الموضوع: مشكله فى رشاشات السيريون 2009

السلام عليكم .. يا ريت حد يساعدنى ضرورى
انا عربيتى سيريون 2009 1300 سى سى أتوماتيك

من كام شهر كنت مسافره بالعربيه وكان الطريق مكسر وبعد ما وصلت لقيت تنك البنزين بينقط طلع ان التنك اتخرم كذا خرم وتنك البنزين طلع مصدى جامد وقالولى انى اكيد حطيط بنزين مغشوش لدرجه انه عمل صدأ فى التنك وسألت فى التوكيل كان سعره 3000 جنيه ومش موجود أصلا وكنت هستنى ييجى من اليابان بعد شهرين وسألت عليه فى الحرفيين ولقيت واحد استيراد وركبته بره التوكيل ....

بدأ يظهر فى العربيه رجه بسيطه بتظهر لما بهدى السرعه كأنها عربيه مانويل وبهدى وانا على غيار عالى
بصراحه كانت بتروح وتيجى ومش بتظهر كتير فأستنيت وانا رايحه التوكيل اعمل صيانه هما يكشفوا عليها..
من كام يوم رحت التوكيل في العبور اعمل صيانه ال 40 ألف وقلتلهم على الرجه ومظهرتش معاهم قبل عمل الصيانه والمهندس قالى بعد ما غيروا البوجيهات ونضفوا البوابات ظهر العيب وكان لازم اسيب العربيه علشان كانوا شاكين فى الكهرباء أو في الرشاشات وأنا مكنش هينفع أرجع من غير عربية وكده كده العيب مكنتش جامد .. وأنا ماشية بالعربية لقيت الرجه جامدة جدا مش زي قبل الصيانة و شوية ولقيت صوت تكسر في العربية جامد وقفت لقيت السير اللي هما لسة مغيرينه اتقطع ومش عارفاه فيه حاجة تانية حصلت وإيه صوت التكسير ده .. طبعا اتخانقت معاهم وكنت عاوزاهم يبعتولي ونش ياخد العربية وهم مرضيوش ساعتها .. قالولي بعد ماعملت مشكلة إن الونش كان بيجيب عربية تانية المهم رجعتها تاني مركز الصيانة بس كان الوقت بليل رحت تاني يوم الصبح وعادوا على كل الصيانة تاني وقالي إن السير هو اللي اتقطع وإن الحمدلله محصلش حاجة في الموتور.. وقلتلهم على الرجة إن هي مش زي ماكنت جايبها أنا بصراحة كنت خايفة يطلع فيه حاجة تانية حصلت غلط في الصيانة .. بعد يومين ردوا عليا إن العيب طلع في الاربع رشاشات كانوا عارفين موضوع تنك البنزين قالولي الرشاشات بتنزل صدأ بودرة ..
أنا كنت مستغربة إزاي ترومبه البنزين ماباظتش من البنزين المغشوش وإزاي الصدأ عدى من الفلتر ..
وكل ماأسأل ميكانيكي يقولي إن الرشاشات مش بتبوظ وهما فعلا في التوكيل قالولي إن هي حالة نادرة جدا ..

ياريت حد يساعدني لإن سعر الرشاشات غالية جدا والعربية مش هينفع أمشي بيها كده لإن البوابات بتنزل بنزين على البوجيهات ..هو لازم أغير الرشاشات؟؟ .. لإن خايفة أغيرها ويطلع فيه عيب تاني .. والسير اللي اتقطع ممكن يعمل مشكلة في الموتور واتأكد إزاي قبل ماأستلم العربية من عندهم إن مفيش مشكله تانية في العربية

أنا بصراحة ماخدتش بالي قوي من استهلاك البنزين لإن مش بمشي بيها كتير .. بس rpm كان عالي كان بيوصل 3 وأنا على سرعة عادية 40 أو 50 كم