عاوز اشترى بونتو بس خايف

**MACATHIUS** · 18-12-2014 12:36 PM

من فضلكم:
انا عاوز اجيب عربية تكون فيها المواصفات التالية عشان شغلى:
1-سى سى قليل عشان استهلاك البنزين
2-استهلاك بنزين مايزيدش عن 7 لتر لكل 100 كيلو
3-مش مهم الضخامة و الفخامة عشان يوميا هستعملها لوحدى مشاوير الشغل يعنى بس
4-قطع غيار خارجية رخيصة (زى الكاوتش مثلا يعنى يبقى مقاس جنط 14 عشان المقاس الكبير سواء كاوتش او جنط بيبقى اغلى)
5-عفشة معقولة .. مش لازم تكون ملبن لكن ما تقطمش الضهر.
6-تكون صغيرة عشان الركن و كمان انا لسة معيش عيال

هل المواصفات دى موجودة فى البونتو و ليه هى مش منتشرة .. هل فيه مشاكل فى قطع الغيار او مفيش حد بيشتغل فيها او قطع غيار غالية.
و هل لو جبت مستعمل هيعذبنى و هيبقى فاتح بقه و يطلب فلوس جامد
ارجو الافادة من ملاك السيارة.

**MACATHIUS** · 18-12-2014 02:59 PM

اكتر من 50 مشاهدة بدون تفاعل
مافيش ايجابية ليه

**tarreq** · 19-12-2014 03:56 PM

أنا معايا بونتو ..
العربية كويسة جدا وقطع غيارها موجودة في وسط البلد عند الكيلاني في شامبليون أشهرهم وفي غيره كتير
وأغلي بحاجة بسيطة عن العادي ..
والعربية منتشرة علي فكرة بس مش هتلاحظها الا لو فكرت تشتريها وركزت في وجودها في الشارع

**MACATHIUS** · 19-12-2014 04:22 PM

متشكر يا استاذ طارق
ممكن اعرف اخبار استهلاك البنزين
و هل لو جيبت مستعمل هيبقى كويس ولا هيتعبنى و يفتح بقه

**tarreq** · 19-12-2014 06:21 PM

البنزين استهلاكه كويس واقتصادي بس مقدرش اديك ارقام تفصيلية عن الاستهلاك عشان انا العربية مبقالهاش كتير معايا
ونصيحة سواء هتجيب بونتو او غيرها مستعمل ما تقلش عن موديلات 2008-2009 فما فوق
عشان الاستعمال في مصر سئ فلازم تجيب موديلات عالية نوعا ما
واخيرا أهم حاجة حالة العربية وتكشف عليها كويس جدا مرة واتنين قبل ما تشتري
وربنا يوفقك للخير ..

**DavidHosny** · 20-12-2014 09:37 AM

انا من مالكي العربيه معايا بونتو 2008 هي عربيه ممتازه و فيها كل اللي انت كاتبه
مشاكلها:
1- الشنطه صغيره شويه بس اكبر من البيكانتو
2- مش حلوه في اعاده البيع
مميزاتها:
1- سعرها ممتاز بالنسبه لعربيات كتير في نفس الفئه
2- اداء العربيه حلو مع التكييف

لو لسه هاتشتري خليك في 2009 لانها بتنزل بجنوط سبور غير 2008 طاسات عاديه و بعد موديل 2011 صربي مافيهاش فرق كبير غير انه متقفله في صربيا

**الاسد المهاجر** · 20-12-2014 01:08 PM

قطع غيارغاليه شويه
تقيله في اعادة البيع
غير كده ممتازة
وبرده متابع
لاني محتار زيك

**tarreq** · 20-12-2014 03:11 PM

علي فكرة .. موضوع اعادة البيع بالنسبة للبونتو اتغير خاااااااااااااااااااااالص

أنا لحد شهر فات كنت بأدور علي بونتو مستعملة بحالة ممتازة ، وفي 3 عربيات عجبوني ، أول اتنين منهم عقبال ما كنت بأفكر مع نفسي وأتصل بصاحبها يقوللي اتباعت ..

**Ahmed.MT911** · 20-12-2014 09:25 PM

اضيف اضافة برضه بما اني من مالكي البونتو ايضا

العربية ممتازة جدا في السفر بحكم شغلي وامان جدا في الحوادث لاقدر الله وجوه البلد برضه كويسة في الاستهلاك واحلي حاجة فيها التقفيل والعزل لما بتقفل الشباك عليك (وده كان اكبر عيب في الكوري لما كان معايا كيا ) العفشة ناعمة جدا والسحب كويس (انا اصلا مش بشد مع حد وسواقتي هادية دائما ) والتصميم الداخلي والخارجي شيك جدا

اعتقد العيب الوحيد فيها انها زي كل العربيات الاوربي قطع غيار غالية شوية (مقارنة بالكوري الزبالة ) وكمان انك مش بينفع معاها العك اللي ممكن تعمله في الكوري والياباني

يعني لو عاوز تحافظ علي العربية وتخليها سليمة معاك وكويسة لازم تتعامل مع حد مختص في الفيات الحديث بس علشان الميكانيكة بتوع الكوري والياباني لو اشتغلوا فيها يبقي احب اقولك انك هتكره نفسك

انا بقول كده من واقع تجربة بقالها سنة مع البونتو

عملت خلالها توضيب كامل للعفشة (المقصات ب 500 جنيه )وشوية حركات تاني كده
وعملت توضيب برضه للمتور في حدود 1000 خلال السنة
يعني تقدر تقول كده ان اهلاك العربية السنوي في حدود 1500:3000 ده لو طبعا انتا بتحافظ علي العربية زي حالاتي

وبكرر عليك النصيحة اهم حاجة انك بلاش تخلي اي حد يلعب في العربية لانك هتكره نفسك والله من العك بتاع الميكانيكة اللي في مصر

ربنا يوفقك ان شاء الله وشوف موديل حديث علشان برضه تعرف تستمع بالعربية (2008 او 2009 مثلا

انا معايا 2000 والعربية كاملة والحمد لله ماشية معايا زي الفل

ربنا يوفقك ان شاء الله

**MACATHIUS** · 21-12-2014 12:21 PM

المشاركة الأصلية كتبت بواسطة ahmed.mt911

اضيف اضافة برضه بما اني من مالكي البونتو ايضا

العربية ممتازة جدا في السفر بحكم شغلي وامان جدا في الحوادث لاقدر الله وجوه البلد برضه كويسة في الاستهلاك واحلي حاجة فيها التقفيل والعزل لما بتقفل الشباك عليك (وده كان اكبر عيب في الكوري لما كان معايا كيا ) العفشة ناعمة جدا والسحب كويس (انا اصلا مش بشد مع حد وسواقتي هادية دائما ) والتصميم الداخلي والخارجي شيك جدا

اعتقد العيب الوحيد فيها انها زي كل العربيات الاوربي قطع غيار غالية شوية (مقارنة بالكوري الزبالة ) وكمان انك مش بينفع معاها العك اللي ممكن تعمله في الكوري والياباني

يعني لو عاوز تحافظ علي العربية وتخليها سليمة معاك وكويسة لازم تتعامل مع حد مختص في الفيات الحديث بس علشان الميكانيكة بتوع الكوري والياباني لو اشتغلوا فيها يبقي احب اقولك انك هتكره نفسك

انا بقول كده من واقع تجربة بقالها سنة مع البونتو

عملت خلالها توضيب كامل للعفشة (المقصات ب 500 جنيه )وشوية حركات تاني كده
وعملت توضيب برضه للمتور في حدود 1000 خلال السنة
يعني تقدر تقول كده ان اهلاك العربية السنوي في حدود 1500:3000 ده لو طبعا انتا بتحافظ علي العربية زي حالاتي

وبكرر عليك النصيحة اهم حاجة انك بلاش تخلي اي حد يلعب في العربية لانك هتكره نفسك والله من العك بتاع الميكانيكة اللي في مصر

ربنا يوفقك ان شاء الله وشوف موديل حديث علشان برضه تعرف تستمع بالعربية (2008 او 2009 مثلا

انا معايا 2000 والعربية كاملة والحمد لله ماشية معايا زي الفل

ربنا يوفقك ان شاء الله

انت كدة طمنتنى
الاوروبى كله عموما ماينفعش حد يشتغل فيه غير متخصص و دا شىء مايعتبرش عيب
بس كدة العربية دى فيها كل احتياجاتى
انا مش عاوز اكتر من اللى انت قولته

شكراً