الموضوع: (بالصور) تقرير عن رحلة صيد بحرية بالعين السخنة (بورتو السخنة)

تقرير جميل و فعلا يوم طلعه الصيد رغم انه متعب انما بترجع نفسك صافيه و ذهنك رايق

و بعدين تيجى السخنه و متقولش , قول كان سيسعدنى التعرف عليك

شركتى اول ما تطلع من القطاميه و تدخل يمين :)

و لى بعض الملاحظات عن الرحله

وقت الصيد الصح بيكون مع الشروق الى 10 الصبح و من بعد العصر الى المغرب

فتره الظهيره بتبقى شبه ميته الا لو بتصطاد فى عمق كبير

ريس المركب بيفرق فى الصيد لانه هو اللى بيخليك تصطاد او يرجعك و انت شارى من الحلقه

بمعنى انه لو هو شاطر بيعرف يوقفك فى اماكن بيكون فيها صيد و بينقل بك لو الدنيا مش تمام معاك

طيب و هو ليه ميعملش كده من الاول

هأقول لحضرتك : اول ما تركب المركب بيقيم الطلعه اللى معاه (لو اول مره يطلعوا معاه ) جايه تتفسح و تدلع نفسها

و لا جايه تصطاد و شرقانه بحر

و كمان بيقيم ناس محترفه و لا اى كلام

طيب و هو خسران ايه ما يودينا حتت حلوه , هاتفرق معاه التنقل من مكان لمكان هايصرف معاه بنزين

كمان رفع البروسى كل شويه و تنزيله بيكون مجهد (لو مش على مكنه ) و خاصه لو كان واقف فى اعماق كبيره نوعا ما 25-40 متر

و هايفضل يحكى ان كان معاه طلعه امبارح و كانوا فى المكان ده و عبوا الايس بوكسات كلها و انتم النهارده حظكم وحش

و فى الاخر دى ارزاق

تقوم انت تاخده على جنب و تقوله صيدنا و تبرزله فلوس و تشوف هايعمل ايه :)

-----------------

لا اتهم الراجل بتاعكم و لكن ده اللى بيحصل مع معظم الناس ,

و اكيد طبعا فى احتمال ان مفيش سمك و ده رزق بتاع ربنا المهم ناخد بالاسباب

المشاركة الأصلية كتبت بواسطة mohamed_hamid

حمدا لله على السلامة يا أبا آسر واجازة سعيدة :)

الله يسلمك يا هندسة وشد حيلك تطلع معانا الطلعة الجاية في الصيف بإذن الله :)

المشاركة الأصلية كتبت بواسطة muhamednabil

الله ينور, حقولك على حجتييت عشان المرة الجاية

اللنشات الطلعت بيها برده بيبيعوا السمك البيصطادوا و ممكن تشترى منهم انا عن نفسى افضلهم عن الناس العلى الطريق لان السمك بيطلع من المية يحطوا فى الفريزر على طول و مش كل شوية يجمدوا و يفكو عشان العرض

الحاجة التانية الطلعة 12 ساعة دى عادة بتكون نزهة اكتر من الصيد, لو عايز صيد صيد يبقى بتتكلم فى يوم و نص اقل شيء عشان تقدر تستغل الماكن و الاوقات المميزة فى الصيد زى الفجر و بعد العصر و اللنش يقدر يمشى لاماكن ابعد لان حيط المارينا ده متنضف اول باول

أنا مجاش في بالي بصراحة أشتري إلا لما اتحركت وشفت الناس اللي عالطريق وقولت أهي تجربة مش هتخسر حاجة بس الحمد لله السمك طلع روعة فعلا احنا قعدنا ناكل في الكيلو ونص مرجان والنص الجمبري يومين :)

المشاركة الأصلية كتبت بواسطة adelghanem

رحله جميله
كفايه انها بتغسل هموم العمل
وتكسر الروتين وتجدد النشاط

بالضبط كده هو ده كان الغرض من الرحلة مش مسألة اننا نصطاد

المشاركة الأصلية كتبت بواسطة zrzr1

موضوع رائع وصور ولا اجمل..حمدلله ع السلامه والمهم الرحلة كانت حلوه

الله يسلمك
الحمد لله كان يوم جميل فعلا

المشاركة الأصلية كتبت بواسطة corsair

حمد لله علي السلامه يا أبو أسر ونصيحه من اخوك لما تيجي تطلع أي رحلة لازم تستفسر الاول عن حالة الجو وشدة الرياح وهتلاقي الكلام ده كله في منتديات الصيد والجروبات علي الفيس وثانيا ريس المركب المفروض كان يكون أمين معاكم ومينزلش بيكم في وقت هو عارف ان السمك فيه مش بياكل ثالثا سعر المركب غالي جدا 1500 في نص يوم ده انا افتكر من سنتين تقريبا نزلت بيخت في الزعفرانه كان ب 1000 جنيه 24 ساعة وبيتنا في البحر لحد تاني يوم الصبح وعملنا احلي شغل صيد وكان الجو بليل تحفه في البحر لان ده موسم الكليماري وتلاقي من بعد الساعه 6 احلي كاليماري ساعتها خدت يجي 10 كيلو كاليماري ده غير الكوشر والنواجل اللي اصطدنها بالنهار

انا كمان ساعات لما بكون في اسكندرية باخد مركب صيد من بحري من 6 الصبح لحد 4 العصر ب 50 جنيه وبتبقي رحلة جميلة بس مشكلتها ان الموج في البحر المتوسط غير البحر الاحمر خالص دوار البحر بيشتغل علي ودنه ههههههههه

المهم ان شاء الله تتعلموا من الاخطاء دي والمره الجايه نروح مع بعض

أكيد الواحد اتعلم كتير المرة دي وإن شاء الله الطلعة الجاية بتاعة نايل موتورز هيبقى فيها ناس خبرا تظبطلنا المسائل دي ويكون يوم متميز بجد

المشاركة الأصلية كتبت بواسطة friendship7897

ما شاء الله
رحلة جميلة وتقرير رائع وصورة تريح النفس وتزيل الإكتئاب
فكرتني يا أبو آسر برحلات الصيد اللي بابا كان بيخدنا فيها
كان الضغط عالي عنده الدكتور نصحة بالبعد عن السجائر ووجهه بتجربة الصيد لتهدئة الأعصاب
فكان كل جمعة نتجه إلى منطقة في القناطر الخيرية معروفة للصيادين ونحجز خيمة ومركب صيد ومعنا الأيس تانك وزجاجات يتم وضعها في الفريزر ثم وضعها في الأيس تانك للحفاظ على البرودة .، ونأخد معنا الصنانير ، طبعاً أفضلهم بمكن وغيره لوالدي ، وبعض الطعم اللذي نشتريه عند وصولنا للشاطئ .
أنا كنت بخاف من الطعم وكنت أجعل بابا يضع لي الطعم ، وكان حظي جميل في الإصطياد وكنت أيضاً أخاف من السمك وهو بيفرفر ، فأصبحت وش السعد لأبي وكنت أنا المسؤلة عن الصيد وهو المسؤل عن الطعم وتفريغ السمك في الآيس تانك ، ولكنها أسماك صغيرة .
ياااه رجعت لي ذكريات جميلة منها :-
أننا لم نخلص رحلة الصيد ببعض السميكات الكثيرة
نتجة للصيادين ونأخذ منهم شروة ما إصطاده - ما شاء الله كل ما لاذ وطاب وأنواع مختلفة .
فكان يقابلنا أحد الجيران - فكان يرى ما إصطدناه وما إشتريناه وكان يقول له بابا هذا رزقنا اليوم ( على كله ) ، ويقول له لازم تيجي معانا في يوم .
وفعلاً أتفق جارنا مع والدي ، وعند ذهابنا ، كالمعتاد كل زرقنا وما نستطيع إصطيادةه هو بعض السميكات الصغيرة الكثيرة ، فقال أنكل لبابا ( أمال فين السمك الكبير والأنواع اللي كنت بشوفها معاك كل أسبوع ) فقال له بابا : أصبر دا رزق آخر اليوم
وبعد إنتهاء رحلة الصيد المعتادة فذهب بابا إلى التجار ليشتري الشروة المعتادة
فكانت مفاجأة لجارنا على أكبر نكتة بابا عملها فيه .
معلش طولت عليك بس انت اللي فكرتني بإيام جميلة
شكراً لك

ان شاء الله تكون الرحلة دي سبب في ان حضرتك تستعيدي الذكريات الجميلة دي مرة تانية وتخرجي يوم زيها مع زوجك وأولادك وتقضوا يوم ممتع وجميل :)

المشاركة الأصلية كتبت بواسطة ali ashraf

الى الأخ الفاضل mtak حضرتك اللى جبته لنفسك واضح ان حضرتك متمكن من موضوع الصيد فى البحر ( الحقيقة ان نييلى فقط) ان شاء الرحمن الجماعة فى المنتدى يحضروا لرحلة فى الوقت اللى حضرتكم تشفوه مناسب ( و هذا يحتاج بعض التنسيق) و حضرتك تكون معنا ( سيد القوم خادمهم) و نستمتع معا بالصحبة الحلوة و محبة فى الله و يوم ( ان شاء الله ايام) صيد جميل.

ان شاء الله بشمهندس محمد هيكون معانا والحاج علي وكل الناس الحلوة بس محدش يكسل بس على ما الصيف ييجي :)