الموضوع: دروس مستفادة بعد شراء راوتر ماركة مشهورة من محل تحت السلم !

السلام عليكم
القصة باختصار هي اني كنت محتاج أغير الراوتر اللي عندي وهو D-Link N150 براوتر آخر يكون مداه أكبر علشان الإشارة مش بتغطي كل الشقة وفشلت في توصيل أكسس بوينت أكتر من مرة فقلت أجيب راوتر أفضل مرة واحدة وأريح دماغي
نزلت سوق العصر في روكسي ولفيت فلقيت محل اسمه Go Net أول طرقة شمال بعد مدخل المول جنب شركة Maximum Hardware ، محل صغير بس عنده أنواع كتير لأن المحل شبه متخصص في الراوترات والأكسسات ففضلت محتار شوية بين الأنواع وبعدين دخلتله وشرحتله طلبي فقالي D-Link مشاكله كتير خليك في Linksys أو NetGear
طبعا أنا أسمع إن الماركتين دول من أفضل الماركات في السوق وأغلاها كمان
قلتله طيب رشحلي حاجة سعرها معقول فرشحلي NetGear N300 تمنه 450 جنيه ، اشتريته واداني الفاتورة ومشيت
فتحت الراوتر ووصلته وحاولت أستبه معرفتش فاتصلت بـ Tedata والموظف فضل معايا على التليفون أكتر من 20 دقيقة بدون أي فايدة الراوتر مش عايز يلقط نت ، قلتله شكرا لتعبك معايا أنا هجرب تاني لوحدي كده وأشوف
عملت رستارت للكمبيوتر وعملت الـ setup من جديد وبعد عدة محاولات اشتغل أخيرا .. بس في مشكلة !
أنا سرعة النت عندي 4 ميجا والـ D-Link كان بيقراها كلها عادي ولما بعمل اختبار للسرعة على موقع Speedtest.net بيقرا الدونلود حوالي 3.38 ميجا في الثانية وده الطبيعي في مصر انه مش بيديك كل السرعة كاملة ، المهم بصيت في اعدادات الراوتر الـ NetGear لقيته قاري السرعة أقل من 3 ميجا بشوية ! قلت يمكن كده بيقراها صح والـ D-Link كان بيشتغلني مثلا فقلت أجرب أعمل speedtest فلقيته مديني الدونلود حوالي 2.34 !! يعني أقل برده ميجا كاملة عن سرعة D-Link ، طبعا رسترت الراوتر أكتر من مرة وحدثت الfirmware لآخر إصدار وغيرت الDNS ولعبت في كل الإعدادات وبدون أي فايدة !
قلت يمكن العيب من شركة النت ! شيلته وركبت الـ D-Link تاني لقيته شغال تمام والسرعة مظبوطة ! يبقى كده مش عيب شركة دي عيب راوتر
طبعا غير الموضوع ده اكتشفت ان السيجنال برده نفس الرينج بتاع الـ D-Link برده يعني مش مغطية الشقة كلها ! كده يبقى الـ D-Link برقبته لأنه شغال تمام وبيغطي نفس المساحة وبيقرا السرعة كاملة
رجعت كل حاجة في الكرتونة وقلت أنزل بعد كام يوم أرجعه سواء أبدله بحاجة أكبر أو آخد فلوسي أو أجيب Range Extender ممكن يحل مشكلة التغطية وأشتغل على الراوتر القديم
نزلت امبارح بالليل وروحت للراجل وشرحتله المشكلة فابتسم ابتسامة صفرا كده فيها بعض السخرية وبيقولي: ترجعه ازاي يعني ؟ دي مش مشكلة اللي انت بتقول عليها دي ! ممكن تكون مش عارف تشغله كويس ! فتحت الموبايل وطلعت الصور وكنت مصور السرعة مع الـ D-Link والراوتر قدام الشاشة وصورة تانية صورت السرعة والـ NetGear قدام الشاشة برده ، كنت عامل حسابي لحاجة زي كده ، بص في الصور وعمل نفسه مش فاهم وبعد ما فهمته قالي بس أنا مش هينفع أرجعه برده انت تروح للوكيل وتشوفه هيقولك إيه !
قلتله بس أنا من حقي أرجعه خلال 15 يوم ومليش دعوة بالوكيل ، يقولي أنا مش معترف بالعيب ده ! هاتهولي مقفول وأنا أرجعهولك !! أقوله ازاي راوتر مش بيقرا السرعة كاملة وميبقاش عيب يقولي هاتهولي قولي مش شغال خالص مبينطقش وأنا أخده منك ! ومن هنا لهنا وبعد محاولات عديدة مني للإصرار على الإرجاع أو الاستبدال في مقابل إصرار منه على التنصل من المسئولية وتحميل الوكيل المشكلة كلها والابتسامة الصفرا اتبدلت بتكشيرة ؛ مشيت من عنده وأنا ناوي أكلم الوكيل أشوفه هيقول إيه مع إني عارف الرد مقدما وبعدين هقوم مقدم بلاغ في الاتنين عند جهاز حماية المستهلك أملا في إني آخد حقي منهم .

الدروس المستفادة:
1- مش كل الماركات الغالية والمشهورة بتبقى تمام ، ياما ماركات مش مشهورة وملهاش حظ في السوق ورخيصة وبتشتغل أحسن وأفضل من الماركات الغالية ، مش قاعدة عامة طبعا بس بتحصل كتير خاصة في مجال التكنولوجيا والإلكترونيات.
2- متشتريش حاجة من محل تحت السلم حتى لو أرخص من برة لأن مع أقرب مشكلة هيبيعك ويقولك معرفكش على عكس المحلات الكبيرة المحترمة حتى لو غالية شوية بس هتضمن إنك هتاخد حقك منهم لأنهم بيمشوا قانوني وصح وكمان بيخافوا على سمعتهم والموظف مش هيخسر حاجة لما يبدلك الجهاز لأنه مش محل أبوه ده مجرد موظف وبينفذ التعليمات وكمان المحلات دي تقدر تتعامل مع الوكلاء بقلب جامد ويرجعوا أتخن جهاز بدون أي مشكلة على عكس محلات تحت السلم اللي بيريح نفسه من المعافرة مع الوكيل ويورطك انت معاهم عشان يخلع هو ويريح دماغه ، وشخصيا كان ليا تجربة مشابهة مع كمبيوتر شوب اشتريت منه أكسس بوينت من فترة ومشتغلش يمكن بسببي أنا مكنتش عارف أشغله فرجعته بعدها بيوم أو اتنين وخدت فلوسي فورا وبدون أي مماطلة .
حسبي الله ونعم الوكيل