الموضوع: حرامية التاكسي الابيض - وسرقة الركاب

في application اسمه البنديرة

نزله واول ما تركب التاكسي شغله وهو هيحسب المبلغ المطلوب


https://play.google.com/store/apps/d....bondera.views

الحمد لله عندنا فى المحلة التاكسى بيجيب من الاخر .. السرقه وش كده .. من غير عداد !! هوه عاوز يسرقنى هايلزقها فى العداد ليه ؟؟

في المحروسه

لا نافع تسوق عربيتك الخاصه و الا استحمل بقه حرقه دم و اعصاب بسبب الحمير التانيه اللي بتسوق و الوقفه في الاشارات و الزحمه و العربيه لما تتهبد في المطبات و لا تلاقي كوبري بيقع عليك و لا حادثه قدامك ... الخ

و لا نافع تركب تاكسي و الا هتتسرق عيني عينك و متقدرش تتكلم و هتتدفع في الاخر اتقاءا لشر سواق التاكسي اللي اكيد هيبقي بلطجي و لا بودرجي و لا سوابق و رد سجون

و لا نافع نمشي عشان البلد كبيره بسم الله ما شاء الله و في نفس الوقت مزنوقين في 7.5 % من مساحتها

بلاش نجيب سيره الموتوسيكلات و لا المترو و لا الميكروباصات احسن :)))

المشاركة الأصلية كتبت بواسطة abdulkhaleq

شوف ياسيدي
لو انت عارف مشوارك وعارف بياخد كام قشطه

لو شاكك ارمي عينك على اقصى اليسار رقم صغير قوي جمبيه سهم
لو 2 يبقى راجل أمين
لو 3 يبقى مشغله سياحه

لو مشوار أول مره تروحه احسب الكيلوات والطريق على جوجل مابس
طبعا ماتحسبهاش بالورقه والقلم عشان على الأرض الموضوع فعلا بيفرق
يعني لو حسبتها عالخريطه وطلعت مثلا 25 جنيه وفي الحقيقه العداد عمل 30, 31, 32 جنيه قشطه

انما لو حسبتها عالخريطه طلعت 25 جنيه وفي الحقيقه لقيته عامل حاجه واربعين يبقى حرامي طبعا!

تاني يوم العيد رحت مشوار مايكملش 3 كيلو لقيت العداد عامل 12 جنيه
في مشوار والله ما كمل 3 دقائق! الشارع مكانش فيه غيرنا

بس عايز اقولك حاجه
اوعى تحرق دمك
اللي بيسرقك ده عارف انه مش هيشوفك تاني
هو بس بياخد اكتر حاجه يقدر ياخدها من كل زبون بيركب معاه

انت عارف القيمه ماتديلوش غيرها واكرمه كمان بزياده
انما يسرقك لأ

انا عارف الرقم اللي قصدك عليه

و فعلا بلاقيه في معظم التاكسيات على رقم 2 مش 3

بس الغريبة ان في عدادات بتنط فجأة و عدادات ماشية بالمعقول

و اللي اكتشفته ان اللعب اكتر في العداد ابو حصان ( الاخضر ) ـ

انما التاني الاحمر ( جاو ) دا من الصعب اللعب فيه او نادرا ما لقيته مش مضبوط

و المشكلة ان كل سواق بيبقى طالع بالعداد بتاعه السماء و بيقولك ( العداد بتاعي ماشي مسطرة ) ـ

و اللي تلاحظه كمان ان السواقين معظمهم مش معاهم فكة

يعني لو العداد بتاعك عامل 17 جنيه مثلا .. تديله 20 يقولك معاييش فكة

فاتضطر تسيب له ال 3جنيه

و لو انت عدادك عامل 15.25 جنيه مثلا ... و اديت له 15 .. يقولك لسه عندك باقي و ما يمشيش الا ما ياخد حقه و بزيادة

المشاركة الأصلية كتبت بواسطة misry

في application اسمه البنديرة

نزله واول ما تركب التاكسي شغله وهو هيحسب المبلغ المطلوب


https://play.google.com/store/apps/d....bondera.views

نزلته و شغلته امبارح بس المشكلة ان اشارة ال gps في مصر عندنا تعبانة و بتفصل كل شوية

المشاركة الأصلية كتبت بواسطة بحار

الحمد لله عندنا فى المحلة التاكسى بيجيب من الاخر .. السرقه وش كده .. من غير عداد !! هوه عاوز يسرقنى هايلزقها فى العداد ليه ؟؟

في شبين الكوم عندنا فتحة باب التاكسي ب 5 جنيه

يعني اغلى من التاكسي الابيض

و الكلام دا من قبل زيادة اسعار البنزين الاخيرة بشهور

و لو مش عاجبك اركب توك توك