الموضوع: مقارنه كورولا مع النترا

اولا انا مش من ملاك النترا md ولا ألنترا
لكن هقول مجرد رأى
انا عربيتى النترا 2010 - ومعايا عربية الشغل النترا 2012 باسوقها احيانا - وعمرى ما ركبت حتى الكرولا الجديده لكن فعلا انا معجب بشكلها جدا(ويا ريت لو حد من الرجاله ساكن قريب من الهرم يعزمنى على فنجان قهوه ويدينى لفه - او حتى يخلينى ادوس على الكلاكس)
السؤال هل الالنتر md مش ثابته ؟؟؟؟؟؟ أيوه مش ثابته
طيب هل فعلا ثباتها ده ممكن يعمل كارثه لا قدر الله ؟؟؟؟؟؟ بنسبة 100% والله أعلم لأ
طيب يعنى العربيه بتتطوح وبتتأثر بالعربيات النقل ومطبات الهواء؟؟؟ نسبيا أه
يعنى العربيه زباله ؟؟؟؟!!!!!!! لأ خالص العربيه ممتازه وعيبها اللى فعلا ملوش حل واتحل فى الموديلات اللى بعد كده هو مكان فتحات التكييف اللى فى النص

شوية دردشة
أنا راكب النترا 2010 مانيوال - وأحنا اللى شارينها من الزيرو - وأول لما أخدت العربيه فى 2012 كنت فرحان جدا من نعومتها لكن اكتشفت مشكلة الفرامل بدرى ..... بدرى وبرضو مشكلة الثبات
بعد فحص العربيه مليون مره والتأكد ان العربيه سليمه لأن أول سنتين العربيه مكنتش معايا بدأت أدور على حلول للمشكله الزباله ديه
كان فيه حلول كتيييييييييييييره لكن الحل الامثل اللى وصلت له انى عربيتى وكيل - شاريها من غبور الامور - اللى بيحاول على قد ما يقدر انه يقلل من مميزات العربيه وعلى رأسها الكاوتش
العربيه كانت نازله بكاوتش زباااااااااااله مقاسه 185 وطبعا جنط 15 -- والمفروض انها تبقى 15 - 195 أو جنط 16 وده الاستاندرد
فكرت أغير الجنوط بجنوط أصليه 16 لكن لاقيت التكلفه ممكن توصل ل 8000 جنيه - فاخترت الحل التانى
نزلت اشتريت 4 فرد كاوتش بريدجيستون مع العلم ان كنا لسه مغيرين الاربع فرد
الكاوتش التراكشن بتاعه a والتيمبرتشر a وطبعا يابانى - وركبت العرض الاصلى اللى هو 195
جرب العربيه - الاقيها شوربه يا معلم وكانت الصاعقه
المهم روحت ظبطت زوايا - الدنيا طين زى ما هيه - كلمت بتوع بريدجيستون ان العربيه انهارت بعد تركيب الكاوتش وتظبيط الزوايا عندهم - بعتونى لفرع الجيزه والحمد لله العربيه تحولت تماما

طيب احساسى لما بركب ال 2010 و ال 2012 انهى الاثبت
2010 أثبت بفارق ملحوظ - الفرامل أحسن بفارق بسيط

لغاية لما اخدت بالى من حاجه وعارف ان فيه ناس هاتهاجمنى فى النقطه ديه
النترا md موديل 2012 بالذات العربيه لما بتاخد مطب هواء أو عيون القطه (العواكس) العربيه بتلعب شويه خصوصا من ورا لكن العربيه بتظبط نفسها بدون اى تدخل منك
جرب وانت فوق ال120 تاخد اى مطب صغير وانت مأمن الدريكسيون هاتلاقى العربيه جت شمال ويمين للحظه لكنها بتظبط نفسها تانى بدون تدخل منك
طبعا احنا رقصنا فى التوكيل على العيب ده وأكدوا ان النترا md كده

بدون مبالغه - ده مش عيب قاتل - اينعم هو عيب - لكن فعلا لا يعب العربيه نهائيا

اقتراح بسيط
لو عايز تركب النترا وخايف من الثبات - اشترى سيراتو 2015 - ثباتها راااااااااااااااائع لكن استحمل العافشه الواطيه الناشفه يا حلو

ان شاء الله العربيه اللى جايه هاتبقى النترا 2015 أو سيراتو 2015
ربنا يرزق