الحمد لله جبت عربيه اوبل فيكترا 97 وكنت عايز استفسر عن شويه حاجات

**geniusman1** · 08-12-2014 02:21 PM

الحمد لله ربنا وفقنى واشتريت عربية اوبل فيكترا 97 1600 سى سى وكنت عايز اسال الاعضاء المحترمين علشان يفيدونا بخبرتهم ايه احسن محل قطع غيار اجيب منه واحسن ميكانيكى وعفشجى اتعامل معاه ؟؟؟
عموما انا من منيا القمح بس لو فى حد فى القاهرة او بنها او الزقازيق او طنطا يبقى كويس وطبعا انا مش هروحله كل يوم بس عايز واحد ثقة والاعضاء جربوه
وياريت تكون اسعاره كويسه ؟؟؟

الحاجة التانية ايه اللى غيره دلوقتى ؟؟؟؟
وشكرا مسبقا

**فادى محمد** · 08-12-2014 02:33 PM

مبروك. عربيه تستاهل ..
هتغير سير كاتينه وسير دينامو وما يلزم من بلي .
فلتر بنزين وبوجيهات
زيت ولتر زيت .
ميه الرادياتير

ده المهم . وهتجيب نوته صغيره تحطها معاك في العربيه تكتب فيها السيرفيس ده عملته والعربيه عامله كام كيلو متر؟؟ علشان تعرف ميعاد الصيانه الجايه..

في حجات مهمه بس تتغير حسب حالتها زي تيل الفرامل والكاوتش

لو المنصوره قريبه العربيه دي قطع غيارها منتشره هناك جداا المصريه والبحقيري وغيرهم في الحسينيه
ولو في القاهره امريكان ستارز او حموده خلف دار القضاء العالي

**geniusman1** · 09-12-2014 10:37 AM

المشاركة الأصلية كتبت بواسطة safwat1100

بص يا سيدى قطع الغيار يا اما زى ما استاذ فادى قال او حتروح الحرفيين
بالنسبه للميكانيكى فى واحد ف بنها عند الموقف الجديد اسمه صابر واد محترم جدا وبيفهم و مصنعيته معقوله
هو ليه ورشه جديده ف الحرفيين غير بتاعت بنها ف ممكن تلاقى اخوه احمد هناك و هو كمان شاطر
و دى نمرة صابر 01012073097

تسلم ياباشا يعنى صابر ده انت جربته قبل كده وبيفهم ولا ايه
وبالنسبة للعفشجى ممكن تقولى مكانه برضه

**midozx** · 10-12-2014 04:24 PM

خليك فى المنصوره
عندك قطع غيار اولاد موافى فى الحسنيه جديد
وعندك استيراد وليد حماد عبد السلام عارف
وفى سمنود واحد اسمه عبوده استيراد بس اسعار فى الجون
ميكانيكى فيه شكرى فى شارع عبد السلام عارف وراء سوق الجمله للخضار
وسعيد عند مساكن العبور
وعفشه عيد عند ترب المسحيين تخش من عند توكيل منصور فى شارع عبد السلام عارف ناحيه صور الامن المركزى
وكهرباء ابراهيم تاج جنب ورشه سعيد فى مساكن العبور
خد بالك فى عمرو عفشة جنبهم بس اسمع انه غالى

**safwat1100** · 11-12-2014 03:07 AM

المشاركة الأصلية كتبت بواسطة geniusman1

تسلم ياباشا يعنى صابر ده انت جربته قبل كده وبيفهم ولا ايه
وبالنسبة للعفشجى ممكن تقولى مكانه برضه

ايوه يا معلم هو الميكانيكى بتاعى اصلا واد محترم اوى و بيفهم و كان شغال اصلا ف التوكيل
بالنسبه للعفشه انا معملتش حاجه كبيره عنده انا غيرت بطاحات بس و كان بيربط العفشه كل ما اقوله
ف مقدرش احكم عليه اوى ف العفشه

**geniusman1** · 11-12-2014 02:09 PM

المشاركة الأصلية كتبت بواسطة safwat1100

ايوه يا معلم هو الميكانيكى بتاعى اصلا واد محترم اوى و بيفهم و كان شغال اصلا ف التوكيل
بالنسبه للعفشه انا معملتش حاجه كبيره عنده انا غيرت بطاحات بس و كان بيربط العفشه كل ما اقوله
ف مقدرش احكم عليه اوى ف العفشه

طيب هوا مكانه فين بالظبط عند الموقف الجديد

**safwat1100** · 13-12-2014 02:08 AM

بص يا باشا حتخلى الموقف على يمينك و النيل وراك و حتدخل الشارع بتاع الموقف و تكمل على طول لحد ما تلاقى قاعة افراح على الشمال ماسكة ناصيه
حتخش ف الشمال ده و 50 متر حتلاقى الورشه على شمالك
هو شغال من 11 الصبح لحد 8 بالليل ما عدا الجمعه