ركبت ميزان خلفي لعربيتي بومه 1300 ..تحفةةةةةةة

**DrMax** · 23-11-2014 09:18 AM

السلام عليكم
بقالي فترة بفكر اركب الميزان الخلفي في عربيتي لاني سوقت بومه 1600 موديلات قبل 2010 كتير وفي مشاوير سفر كنت بحسها ثابته عن عربيتي وماسكه نفسها في الملفات وفي فواصل الكباري وحتي الطرق المكسرة او لو في حتة هابطه في الطريق او حفرة من حفرنا الحلوة.. مكنتش بتروح معاها او تقعد تتنطط.
فقولت لازم اجيب الميزان.. حرام ان ليه مكان في العربيه ومركبوش وافقد ميزة من اهم المميزات في العربيه وهي الثبات!!!!
نزلت الحرفيين وجبته وركبته ...بجد العربيه اتغيرت 180 درجة... بقت محكومه وماسكه نفسها.. العربيه بقت ثابته جدا في الملفات الجامده مبقتش بتروح مع الملف زي الاول واضطر افرمل عشان الم نفسي... الطرق المكسرة والحتت الهابطه في الطريق بقت العربيه راكزة فيهم مبقتش بتقعد تتنطط زي الاول... العربيه بقت غير خالص الحمد لله.
بنصح اي حد انه يركبه لانه هيحب عربيته اكتر وهيحس بثباتها المحترم.
بالنسبة للتكلفة الميزان ب 350 جنيه بس ما شاء الله جبته مفيهوش خربوش اكنه زيرو ... الراجل كان بيقول 500 وماسك علي 450 بس اخدته ب350 .. المصنعيه 70.
اهم حاجة وانت بتشتري الميزان تجيبه كامل.. يعني ايه كامل... يعني بالخوصتين بتوعه ودول بيبقي ليهم اماكن تثبيت في الشاسيه لانهم مش موجودين في العربيه... ومسمارين الميزان بكاوتشاتهم.. كل مسمار ليه كاوتشتين واحدة فوق المقص وواحدة تحت المقص.. يعني المجموع اربعه... ودول مهمين جدا لانهم جواهم حديد عشان يستحملو... بالنسبة للمسامير والصواميل امرها سهل ممكن يتجابو جديد حتي ..مهم جدا كمان ميكونش في اي جزء من دول معووج لاي سبب.. لان كان في واحد عايز يديني الخوصه ملووحه مرضتش وواحد تاني كان هيديني المسمار فيه عوجه بسيطه مرضتش.
دي تجربتي حبيت انقلهالكم يمكن تستفيدو بيها واي استفسار انا تحت امركم
وشكرا

**amr011111** · 23-11-2014 09:36 AM

مبروك الميزان وفعلاً بيفرق

**DrMax** · 23-11-2014 09:40 AM

المشاركة الأصلية كتبت بواسطة amr011111

مبروك الميزان وفعلاً بيفرق

الله يبارك في حضرتك

**ENG.MaRk** · 23-11-2014 11:27 AM

مبروك يا باشا و تعيش و تتبسط بيها

**DrMax** · 23-11-2014 01:34 PM

المشاركة الأصلية كتبت بواسطة eng.mark

مبروك يا باشا و تعيش و تتبسط بيها

الله يبارك فيك يا باشا

**vip74** · 26-11-2014 07:44 AM

هيه ٢١٠٤ فيها الميزان

**cheetoslegend** · 27-11-2014 09:15 AM

ربنا يباركلك فى العربية و الف مبروك............بس ممكن معلومات اكتر على الميزان ده للناس الى اول مرة تسمع عنه زى كدة و تفاصيل التركيب و اشترى منين :)

**MACATHIUS** · 27-11-2014 12:31 PM

ايه الميزان دا !!!!
و هل لازم اى واحد معاه لانسر يركبه و لا هو موجود فى موديلات 2014

**DrMax** · 22-03-2015 11:47 AM

المشاركة الأصلية كتبت بواسطة vip74

هيه ٢١٠٤ فيها الميزان

اولا بعتذر عن الرد المتاخر لانى مكنتش بخش الفترة اللى فاتت ..
لا ياباشا مفيهاش ... قبل 2010 كان بينزل فى ال 1600 فقط .. من اول 2010 مبقاش بينزل فى ال 1600 كمان ولا فى اى فئة

**DrMax** · 22-03-2015 12:08 PM

المشاركة الأصلية كتبت بواسطة cheetoslegend

ربنا يباركلك فى العربية و الف مبروك............بس ممكن معلومات اكتر على الميزان ده للناس الى اول مرة تسمع عنه زى كدة و تفاصيل التركيب و اشترى منين :)

الله يبارك فى حضرتك ...
الميزان ده ياباشا بيبقى ماسك المقصين اللى ورا وبيبقى ماسك فى الشاسيه بخوصتين بس فى نفس الوقت بيبقى مرن وبيتحرك مش ثابت يعنى ...ميزته انه لما تاخد ملف جامد بيخلى العربية متميلش وتروح كلها عشان بتبقى ممسوكة فى الناحية اللى بتكسر ناحيتها فبتاخد الملف مرتاح خالص من غير ما تحتاج تفرمل عشان تلم العربية... وكمان لو خدت حفرة العربية مبتتهبدش فيها لانها ممسوكة فى الناحية التانية ... بتحس ان العربية بقت ماسكة نفسها

الصور والشرح هتلاقيهم فى موضوع العضو ahms10 لانه اول واحد ركبه وكان ليه الفضل فى ان ناس كتير من ضمنهم انا ركبناه بعده
http://www.nilemotors.net/Nile/124251-1300.html

بالنسبة للشرا انا جبته من الحرفيين بس لازم تلف وتسال عشان تجيب حاجة نضيفة بسعر حلو وبحاجته كاملة .. وركبته عند واحد هناك بتاع عفشة ماخدش نص ساعة