بطارية الماروتى كام أمبير ؟؟

**Ahmed Hamdy** · 31-10-2008 06:49 PM

يا جماعة عايز أعرف بطارية الماروتى أصلا كام أمبير ؟؟

أنا كنت شارى عربيتى مستعملة وكان فيها بطارية 40 أمبير وغيرتها من أسبوعين تقريبا بواحدة برضه 40 ..
المشكلة إن ساعات العربية بتدور من أول مرة بسهولة وساعات مش بتدور من أول مرة وبديها مارش 3 - 4 مرات على ما تدور .. بالذات الصبح أو لما تتركن فترة .. قبل تغيير البطارية الحكاية دى كانت بتحصل بس كان المارش بيضعف ومش بترضى تدور غير بالزق .. دلوقتى لما بتحصل بتدور بعد كام محاولة ..

واحد قالى كنت هات بطارية أكبر من كده كانت حتبقى أحسن ..
وواحد قالى لا ده عيب فى رداخ الكاربراتير لأنه المفروض لما تيجى تدور تدى سنة بنزين عشان تدور فكده ممكن الرداخ مش بيطلع بنزين ..

رأيكوا ايه ؟؟

**D . a .\ AYMAN** · 02-11-2008 12:40 AM

البطارية مالهاش دعوة بالموضوع ده ... وطالما بتدي مارش كويس من غير ماتنام بسرعة يبقى هية بتأدي مهمتها على أكمل وجه

القصة دي لازم تكشف عليها لأنها ممكن تكون من أسباب كتير

- البوجيهات عايزة تتغير
- الكهربا عايزة تتظبط
- التاكيهات عايزة تتظبط
- الكاربيراتير ممكن يكون مش مظبوط

عشان كده لازم تكشف عليها عند ميكانيكي كويس وهوة يقولك اللى فيها

وغالبا طالما روحت للميكانيكي وانت أصلا جايبها مستعملة يبقى تغير البوجيهات وتظبط التاكيهات والكهرباء كده على طول ... وتجرب

**Ahmed Hamdy** · 02-11-2008 09:34 AM

طيب الحمد لله إن العيب مش فى البطارية لإن أنا لسه جايبها وكنت زعلان أوى لحسن يكون العيب منها .. وعمال أقول ياريتنى كنت جبت واحدة أكبر ..

بس هى فعلا كويسة والمارش بيشتغل كويس مش بينام مع المحاولات المتكررة .. لكن ده كان بيحصل فى البطارية القديمة .. بعد مرتين تلاتة مارش يبدأ ينام ..

المارش كان باظ من حوالى شهر ورحت لكهربائى صلحه "قال انه غير طقم شربون وطقم جلب" .. وغيرت بوجيهات برضه من شهر ..

أنا شاكك فى موضوع الكاربراتير .. !!

**aratux** · 02-11-2008 11:51 AM

نصيحة ماتجيبش بطارية أكبر من المقاس بتاع عربيتك
علشان ممكن الدينامو ما يشحنش البطارية كويس

**sab3aawy** · 02-11-2008 03:41 PM

بطاريتها الأصلية 38 أمبير ساعة

**Ahmed Hamdy** · 03-11-2008 10:00 AM

شكرا يا أستاذ aratux .. أنا كنت فعلا خايف إنى اجيب بطارية أكبر عشان كده ..

طيب يا باشمهندس سبعاوى رأيك ايه فى المشكلة دى ؟؟؟

**Ahmed Hamdy** · 04-11-2008 05:56 PM

يا جماعة حد يرد على فى الموضوع ده .. رأيكوا ايه ؟؟

أو على الأقل حد يقولى على ميكانيكى متخصص بيفهم فى الماروتى ..

**waelamin123** · 04-11-2008 08:54 PM

أنا أول اما اشتريت الماروتى من غير تفكير
1-تغيير جميع السيور
2-تغييير البوجيهات+الابلتين+الكوندن سر
3-تغيير كل الفلاتر
4-تغيير الزيت
5-بنزين 92
الحمد لله زى الفل 6 أشهر وكانت زى عربيتك فى التأخير