الموضوع: سوزوكي سوبر كاري و نصائح للمهتمين

الحمد لله ربنا كرمني و جبت عربية سوزوكي فان (سوبر كاري)
السبب كان مشاكل في الشغل و العقد بتاعي هيخلص و طبعا مفيش تجديدات و مكانش قدامي غير الحل ده

بس عامة هو كمشروع لأي شاب كويس جدااااا و عملي

نيجي للمهم
العربية سعرها عامل 68000 موديل 2015
طبعا أنا جايبها قسط
دافع 27000 (حوالي 40%) و الباقي على 3 سنين بمعدل قسط 1500 شهريا
تبع بنك أبو ظبي الإسلامي (هو بيتعامل معاها كإنها مشروع شباب الخريجين )
الأوراق المطلوبة
1- صورة بطاقة ليك و صورة بطاقة للضامن(اي حد موظف أو غير موظف مش مهم)
2- صورة رخصة القيادة بتاعتك (خاصة أو مهنية)
3- ايصال نور او غاز باسمك (لو مأجر يبقى عقد الايجار عليه اثبات تاريخ + وصل نور او غاز لصاحب الشقة)
4- عرض سعر من المعرض بسعر العربية (البنك بيقولك هو بيتعامل مع انهي معرض في المنطقة بتاعتك )
5- 50جنيه مصاريف استعلام
بتقدم كل الورق ده للبنك و في خلال اسبوعين (البنك اجراءاته بطيئة حبتين) بيكونمعاك الموفقة و المعرض يشتريلك العربية
طبعا بيبقى فيه مصاريف إدارية في حدود 950 جنيه + وثيقة تأمين ع العربية في حدود 3000 جنيه
غير مصاريف الترخيص في حدود 800 جنيه لأول مرة من غير اكراميات

المهم بعد معاناة استلمت العربية و بدأت رحلة الشغل
اهم حاجة طبعا انك تقرأ كتالوج العربية
عشان ع الاقل تعرف انت هتعمل صياناتك امتى (طبعا انسى موضوع انك تروح التوكيل) انا من اسماعيلية و مشواااااااااااااااار لحد التوكيل

للمهتمين
فيه كام حاجة لازم تتعمل في العربية منها حاجات مهمة جدااااا ولازم قبل ما تمشي بيها تتعمل
1- اهم حاجة لازم تعمل فرش جلد للعربية بالكامل فيه نوع نضيف بيكلف 300 جنيه بالمصنعية (3 متر جلد + متر تجليد ) و بتختار اللون اللى انت عايزة.
2- الكراسي بتاعت العربية كلها قلاب لازم تركب لها جلد على الحديد بتاعها عشان ما تطبقش الصاج مع الالرفع و التنزيل و اوزان الركاب
دول أهم حاجتين لازم يتعملوا قبل ما تمشي بالعربية
فيه شوية حاجات تانية بقى على حسب ظروفك
1- العربية مش بتاعت غرز إلا في أضيق أضيق الحدود (خلى بالك جداااااااا و انت سايق )عشان من أقل حاجة ممكن تلاقي العربية نايمة على جنبها و عشان جدا بتركب جنوط مقاس 175/70-65 R13 u ده احسن مقاس عايز بقى تزود انت و دماغك.
2- كاتيرات بلاستيك للأربع رفارف الواحد 60 جنيه من غير التركيب.
3- عتب للأبواب الجانبية عشان الناس تعرف تركب عشان العربية عالية.
4- ممكن تركب حتة خشب كونتر بطول العربية عشان الكراسي ما تعلمش في الصاج او فيه جلد نفس السمك بتاع الخشب (بس انا لسه معملتش كده و معرفش الجلد ده بيتباع فين.
5- فيه ناس بتحط خوصة حديد تحت البلية بتاعت الباب الجرار عشان البلية بتاكل الصاج
6- خوصة حديد بعرض العربية تركب عليها مفصلات الكراسي عشان الحمل ممكن يخرم صاج العربية
7-ممكن تركب ديفيندر أمامي و خلفي للأمان لأن أقل خبطة هتلاقي العربية اللى خبطتك قاعدة جنبك ع الكرسي (وربنا يستر طريقنا)
8- فرش للكراسي (هو عامة الفرش الأصلي جلد ممكن تمشي بيه نفسك
9- سوست ورق خلفية للتقوية (عشان الأحمال الزيادة)
ده يعتبر أهم متطلبات العربية ولو انالحاجات دي مش مهمة أوي زي فرش الأرضية

نيجي بقى لركوب العربية
العربية أول ما ركبتها في المعرض مكنتش عارف اسوقها بس في ظرف 2 متر هتلاقي نفسك اتعودت عليها ولا كإنك راكب عجلة
سواقتها بسييييييييطة جدااااااااااا
مفيش كبود مفيش شنطة
المرايات تحفة و كاشفة الطريق كله
الأنوار إلى حد ما كويسة داخل المدينة
طبعا العربية مفيهاش أي كماليات خااااااااااالص
مفيش أي وسائل أمان اللهم إلا الحزام فقط

المميزات
1- العربية جراية لو فاضية (و هتجيب معاك لحد 80-90 ) انا مبزودش عن كده لأني بخاف أجري بيها و كمان انا لسه مغيرتش الجنوط
2- العربية بالطول واسعة يعني فيه مكان كويس لرجليك لو قاعد في الكرسي الاوسط او الخلفي
3- استهلاك البنزين معقول جدا حوالي 10.43 كيلو/لتر (لاحظ ان العربية بتكون محملة)
4- بتخش في أي حتة مهما كانت ضيقة و سهلة جدا في الركن و التحكم فيها


العيوب
1- خفيفة جدااااااااااااا و بتتقلب بسهولة
2- مش بتاعت غرز (بس ممكن تشد عادي) بس غرز لأ
3- أقل عوجة في الأسفلت بتحس بيها لأنها سوست ورق و ربنا يكون في عون الناس اللى في الكنبة الخلفية
4- الأبواب لازم تترزع عشان تقفل كويس
5- ضيقة جدا في العرض 135 سم بسس
6- لو عاوز تسافر بيهاتخلي بالك لأن اي عربية هتعديك الهوا بتعاها هيلعب بعربيتك زي الورقة بالضبط

تقريبا ده كل حاجة انا مريت بيها لحد دلوقتي
انا عامل بيها لحد دلوقتي 1750 كيلو تقريبا و المفروض اني هغير زيت بكره بإذن الله للموتور و الفتيس
لأنهم كاتبين في الكتالوج لازم الاتنين يتغيروا في أول 1000 كيلو عشان لو فيه رايش
ع العموم انا هحاول اقولكم على كل المستجدات للعربية اولا بأول
انا عارف ان ملاك العربية في المنتدي ممكن لا يتجاوزوا عدد اصابع اليد الواحدة
بس حتى الآن العربية كويسة و ربنا يستر من اللى جاي