبك معانا يا استاذ محمود كلك زوق يا باشا
,لا كازوزه و لا حاجه ..... مافيش اختلاف يذكر قبل الفيشه و بعدها .... أنا بتكلم ان تعديل الفرامل بيحتاج اني أضغط لمسافه أكبر على الدواسه لان حجم البستم الموجود في جهاز الفرامل أكبر ... و لو أن السيرفو مش تمام كان مش هيبقى معايا فرامل من أساسه
على العموم برده حضرتك جرب في حته فاضيه تدوس جامد و شوف و انشاء الله تلاقي كله تمام
و بعدين يا أ أحمد أنا سعيد ان حضرت أخدت الخطوه و جربت الموضوع لان خل بال حضرتك كل حاجه في الحياه محتاجه جرأه و تجربه و الحاجه أم الاختراع و مخسرتش حاجه لان ده صمام بيتحكم في السلانسيه يعنى أخر العربية هتبطل لو فشلت التجربه و هوصله تاني و كله هيبقى تمام عادي
الحذر كل الحذر لو بطلت وانتا في موقف مفاجئ واحتجت الفرامل البدال هيحجر تحت رجلك وهتحتاج عشر اضعاف القوة المحتاجها للفرملة والعربية دايرة
وبعدين بقه فى القلق ده يا استاذ طارق انا كده دماغى اضربت فى الخلاط :majd(4):
هى العربيه صحيح تحسها ممكن تبطل بس ده فى السرعات القليله ... لكن فى الجرى شغاله كويس ولحد دلوقتى مجتش الحمدلله حاجه تخلينى الحق نفسى وفرمل بشكل مفجىء بس ده لحد دلوقتى معرفش طبعا قدام فى ايه والسواقه فى بلدنا اصلا لوحدها بتثير الاعصاب انتوا عرفين طبعا مفجأت سواقين الميكرباض وما ادراك
انا كده هبتدى اخاف اركب العربيه ... ارجع الفيشه تانى بقه ولا ايه
يجب عند اصلاح عيب بالسيارة البحث عن المشكلة الاساسية ثم اصلاحها وعدم الهروب واللجوء الي الحلول السريعة التي يمكن ان تؤدي لمشاكل اخري
سؤال وارجو الرد
لما الايديل ملهوش لزمة وممكن يتلغي المصمم والمصنع كلفوا نفسهم فلوس ووقت ومجهود وفقد لميزة تنافسية و ........ و ...... لييييييييييييه مكانوا لغوه من الاصل وريحوا دماغهم ؟
سؤال مهم يا كبير
بس بصراحه اجابته مش عندى انا .... طيب اعمل ايه فى المشكله اللى فصل الايديال ده بيحلها ... اغير الايديال .. ولا اغير حساس السرعه مع الاخذ فى الاعتبار ان ال تى بى اس سليم وتم تنضيف البوابه والمنفولد والايديال ولازال ال اى بى ام عالى ع المور :Copy of rfds:
طيب هو فيه حلقة وصل او علاقه او لينك يعنى بين حساس السرعه والايديال؟؟
يعنى لو حساس السرعه بايظ يدى اشاره غلط للايدال لو فى بينهم اشارات يعنى وبتالى الايديال يدى اشاره غلط للبوابه فبتالى يعلى المكنه وبالتبعيه ال ار بى ام؟؟ ده كمان سؤال مهم يا استاذ طارق يا ريت تفيدينى يا سيد المعلمين
طارق باشا ولو انى مش مقتنع بفكرة الغاء عمل الايدل الا انى برضو لو تسمحلى ليا تعليق على جملة
"ما الايديل ملهوش لزمة وممكن يتلغي المصمم والمصنع كلفوا نفسهم فلوس ووقت ومجهود وفقد لميزة تنافسية و ........ و ...... لييييييييييييه مكانوا لغوه من الاصل وريحوا دماغهم"
مهى نفس القاعدة اللى انتم طبقتوها قبل كده مع ال egr
انا مش بعترض علي خبراتك فى فنيات لا سمح الله ولا امكانياتى تسمحلى بكده انما انا بس مستغرب على النقطة دى ...هو الصح ازاى؟
متابع رايك يا استاذ طارق ... وكمان وجهة نظر استاذ احمد سمير سليمه جدا وتحترم .. انا سمعت فعلا اننا ممكن نلغى ال egr مع ان المصنع بينزل العربيه بيه .... ناهيك طبعا ع اننا بنعدل ع فرامل المصنع ورشاشات المصنع اللى اساسا بجيبها من عربيه وماركه تانيه خالص..اقصد طبعا بي ام40 يا كبير الاستشاريين متبخلش علينا بالمعلومه دحنا غلابه :36_2_33:
صباح الفل يا ريس
بتشوقنا ولا ايه يا مدير (:
انا كنت عايز اعرف وجهة نظر سعادتك (:
تحياتى يا كبير
احنا بنلغي ال egr مش علشان ملهوش لزمة لا بنلغيه علشان نحصل علي تسارع اكبر علي حساب استهلاك بنزين يعني مش فارقة معانا نوفر بنزين ونحافظ علي البيئة مقابل اننا نحصل علي قوة زائدة قليلا من المحرك و دا مش تعديل علي المصنع لان في موديلات هاف اوبشن مفيهاش ال egr يعني دا اوبشن زيادة مش اساسي يعني علي سبيل المثال عربية بتكيف وعربية من غير في فرق غير زيادة الرفاهية لكن مش عربية فيها فرامل وعربية مفيهاش
يارب اكون وضحت الصورة
ثانيا تعديل الفرامل احنا مش بنعدل احنا بنحط الفرامل الي نازلة للمواصفات الاوربية بدل المواصفات المصرية
موضوع الرشاشات برده مش تعديل لاكن اختيار قطعة غيار افضل من الموجودة بالسيارة مثال مساعدين استوك ولا مساعدين مونرو مش مساعدين استوك ولا بلاش مساعدين فهمت الفكرة
حساس السرعة طول ما العربية ماشية بيعلي الار بي ام حتي لو ممور لو تالف ومدي اشارة للكنترول ان العربية موقفتش هيفضل معلي الار بي ام حتي لو العربية وقفت
تمام يا باشا زى الفل بس مهو سعادتك قولتلى شيك على حساس السرعه لما عرضت عليك مشكله ال ار بى ام العالى مع المور ... فانا قولت بصراحه اغيره وجيب من الاخر عشان اخلص من الازمه دى بس بما ان العداد بينزل تحت ال 1 والعربيه وقفه يبقى كده حساس السرعه سليم؟؟ وابتدى اشك فى بلف الايديال نفسه؟؟ ولا معاليك شايف ايه؟؟ مع العلم ان العداد بينزل تحت الواحد بعد العجل ميقف خاااالص ب ثانيتين ولا حاجه على بال تقريبا مالعداد بياخد باله ان العربيه وقفتت خالص
يا جماعة .... كفاية كلام بدون أي حل مجرب بديل لموضوع فصل الفيشه أنا من ساعتها و أنا لاغيه داخل في شهر و كل الكلام اللي بيتقال هنا عن أي مشكله مش موجود على الأقل عندي
أنا مصمم موضوع فصل الفبشة ملهوش دعوه بأي حاجه تانيه في العربية , ده حتى لمبه check engine منورتش و هي شغاله عندي
تاني حاجه لو حد عرف حل بديل يتفضل يقلنا عليه ... و لحد ده ما يحصل مافيش حل تاني و محدش يعد يقولي الحساس بايط و مش عارف ايه عشان هيصرف فلوس و بدون أي حل للمشلكه ...
شكرا
[QUOTE=tarek_2005;3875827713]
احنا بنلغي ال egr مش علشان ملهوش لزمة لا بنلغيه علشان نحصل علي تسارع اكبر علي حساب استهلاك بنزين يعني مش فارقة معانا نوفر بنزين ونحافظ علي البيئة مقابل اننا نحصل علي قوة زائدة قليلا من المحرك و دا مش تعديل علي المصنع لان في موديلات هاف اوبشن مفيهاش ال egr يعني دا اوبشن زيادة مش اساسي يعني علي سبيل المثال عربية بتكيف وعربية من غير في فرق غير زيادة الرفاهية لكن مش عربية فيها فرامل وعربية مفيهاش
يارب اكون وضحت الصورة
ثانيا تعديل الفرامل احنا مش بنعدل احنا بنحط الفرامل الي نازلة للمواصفات الاوربية بدل المواصفات المصرية
موضوع الرشاشات برده مش تعديل لاكن اختيار قطعة غيار افضل من الموجودة بالسيارة مثال مساعدين استوك ولا مساعدين مونرو مش مساعدين استوك ولا بلاش مساعدين فهمت الفكرة
مين قال ان لو لغيت ال egr هيفرق في التسارع ...
و لو فرق هيكون نفس فرق فلتر الهواء السبور .... 1 حصان بالعافيه
و للعلم ال egr مش بيشتغل في الحمل الكامل على الموتور ... يعنى على ال full throttle
يا جماعه نقرأ الأول و بعدين نتكلم
Don’t Block or Remove the EGR Valve, It’s Saving You Money | Tuner University
الموضوع ده فيه كمية فتى زى الفل
و على رأى ممدوح الى ميعرفش يقول هجس
طيب ما الخواجه اللي عملها كان وفر علي نفسه وشال اﻻيدل لﻻسف عندنا عقدة التعديل علي الخواجه
اولا الايدل كونترول لازم يبقى موجود لسبب بسيط... سرعة الايدل بتتغير حسب ظروف التشغيل و ابسط مثال على كدة و العربية باردة... لازم سرعة الايدل تزيد شوية... مثال اخر هو وضعية تشغيل التكييف... لازم سرعة الايدل تزيد سنة عشان تعادل حمل كومبريسور التكييف
العربيات الكربراتير اللى مكنش فيها ايدل كان بيبقى فيها شفاط لزيادة لفات المكنة فى الايدل و زيادة كمية البنزين لتسخين المكنة... و كمان كان بيبقى فيها pneumatic valve شغلتة رفع لفات الايدل سنة لمعادلة حمل التكييف
ثانيا صاحب المشكلة بيقول ان عندة مشكلة فى حساس السرعة... طيب انت مش عايز تغيرة ليه؟... ليه سايب مكون تالف فى العربية؟... خصوصا ان جزء من شغل الايدل كونترول بيعتمد على حساس السرعة... طبعا كلكم لاحظتوا ان سرعة السلانسية بتزيد عن 1000 لفة طول ما العربية بتتحرك و مبتنزلش الى 850 الا لما العربية تقف تماما... دة معناه ان الكونترول بيغير سرعة الايدل بناء على حالة العربية اذا كانت بتتحرك او ثابتة بناء على الاشارة اللى بتيجى من حساس السرعة
ايه الحكمة انى اتجاهل حساس بايظ و الغى حساس قد يكون سليم عشان احل المشكلة؟؟... مش شايفة حل منطقى خالص
ثالثا الEGR ملوش اى وظيفة غير تقليل اكاسيد النيتروجين فى العادم للمحافظة على البيئة... الكلام اللى فى الموقع اللى بيقول ان وظيفتة تقليل مقاومة الفراغ لحركة البساتم هجس السنين... هو اصلا المكن كان بيشتغل ازاى قبل اختراع الEGR؟؟... و اللانوس الهاف اوبشن اللى مبتنزلش بيه اساسا شغالة ازاى؟
اضافة لكدة الEGR مبيشتغلش الا فى مدى معين من سرعات المكنة و مبيشتغلش لو كابس بنزين على الاخر يعنى مش هيفرق فى السحب الا لو كان تالف و بيدخل كمية عادم اكتر من اللازم و فى الحالة دى ممكن تفكة و تنضفة و تركبة و شكرا على كدة
رابعا موضوع الفرامل دة حالة خاصة جدا... اللى طارق بيتكلم فيه هو ان نتيجة الغاء الايدل كونترولر ممكن يحصل ان المكنة تبطل لما ترفع رجلك و انت ممور و هنا السيرفو مش هيشتغل و مش هتعرف تفرمل
هو احتمال وارد طبعا ان العربية تبطل لو انت لاغى الايدل... و لو بطلت مش هيبقى فيه فاكيوم يغذى السيرفو... بس هى الفكرة ان السيرفو بيبقى محتفظ ببعض من الفاكيوم جواة و ممكن يسعفك فى دوسة او اتنين و العربية مبطلة انما بعد كدة مش هتلاقى فرامل
تانى برضة نرجع و نقول ليه تدخل نفسك فى الحوارات دى كلها لما ممكن تحل المشكلة الاساسية؟... ليه الواحد يشيل على كتفة قربة مخرومة و بلد ما يسد الخرم يفضل يملاها مية؟؟ مهى هتفضل تخر برضة
بالنسبة لصاحب المشكلة:
1- غير حساس السرعة
2- فى حالة استمرار المشكلة جرب ايدل كونترولر تانى
3- فى حالة استمرار المشكلة راجع على ضفيرة الايدل كونترولر
4- فى حالة استمرار المشكلة جرب بوابة تانية
بالنسبة لviper911
مش كل موقع بيبقى كلامة صح 100%... اقراء اكتر من مقال و ابحث فى كذا حتة... الانترنت فيها حاجات غلط زى ما فيها حاجات صح و زى انت ما قولت للناس تقراء الاول يبقى لازم انت كمان تقراء الاول بس من كذا مصدر عشان توصل للصح... النهاردة اى حد ممكن يكتب اى كلمتين و يرفعهم على اى سايت او منتدى... دة لا يعنى ان الكلام صح
http://en.wikipedia.org/wiki/Exhaust_gas_recirculation
http://autorepair.about.com/od/gloss..._egr-valve.htm
https://answers.yahoo.com/question/i...1110451AAGArng
بالنسبة لطارق
كلامك عن حالة الفرامل صح بس محتاجة توفر عوامل كتير مع بعض عشان تحصل
MMamdouh
محمد بك ممدوح
ياباشا فينك من زمان
شوف يا ريس ... انا مقولتش ان عندى مشكله فى حساس السرعه .. انا كل الحكايه انى عرضت مشكلتى ع الاستاذ طارق ربنا يبارك فيه ... (مؤشر ال ار بى ام مبينزلش عن ال 1400 تقريبا وانا ممور غير والعجل واقف تماما ) ده غير انه كمان يا زعيم بينزل بسرعه وبشكل طبيعى لحد 1400 يبدل يثبت العربيه تقف ينزل ببطىء جدا لحد 850
ده لو العربيه مور ... لكن لو العربيه وخده غيار وبتديت اهدى فرامل بينزل بسرعه برده ولو فضلت بالغيار بينزل تحت ال 1 وطبعا العربيه بتبقى هديت تماما وهتقف خلاص بلحقها بالدبرياج طبعا عشان متبطلش ...يروح مرفوع طبعا تانى لحد 1300- 1400 واول مالعجل يقف ينزل ببطىء ل 850
فالراجل تفضل مشكور وقالى انى ابص ع حساس السرعه وفيشته ... فانا حبيت اعرف منه بس فى حلقة وصل بين حساس السرعه والايديال ولا مفيش فبتالى الايديال يعمل المشكله دى ... لان معنديش مشكله خالص فى مؤشر السرعه ده شغال زى الساعه مع الجرى بالعربيه وعمره معمل معايا اى مشكله فبتالى قولت ااكد عليه... ياترى حساس السرعه بالشكل ده فيه مشكله متعلقه بالايديال طالما مؤشر السرعه سليم؟؟...
وبعدين المشكله دى كان فى زميل فى المنتدى قال انه غير بسببها التى بى اس وكمان الايديال ولازالت المشكله زى ما هى
فاستاذ محمود ( فايبر ) قال انه كان عنده نفس المشكله ولما شال فيشة الايديال المؤشر بقى ينزل بشكل طبيعى جدا لحد 1000 بالكتير والعربيه ع المور ...
وانا فعلا لما عملت زى ما قال الراجل برده المشكله اتحلت بشكل كبير والمؤشر بقى ينزل لحد 1000 بالكتير .. لكن يمكن بحس احيانا ع الرسرعات الهاديه انها هتبطل ولا زم الحقها بدوسه بنزين
فقولت لو ده الحل على افتراض ان حساس السرعه سليم ... طيب ياترى الحركه دى ليها اى اثار جانبيه ؟؟
دى القضيه تقريبا يا كبير .. ومستنى برده راى معاليك ... فعلا زى ما استاذ طارق افاد ... حساس السرعه هو المشكله .. ولا البلف نفسه هو الازمه ولا ايه
يارب اكون قدرت اوصلك المشكله بالتفصيل وبشكل كبير
تحياتى ليك يا زعيم
متابع ردك يا كبير
ايه يا استاذ ممدوح نسيتنا ولا ايه يا كبير :(
وبعدين بالنسبه لضفيرة الايديال .. اروح ل محمد السيد مثلا ... وقوله ايه ؟ اقوله بصلى ع الضفيره بتاعة الايديال ... ولا اقوله ايه
ايه يا خونا اخوكوا مزنوق هههههههههههههههههههه
استاذ ممدوح نيستنا ولا ايه يا ريس