الموضوع: رسالة شكر وتقييم على قده :d

بداية أحب أشكر كل واحد فى المنتدي هنا سواء كان شارك بمعلومة أو برأي خاص بيه أو تجربة حصلت معاه.
ويصراحة من أفضل الاقسام هنا فى المنتدي وتحس إن فيه روح طيبة بين كل الناس هنا والكل عايز يفيد غيره وماحدش بيبخل بمعلومة نهائيا.
والمنتدي هنا هو اللى خلانى فى الاول خالص اختار الفلشيا واقتنع بيها من قبل ما اشتريها او اركبها حتى..ومن بعد ما اشترتها استفدت كتير من مشاركات المنتدي هنا سواء كان بسؤال منى على المشاكل اللى قابلتنى أو البحث فى المشاركات السابقة.

وهحاول اعمل تقييم سريع للعربية فى الفترة اللى كانت معايا فيها قبل ما ابيعها.
الصراحة انا كنت بدور على عربية تقعد معايا كفترة انتقالية لمدة سنة فى حدود الـ 25 الف والحمد لله قعدت معايا سنة ونص.
كانت المفاضلة بين الفليشيا والابيزا ومش فاكر السيتروين (ax او zx ) تقريبا..كل اللى اعرفهم تقريبا قالولى بلاش الفليشيا لكن بما انى كنت مقتنع بالفليشيا اصلا علشان المنتدي فاشتريت الفليشيا موديل 1997 لونها زيتى وطبعا زي كلنا ما بنسمى عربياتنا.. فكان اسمها (زتونة) وهى كانت زتونة فى نفسها فعلا.
حالتها كانت متوسطة بس انضحك عليا فيها وطلعت حالة الموتور سيئة ومحتاجة عمرة مع انى كنت واخد الميكانيكى بتاعى معايا بس حب يعمل لنفسه شغل علشان يعمل العمرة هو...و دي كانت نهايته معايا واتعاملت مع ميكانيكى جديد والحمد لله طلع محترم (الى الان).
مميزاتها :-
- استهلاك البنزين جيد جدا جدا بصراحة...كنت بحطلها 92 ولما البنزين غلى ماستخسرتش فيها وطبعا طبعا حطيت 80 وماقالتش لأ برده.
- عفشة العربية محترمة وبتنفع لما بيكون الطريق مش مرصوف ..لكن لما اتبهدلت تحس فى المطبات دي انك راكب مراجيح.
- العربية عالية عن الارض وبتنفع قوي فى المطبات الحلوة بتاعتنا..لكن لو معاك اوزان ع الكنبة ورا ممكن تخلى بالك فى المطبات العالية قوي.
- العربية بطة فى السرعات العالية وخصوصا مع الدائري اللطيف بتاعنا ..أقصى حاجة جبتها عن طريق التجربة كانت 135 ملحقتش احصل الـ140 وكانت العربية ثابتة بس حسيت ان الدركسيون هينط من ايدي.
- بالنسبة لقطع الغيار انا شايفها رخيصة وليها البدائل سواء كانت الاصلى او الاوروبى او الصينى حتى الاستيراد.. وماينفعش تقارنها بأسعار قطع الغيار بتاعة الـ128 او الشاهين..دي عربية ودول حاجات تانية اصلا.
- المساحة الداخلية الامامية بتاعة الارجل جيدة والكنبة الخلفية متوسطة.
- أهم حاجة بقى انها عربية اوروبي وسعرها رخيص(أو كنت بقنع نفسي بكده )
العيوب بقى :-
- الموتور خشن وصوته عالى قوي
- زي ما قولت العربية بطة فى السرعات العالية بس بطيئة فى الطلعة بتاعتها وحتى فى التسارع.
- المشكلة الابدية بتاعة الحرارة...ودي زي ما الناس فادتنى هنا فى المنتدي غيرت الريداتير بواحد الومنيوم ونزلت الوكالة جبت مروحة شديدة وفقتها عليها وتغير ترموستات الكوعة بنت الـ....وحطيتلها مية خضرا.
- فكرة انك تجيب عربية مستعملة ماشية فوق الـ 15 سنة فلازم تبقى عارف ان العمر الافتراضي لحاجات كتير بينتهى مع الوقت فكانت كل فترة تلاقى حاجة عايزة تتغير فيها (زي ما بيقولوا لازم تبقى إيدك فيها) ولو انت مش فاضي بتبقى مشكلة طبعا زي ما كان بيحصل معايا.

فى النهاية أقدر أقول انها عربية محترمة كأداء وقطع غيار متوفرة لو انت مش من محبي الجري بالعربية وعايز عربية تقدر تروشنها ويبقى شكلها شبابى ( بس لازم يبقى ايدك فى العربية علشان ماتتراكمش عليك مشاكلها مرة واحدة وتلاقى نفسك بتزقها لغاية الميكانيكى)وما تشتريش العربية غير وانت مقتنع بيها عشان هاتعدلها موقف بايخة كتير.
لو رجع الزمن لورا تاني الصراحة مش هشتري العربية مش لحاجة بس علشان انا مش بفضي غير يوم الجمعة بس وكل الايام لازم تبقى العربية تحت رجلى علشان ظروف شغلى وسكنى ... أي عيب كان بيظهر فى العربية مش بقدر اصلحه غير يوم الجمعة وكانت طبعا بهدلة الانتقالات بتاعتى بقية الايام.
أخيرا أحب أشكر كل الناس هنا تانى فى المنتدي وربنا يبارك لكم إن شاء الله بجد ناس محترمة... وهبقى أدخل المنتدي هنا من فترة للتانية أتابع يمكن تبقى في مشكلة اقدر اشارك فى حلها أو رأي يفيد حد.

وشكرا.....