الموضوع: ديسك واسطوانه وشويه اسئله ساعدونى

المشاركة الأصلية كتبت بواسطة Ahmed adel 23

السلام عليكم ورحمه الله وبركاته
اولا كنت كتبت الموضوع قبل كده ومحدش رد واستاذ فادى قالى ان الصيغه وحشه ومحدش فهم فهعيدو تانى باعاده الصيغه
اول حاجه هى المشاكل اللى بتواجهنى
1- السحب قل وصوت الماتور بقى يعلى على اربى ام 2 ونص والغيار بقيت انقلو بدرى اوى علشان الماتور صوتو ميعلاش
2 فى ريحه وحشه فى العادم اعتقد بنزين نىء بس لونو مغيرش

الاختبارات
1- روحت لواحد فى صقر اسمو سعيد فطلع معايا جرب العربيه وقالى عاوزة طقم دبرياج والرشاش العمومى ده بالنسبه للمشكله الاساسيه وقالى على مشكله فرعيه وهى ان الفرامل محتاجه سيرفو .
2- قولت اتاكد فروحت لمحمد عبد الراضى فى صقر وطلع جرب معايا وقالى محتاجين ديسك واسطوانه فقط لا غير
....
سالت عالاسعار
1- طقم دبرياج يبداء من 600 الى 1000 وابو 1000 هو اسمو لوك
2- الرشاش استيراد ب 350
3- السيرفو استيراد ب 300 (مشكله فرعيه)
الاسئله
1- اصدق مين فيهم يعنى هل انا فعلا محتاج رشاش وطقم دبرياج ولا طقم دبرياج بس بناء على المشاكل اللى قولتلها

اهم حاجه تبدا بيها الديسك والاسطوانه . لوك ب1050 من امريكان ستارز ماتجيبش غير من عنده , مضمون ..

2- السيرفو ممكن يخلى لمبه ال ابى اس تنور وتطفى بمزاجها لو هو بايظ ز ولا ممكن بسبب التيل ولا ايه

لا مالوش دعوه..السيرفو في اول تلفه بتشم ريحه بنزين نيء من الشكمان + اهتزاز في الموتور ع السلانسيه نتيجه لخبطه في فاكيوم الموتور (بيدخل الموتور هواء زياده للموتور لان السيرفو مش محكم) ولما السيرفو يجيب اخره هتلاقي دواسه الفرامل تقيله والفرامل تحسها ضعيفه

3- تعتقدو المصنعيه فى رنج كام علشان اعمل حسابى

علي حسب الصنايعي وورشه ولا مركز ومشهور ولا مغمور والاشتغالات دي..انا باسمع اسعار غريبه في اقاهره . واحد زميلنا غيرهم ب400ج انما عدل ربنا 180ج لو مش هيرفع الموتور

4-اشترى جديد طقم الدبرياج ولا استيراد وانهى نوع

جديد طبعاااا ولوك زي ماقولتلك

5- دة اسئله برا الموضوع .... هو احنا عندنا فلتر تكيف وفلتر هواء ولا الاتنين واحد وبيتغيرو امتى ,,, سير الكاتينه هو هو سير مجموعه ولا ده حاجه وده حاجه وكل واحد فيهم بيغير امتى

فلتر الهوا هتلاقيه في العبه السوداء شمال الموتور اما فلتر التكييف (الورق) فتحت التوربيدو (المساحات) وبيتغيروا لما تحس انهم خلاص ..سير الكاتينه بياخد حركه بكره الكرنك ينقلها لبكره عامود الكامات وفي السكه بيدور طرمبه الميه والزيت _ اما سير المجموعه فبيدور الدينامو واباور والتكييف وتغييرهم كل 40 الف كم

6- انا الشهر اللى فات العربيه فصلت بنزين يعتبر مرتين فهل ده ممكن يبقى سبب فى المشكله الاساسيه ولا

لا مالوش دعوه بس يفضل مايقلش منسوب البنزين عن التلت في التانك علشان تحافظ علي طرمبه اللبنزين

انا اسف للاطاله وارجو اجابه اسئلتى كلها لانى مشتت جدا ومحتاجلكو
معلش على الموضوع اللى فات الغير مرتب وشكراااااااااااااااااااا نسيت العربيه فيكترا 97 مانيوال الماتور الاسود وكنت مغير بوجيهات وسلك البوجيهات من حوالى شهرين تلاته كده

المشاركة الأصلية كتبت بواسطة ahmed adel 23

فادى باشا انا متشكر جدا جداااا
انا روحت النهاردة لمحمد عبد الراضى وجبتلو الديسك والاسطوانه لوك وهو ابتدى يشتغل وخلص. الديسك والاسطوانه وبعدها قالى المكنه عندك مش متظبطه دة عيب سيرفو فجابلى واحد استيراد من عندة وركبهولى وبعدين طلعنا نجرب
وبعدين اخدت العربيه ومشيت المهم لاحظت الاتى
1~ الدبرياج بقى طرى اوى مش ناشف بس قالى دة طبيعى
طبيعي وده الاصل في الاحساس بالدبرياج
2~ صوت الماتور اعتقد انو لسه عالى شويه
ممكن تكون مشكله تانيه. اخبار السحب ايه؟
3~ لسه بحس وانا ساند رجلى عالدبرياج ان فى زى دبدبه كدة مش عارف دى من ايه
ماتسندش ع الدبرياج رجلك وانت ماشي..الدبدبه لو في الطلعه بس ممكن تكون من ترس الفولام. هو مكشفش عليه قبل مايركب الديسك والاسطوانه؟؟ حاله الاسطوانه اللي طالعه ايه؟ تاكل فقط ولا فيها رفه؟ الموتور عامل كام كيلو متر؟
4~ الفرامل لما بدوس عليها بسمع صوت كدة كانو تفريغ هوا من ناحيه الدواسه وحاسسها بقت انشف من الاول وشدت شويه بس عالبطىء مش عجبانى اوى ) لسه تحت التجربه تانى(
مشاكل فرعيه
صوت ( فسسسسس) طبيعي جدا ماتقلقش
1~ سالتو على ريحه العادم قالى تمام
2~ لمبه ال اى بى اس كانت بتنور وتطفى بمزاجها فقفلهالى بالجهاز وبعدين واحنا بنجرب نورت تانى فحطها عالجهاز وجربنا تانى ففضلت مطفيه منورتش وبقيت حاسس الابى اس بيشتغل مع كل فرمله بس برضو حاسس ان فى حاجه غلط فى الدواسه
المصنعيات
حاسبنى على السيرفو ب 400 ومصنعيات 400 تغير سيرفو وديسك واسطوانه
ارجو التعليق بالرأى هل كدة تمام ولا فى حاجه غلط
هل صوت الماتور دة بيتهيالى ولا ممكن يكون ليه سبب غير الديسك والاسطوانه
هل السيرفو اللى ركبو دة بايظ علشان كدة فى صوت تفريغ هوا والدواسه بقت انشف ?
ارجوكو ساعدونى
واسف للاطاله

السيرفو لو بايظ هتلاقي الموتور بيرعش ع السلانسيه. والفرامل ناشفه .

الومك في حاجه بس نبهنا ليها كتيرررر. ماينفعش تشتري قطع غيار من ميكانيكي . سيب العربيه واقفه واشتري من تاجر الاستيراد. لان اللي اشتريته ده ( خلع) من عربيه زبون تاني وهكذا..
السيرفو مايزيدش عن 300ج ..
المصنعيه معقوله ..بس قولي هو رفع الموتور ع الونش ولا نزل الفتيس ع الارض واشتغل من الجنب؟؟

المشاركة الأصلية كتبت بواسطة ahmed adel 23

رفع الماتور اه علشان يغير
استاذ فادى هو صوت العربيه لسه عالى شويه مممن يكون دة من ايه ةبحس بدبدبه فى رجلى وانا ساندها عالدبرياج دة ممكن من ايه
والفرامل فعلا بحسها نشفت اوى وبسمع صوت تفريغ هوا لما بدوس فرامل
دة طبيعى ولا
ارجو الرد

سيدي الفاضل..
المنتدي هنا هدفه الاساسي نشر الوعي وثقافه العلم بالشيء ولا الجهل به . مشكلات خاصه بالسيارات وقطع الغيار والتعامل مع الصنايعيه وده اللي اقصده..

صوت الموتور والدبدبه وخلافه .دي اعراض خاصه لازم تتسمع وتتجرب, ماينفعش انها تتوصف كده سماعي وتاخد الروشته . فين السيرفو بتاعك؟؟معاك ولا هو اخده؟ ارجع له تاني قوله العربيه مش مريحاني , ويطلع يجرب معاك.تبقي دافع 900ج وخلاص كده وتروح لحد تاني وتالت..ماينفعش.