الموضوع: الاخوة الافاضل بتوع مصلحتهم

المشاركة الأصلية كتبت بواسطة ahmedsiyam

السلام عليكم

الاخوة الافاضل الكرام انا لاحظت ان فى اعضاء كتير يدخلوا على المنتدى و قسم زيى بروتون مثلا يقعد يسال فينا و يستجوبنا لانه متخوف من العربية و عنده حق الكلام كتير عليها بس هو عمل الصح و سأل الناس اللى راكباها يقوم يرد عليه اخوة افاضل تانين مالهمش علاقة بالعربية من اساسه و لا ركبوها حتى و يقعدوا يفتوا و احنا مالكى العربية الاساسين نقعد نرد و نحاول ننفى الكلام الفارغ العارى من الصحة لانه بمنتهى البساطة موش عن تجربة ونقعد نفهم الاخ صاحب السؤال الكلام المظبوط و اللى نابع من تجربتانا احنا
وفى الاخر نلاقى الاخ صاحب الاسئلة اللى قعد يسألنا 100 سؤال و سؤال اشترى العربية فعلا و يقول انه استلم فعلا و باركولى بقى و شوية التقييمات اللى فى الاول الخايبة اللى هى اصلا موش حكم صحيح على العربية سواء حلوة او وحشة و بعد كده لا حس و لا خبر عن العضو الفاضل و مصلحته انتهت و قاعد مقضيها بالعربية و شكرا على كده

يا جماعة لا انا و لا الاخوة الافاضل اللى بيردوا معايا فاضيين و لا عندنا الوقت اللى موش عارفين نعمل بيه ايه
انا واحد من الناس بادخل نايل موتورز هو يدوبك قسم بروتون القى عليه نظرة سريعة و اخرج لانى مشغول فى شغلى او فى امور الحياة العادية انما باحاول اوجد وقت و لو صغير من باب الالتزام مع الناس اللى كانت بتساعدنى فى اتخاذ قرار شراء العربية دى و انى ابقى موجود معاهم انقل خبرتى و تجربتى بمنتهى الامانة عن العربية و بدون تحيز

انا اسف اذا كنت طولت عليكم بس كان لازم المقدمة دى علشان يتفهم الغرض عنوان الموضوع

ياريت يكون من الاخوة الافاضل شوية التزام و يبقوا متواجدين و لو بوقت بسيط جدا يشاركونا تجربتهم و نستفيد من خبرتهم برضه بالعربية
لو تتفرجوا على الجروب الخاص بنادى الجين 2 الموجود على الفيس بوك الناس عاملة توبكس عن المشاكل و كيفية معالجتها و متعاونين مع بعض الى حد ما

معلش طولت عليكم انما انا بصراحة مابحبش موضوع المصلحة ده و احب الاحساس بالمسؤلية وباقدره جدا و من هذا المنطلق فتحت الموضوع ده علشان الناس تبقى واخدة فى اعتبارها اننا خصصنا وقت ليهم يا ريت هم كمان يبقوا يخصصوا وقت لباقى الاخوة لنقل تجربتهم علشان الفائدة تعم
اشكركم جميعا

very well said

و كا قاعدة عامة... اى تقييم من واحد لم يمتلك او يقود السيارة فترة طويلة (مش اخد بيها لفة فى السريع يعنى) لا يعتبر تقييم واقعى

MMamdouh