بيجو 301 ولا شارك الفئه التانيه وكيل

**mhmd_farouq** · 12-12-2014 07:33 AM

المشاركة الأصلية كتبت بواسطة m.nasr

ممكن لو سمحتو اللي يرد يقول من وجهة نظره احسن من ناحية ايه؟
شكرا ومتابع

الشارك عفشه اقوى موتور اقوى عاليه عن الارض،، ثباتها جبااار، اعتماديه جدااااا، مع ظهور مشاكل ال ٣٠١ ، يعيب الشارك بس العزل وحش وشنطتها ضيقه غير كده فهي الاحسن في فئتها، ده غير الشكل الهجومي الجميل بتاع الشارك مع ان البيجو شكلها حلو بس الشارك شبابي اكتر

**eng.sherif** · 12-12-2014 07:52 PM

هى ايه العيوب والمشاكل فى 301

**tarekmomo** · 12-12-2014 08:55 PM

جضرتك الشارك فئه اعلى من ال301 ماينفعش تقارنهم ببعض

**ابو هنا** · 13-12-2014 12:05 AM

المشاركة الأصلية كتبت بواسطة eng.sherif

هى ايه العيوب والمشاكل فى 301

- اولا علشان مطولش عليك لو معاك ثمن الشارك تاني فئة توكل على الله على طول واشتريها ، هي الاختيار الاصوب في هذه المقارنة مش لاي عيب في البيجو 301 ولكن علشان متخرجش عن المالوف والمعتاد وقواعد السوق المصري .
- اما بخصوص سؤال حضرتك بان هى ايه العيوب والمشاكل فى البيجو 301 ؟
فانا زي حضرتك مستني اجابة السادة الزملاء على هذا السؤال بس ياريت يكون عن تجربة حقيقية مش مجرد سماع كلام وخلاص مثل ( أوعى - اياك ) ،
- اما بخصوص الزميل الفاضل الي بيقول انه رجع البيجو 301 بعد 10 كم وخسر فيها 2000 جنيه ،
مع ان حضرتك سألته رجعتها ليه ومرضش عليك ، فاحب اقول ان دة لايمسل الا راية الشخصي ، وان في زميل اخر اشترى مازدا 3 موديل 2015 بسعر 217 الف جنيه وبعها بعد 16 يوم وخسر فيها 15 الف جنيه
http://www.nilemotors.net/Nile/436717-3-2015-a.html
- اما موضوع تصنيف السيارات فئات ، فانا شايف ان دة كلام غير عملى ، اي واحد فينا معاه مبلغ معين بيحاول على اد ميقدر يضور ايه ممكن يشتريه بهذا المبلغ بغض النظر عن التصنيف الفئوي ، وان التصنيف السليم هو ( سيدان - كروس اوفر - suv ) .
طيب انا حابب اسئل سؤال هي كانت فيت الشارك من 2008 ؟
وياريت يوضحولنا اية الي كان بيت قال عليها اول منزلت ؟
وايه سبب انها حققت اعلى مبيعات ليها في عام 2014 من اول منزلت مصر في 2008 ؟
- يافندم احنا في سوق غريب لا يحكمه الا الشائعات والكلام المرسل ،
تيجي مثلا عن اللانسر البومة يقولك احسن موديل فيها 2007 ، طب ياسيدي ليه متعرفش هو كدة وخلاص
تيجي مثلا عن التويوتا الدبة موديل 2003 اول منزلت يقولك عربية فشلة - عوامة - بتنط - خفيفة - ورق
تعلى دلوقتي اتفرج عليها بتتباع مستعملة بسعرها لما كانت زيرو ده لو لقيتها .
- يا فندم انا مش بقولك ان البيجو 301 احسن من الانسر الشارك
- انا نفسي ارسخ فكرة ان كل واحد يشتري السيارة الي نفسه فيها من غير ميشغل باله بكلام الناس ، اشتري السيارة الي حتكون حببها ومستمتع بيها وانت راكبها حتى لو كانت صيني ، لان مفيش سيارة حتعطيك كل شئ
واسف على الاطالة وتقبلم مروري .

**wella3330** · 15-12-2014 07:16 AM

انا في نفس حيرتك بس بفاضل بين شارك فئة تانية و 301 هاي لاين
و احب اقولك اللي وصلت له بعد تجربة قيادة للاتنين يمكن يفيدك و نقرر احنا الاتنين ساعتها و هقولك بموضوعية كل واحدة ما لها و ما عليها من غير تعصب (لانه ما ينفعش اقولك هات دي او دي و خلاص لازم اسباب) .

شارك 2015:

مميزات

خارجيا شكها هجومي و جذاب و بالرغم انها نفسها من 2008 الا انها مازات ملفته للانظار.

داخليا فقيرة شوية في الخامات و التقفيل و الاوبشن (بتكلم علي فئة تانية وكيل).

موتور قوي 117 hp مع ناقل اربع سرعات عادي مش ستيب ترونك بس تسارعها جيد خصوصا بعد 80 كم/س.

تكييف ياباني مش هقول اكتر من كده.

صالون واسع و مريح.

عفشة خلفية multi link محترمة جدا و ده سر ثابتها و ان كانت علي حساب الراحة لانها عفشة رياضية.

عيوب

شنطة هي الاصغر في فائتها.

صوت الموتور مسموع و عالي نسبيا و ده يرجع للعزل المتواضع للمقصورة بالاضافة ان صوت موتوها mivec هو موتور رياضي .

صوت احتكاك الاطارات مسموع داخل المقصورة ( يقال انها بتنتهي مع تغيير نوع الكاوتش ).

باور تقيل نسبيا لانه هيدروليك.

قطع غيار غالية بالنسبة ل 301 , (يعني الكوبلن ب 5000 في التوكيل و مش موجود و فانوس امامي معدي 2000 و اكصدام امامي برضه كاسر ال 2000 !! (و جروب الشارك علي الفيس هيفيدك في موضوع قطع الغيار داخل و خارج التوكيل)

بيجو 301:

مميزات

شكل جديد و هجومي.

موتور 115 hp مع ناقل من اربع سرعات ستيب ترونك و تسارعه مرضي جدا بعد 60 كم/س.

داخليا الهاي لاين اشيك و افضل في التقفيل من الشارك.

كماليات كتير مقابل الشارك اللي بتنزل متنفضة.

صالون واسع طوليا و لكن عرضيا الشارك اوسع.

اسعار قطع الغيار داخل التوكيل معقولة جدا بالنسبة لعربية اوروبي و طبعا اقل بفرق ملحوظ عن الشارك.

شنطة حجمها جيد.

مكيف جيد لان الكمبريسور ياباني.

باور خفيف جدا ( كهربائي).

صاج خارجي اتقل من الشارك.

عيوب

اعتمادية الفرنساوي لا تقارن بالياباني ,اقل طبعا و ان كانت البيجو افضل الفرنساوي في مصر كسمعة الا ان العربية لسه جديدة في السوق و مع الوقت هيبان مدي اعتماديتها بعكس الشارك اللي اتهرست في السوق من 2008.

عفشة خلفية عادية Torsion beam و طبعا مش هتاخد منها نفس ثبات الشارك لكنها مريحة اكتر.

الموتور حساس جدا لنوع البنزين .

نتشة الفتيس بين الاول و التاني و ان كانت مش عيب لكنها محسوسة ( و يقال انها قلت بشكل ملحوظ بعد السوفت وير الجديد).

التكييف بيقولوا بياثر علي السحب و لكن للامانة انها سوقتها و كنت مشغل التكييف و الصيف في الخليج لا يقارن بمصر و لم اشعر باي مشكة في سحب العربية (و يقال انها اختفت بعد السوفت وير الجديد).

دي خلاصة اللي وصلت لها حتي الان وفي النهاية انت اللي هتركب يعني لازم تسوق الاتنين و انت وحدك اللي تقرر تجيب ايه .

تحياتي