الموضوع: عاوز اشترى بونتو بس خايف

من فضلكم:
انا عاوز اجيب عربية تكون فيها المواصفات التالية عشان شغلى:
1-سى سى قليل عشان استهلاك البنزين
2-استهلاك بنزين مايزيدش عن 7 لتر لكل 100 كيلو
3-مش مهم الضخامة و الفخامة عشان يوميا هستعملها لوحدى مشاوير الشغل يعنى بس
4-قطع غيار خارجية رخيصة (زى الكاوتش مثلا يعنى يبقى مقاس جنط 14 عشان المقاس الكبير سواء كاوتش او جنط بيبقى اغلى)
5-عفشة معقولة .. مش لازم تكون ملبن لكن ما تقطمش الضهر.
6-تكون صغيرة عشان الركن و كمان انا لسة معيش عيال

هل المواصفات دى موجودة فى البونتو و ليه هى مش منتشرة .. هل فيه مشاكل فى قطع الغيار او مفيش حد بيشتغل فيها او قطع غيار غالية.
و هل لو جبت مستعمل هيعذبنى و هيبقى فاتح بقه و يطلب فلوس جامد
ارجو الافادة من ملاك السيارة.

اكتر من 50 مشاهدة بدون تفاعل
مافيش ايجابية ليه

أنا معايا بونتو ..
العربية كويسة جدا وقطع غيارها موجودة في وسط البلد عند الكيلاني في شامبليون أشهرهم وفي غيره كتير
وأغلي بحاجة بسيطة عن العادي ..
والعربية منتشرة علي فكرة بس مش هتلاحظها الا لو فكرت تشتريها وركزت في وجودها في الشارع

متشكر يا استاذ طارق
ممكن اعرف اخبار استهلاك البنزين
و هل لو جيبت مستعمل هيبقى كويس ولا هيتعبنى و يفتح بقه

البنزين استهلاكه كويس واقتصادي بس مقدرش اديك ارقام تفصيلية عن الاستهلاك عشان انا العربية مبقالهاش كتير معايا
ونصيحة سواء هتجيب بونتو او غيرها مستعمل ما تقلش عن موديلات 2008-2009 فما فوق
عشان الاستعمال في مصر سئ فلازم تجيب موديلات عالية نوعا ما
واخيرا أهم حاجة حالة العربية وتكشف عليها كويس جدا مرة واتنين قبل ما تشتري
وربنا يوفقك للخير ..

انا من مالكي العربيه معايا بونتو 2008 هي عربيه ممتازه و فيها كل اللي انت كاتبه
مشاكلها:
1- الشنطه صغيره شويه بس اكبر من البيكانتو
2- مش حلوه في اعاده البيع
مميزاتها:
1- سعرها ممتاز بالنسبه لعربيات كتير في نفس الفئه
2- اداء العربيه حلو مع التكييف

لو لسه هاتشتري خليك في 2009 لانها بتنزل بجنوط سبور غير 2008 طاسات عاديه و بعد موديل 2011 صربي مافيهاش فرق كبير غير انه متقفله في صربيا

المشاركة الأصلية كتبت بواسطة davidhosny

انا من مالكي العربيه معايا بونتو 2008 هي عربيه ممتازه و فيها كل اللي انت كاتبه
مشاكلها:
1- الشنطه صغيره شويه بس اكبر من البيكانتو
2- مش حلوه في اعاده البيع
مميزاتها:
1- سعرها ممتاز بالنسبه لعربيات كتير في نفس الفئه
2- اداء العربيه حلو مع التكييف

لو لسه هاتشتري خليك في 2009 لانها بتنزل بجنوط سبور غير 2008 طاسات عاديه و بعد موديل 2011 صربي مافيهاش فرق كبير غير انه متقفله في صربيا

شغال
العيبين دول مايفرقوش معايا خالص... انا ولا محتاج شنطة و لا هاشتريها زيرو و خايف اخسر فيها .. انا هشترى مستعما 2010 او 2011

شكرا

قطع غيارغاليه شويه
تقيله في اعادة البيع
غير كده ممتازة
وبرده متابع
لاني محتار زيك

المشاركة الأصلية كتبت بواسطة الاسد المهاجر

قطع غيارغاليه شويه
تقيله في اعادة البيع
غير كده ممتازة
وبرده متابع
لاني محتار زيك

هو مافيش لينك فيه اسعار قطع الغيار بتاعتها عشان اقدر اعرف غالية اد ايه

دي حاجات اتا لسه مغيرها
مساعدين امامي 750
بطاحات 320
بوجيهات njk 130
مساعدين خلفي 550
مساحه خلفيه 60
حساس حراره اصلي ايطالي 300
بطاريه فارتا 45 امبير 390


و اي حد تاني ممكن يساعدك في اي حاجه غيرها

و ربنا يوفقك في الشراء