مشاركة من نوع جديد

**osamahalem** · 31-10-2008 12:43 PM

الأخوة الأعزاء رواد واعضاء منتدى السيارات البيجو
تحية من القلب ويسعدنى ويشرفنى أن اقدم اليكم مشاركة من نوع جديد فلم يسبق لى ان شاهدت مشاركة ادبية او شعرية على المنتدى وبما أنى شاعر فقد نظمت قصيدة ارجو ان تنال اعجابكم عن معاناتى فى انتقاء سيارتى وبما اننى من مركز بلقاس وكما يقولون بلقاس بلد البيجو فقد اخترت سيارة 505 موديل 1980 تكييف وبور وسنتر وجنوط وشاشة عرض وتعديل امريكانى كامل يعنى باختصار سيارة الاحلام بالنسبة لى شخصيا وبالنسبة لسوق السيارات داخل مدينتى وهذا امر فى غاية الاهمية لتوافر قطع الغيار وخبرة الصنايعية وتوافرها بكثرة المهم لكى لا اطيل عليكم كتبت القصيدة حبا فى السيارة واعجابا بسيارات البيجو بشكل عام وارجو ان تنال رضاكم واعجابكم

((( هو البيجو )))

بعد العذاب والأكتأب وكلام كتير ميهمنيش

اللى يقولك الحديد قدام سلامتك ميسويش

واللى يقولك الجديد هو الوحيد غيره مفيش

لو حتى صينى ولا كورى مدام جديد لازم يعيش

هتعيش كدة سنتين تمام اكتر من البنزين مفيش

وفرت قرشك للمدام وركنت قر تجيب حشيش

هو الجديد هو الوحيد هو الحمام هو الياميش

وأسأل وأدور يا كرام و القى البضاعة متسويش

تلاتين وكيل وكلام جميل والفعل جرب متلاقيش

يعنى السلام والاحترام أما الصيانة فى العريش

وسعات يكون طيب حنون وبألف لون واهو اكل عيش

شغلت عقلى وقلت فوق الأصلى أصلى ميتنسيش

هو البيجو واللى جابوه قالولى غيره متشتريش

لو حتى جاى مالسبعينات هو اللى فات غيره مفيش

أسد الطريق وأحسن رفيق مصنوع بذمة عشان يعيش

مع أطيب تحياتى
أخوكم /اسامة حليم / شاعر المنصورة

**Nour_Peugeot** · 31-10-2008 05:38 PM

سلم ايدك يا باشا و عيزينك تشارك معانا اكتر علشان ان شاء الله نبقي عشره

**MoDyBeNz2008** · 31-10-2008 05:40 PM

تسلم ايدك يا باشا كلام 100%

**kisho55555** · 31-10-2008 07:27 PM

يا سلام عليك يا باشا ..

انت قولت المفيد كله ...

**osamahalem** · 12-11-2008 12:52 PM

الف شكر لكم على التحية والتقدير ولو انى كنت منتظر ردود اكتر من اعضاء المنتدى جايز اكون طماع شويتين بس انا صريح واللى فى قلبى على لسانى انا شايف ان المشاركة بقصيدة تجربة جديدة على المنتدى وانا شخصيا مشفتهاش قبل كدة وتوقعت انها تنال قدر اكبر من المناقشة وليس المدح والاعجاب بالضرورة صحيح الاعضاء الكرام اللى بادروا بالردود ليهم عندى تقدير واحترام لا يوصف لكن انا كنت منتظر اكتر الا اذا كنت قد غردت خارج السرب وتحدثت بلغة الشعر فى غير موضعه واسمعته لمن لا يشتهيه فإن كانت قصيدتى لاقت منكم تقدير واعجاب ولم تعبروا عنه على صفحتى فلى عندكم حق وعتاب وان لم تكن قد نالت اعجابكم فلكم منى المعذره والاسف البالغ وشكرا لكم جميعا وما منتداكم الا انعكاسا لمجتمع لم تعد للكلمة فيه وزن ولا قدر فما بالكم بالشعر

تحية طيبة منى لكم جميعا
أخوكم / اسامه حليم / شاعر المنصورة