مشكلة بتقابلني كل ما اركب تاكسي ابيض خاصة في المسافات الطويلة
ببص الاقي العداد بعد 10 كيلو مثلا عمل 22 جنيه
او 20 كيلو بلاقيه عمل 40 جنيه
يعني بيحسب الكيلو ب 2 جنيه وش
و لما اتكلم مع السواق و اقوله العداد دا بايظ يا اسطى
يقولي بكل عصبية ( انت اول واحد تركب معايا و تقولي كدا )
ارجع و احسبهاله واحدة واحدة عشان يعرف اني مش هندي و عارف تسعيرة التاكسي كويس
الاقيه راح متنرفز و طافي العداد و يقولي يا باشا ادفع اللي تدفعه
و مرة كنت راكب من المعادي و رايح مدينة نصر
التاكسي عمل حوالي 21 كيلو و التسعيرة 45 جنيه
عملت خناقة مع السواق عشان بردو مقتنع انه صح
تعريفة التاكسي الابيض
الكيلو الاولاني سعره 3 جنيه ( فتحة باب التاكسي يعني )
ابتداء من الكيلو التاني سعر الكيلو 140 قرش
و دقيقة الانتظار ب 28 قرش
و تقدر تلاحظها ازاي ( عداد الكيلو مترات بيعد كل 100 متر ) و مع كل 100 متر مفروض يزيد 14 قرش
في عدادات بتلاقيها بتزيد بال 25 قرش مرة واحدة .. او 28 قرش
يعني خانة السعر لازم تقلب ب 14 قرش و مضاعفاتها ,, غير كدا يبقى العداد ملعوب فيه
طبعا السواق او صاحب العربية ايهما بيبقى لاعب في العداد و مشغله على حاجة اسمها ( التعريفة السياحية) او ممكن يكون مشغل تعريفة الليل بالنهار
او ممكن يكون ظابط عدد اللفات على 800 متر او 700 متر على انها كيلو متر
او يلعب في عداد دقايق الانتظار
و فجأة تلاقي العداد نط منك لرقم انت مش متوقعه
اللي بيركب مسافات قصيرة او مش بيركب تاكسيات باستمرار مش هيحس باللي بقول عليه
او من الآخر مش هتفرق معاه
لكن لو ماشي مشوار طويل ( اكتر من 10 كيلو مثلا ) هتلاقي الفرق بقى واضح
و في سواقين بيستهبلوا و يقولولك الكيلو ب 150 قرش
هي 10 قروش ممكن ما تفرقش
بس اسيبها بمزاجي مش احس ان حد بيسرقني
و المشكلة الاكبر ان مفيش رقابة على الناس دي
ايه الحل في وجهة نظركم ؟
المفضلات