فعلا مشكلة سرقة العربيات بقيت حاجة تقرف و مع أسعار العربيات الخيالية بقي تأمين العربية حاجة مهمة

من خبرتي المحدودة أكتشفت أن ما فيش جهاز أنذار كامل يقدر يأمن كل المواقف و السيناريوهات يعني مثلا جهاز الأنذار ممكن يزمر لما الحرامي يكسر الشباك أنما مش حاينفع ببصلة لو أتثبت علي الطريق بحرامي مسلح

و بعد تفكير عميق توصلت للأتي:
كل موقف و سيناريو محتاج وسيلة أمان مصممة لهذا الموقف يعني ممكن جدا يكون عندك أكتر من وسيلة منع سرقة في نفس العربية
الحرامي المحترف صعب جدا أنك تمنعه بس ممكن تعطله شوية و بالتالي يخاف يتمسك و يهرب بجلده
كتر أجهزة الحماية من السرقة ممكن تكون مكلفة شوية و محتاج واحد فنان لتركيبها مع بعض و بدون تعارض

أكتر الوسائل فعالية و أصعبها هي المفتاح المشفر أو الأيموبيلايزر و ده حايمنع نهائي الحرامي المستجد من أنه يعرف يشغل العربية حتي لو كسر الكونتاكت كله

لذا تعالوا نفكر مع بعض في السيناريوهات الأتية:
(أولا) العربية تحت البيت أو في مكان العمل سواء بالليل أو خلال النهار:
أعتقد أن ركنها في جراج أو عند سايس معروف كافي جدا لحل المشكلة. و جهاز أنذار عادي مع تشغيل خاصية غلق المحرك يبقي تمام قوي و يا سلام كمان لو قفل دركسيون و تكون العربية مفتاحها مشفر يبقي كده أنسي أنه يقدر يشغل الموتور
طيب لو ما فيش جراج أو سايس يبقي ممكن قفل العجل يفيد برضه .

طيب كل ده ما يفيدش لو الحرامي معاه ونش و شال العربية كلها . يبقي الحل في الجي بي أس تراكر و لو أنه مجرد حايخبرك مكان العربية و علي فكرة في معظم الأحوال مش حاتعرف تروح تجيبها (عن تجربة مع صديق) و الشرطة مش حا تتحرك في المكان ده نهائي.

(ثانيا) لو أتثبت علي الطريق أكيد الحرامي حايأخذ منك المفتاح و الريموت و موبايلك و كل حاجة. يبقي أيه العمل؟؟؟؟
في حاجة عند بتوع الأسانسيرات أسمها أكسس كونترول (Access Control ) و دي عبارة عن جهاز بيشتغل بواسطة ميدالية لازم تقربها من وحدة الجهاز. الجهاز ده بيشتغل علي 12 فولت و لما بيستلم الكود الصح من الميدالية بيشغل ريلاي (Relay ) معين لأي دائرة. يعني ببساطة شديدة يتم تركيب الجهاز ده في مكان خفي تحت التابلوه مثلا و يتم توصيل 3 ريلاي كالأتي:
واحد علي سلك الدوارة من أوتوماتيك المارش يعني الكونتاكت مش حايوصل كهرباء لأوتوماتيك المارش الا بعد ما الأكسس كونترول يقبل أشارة الميدالية
و الثاني علي سلك كهرباء طرمبة البنزين
و التالت علي سلك حساس الكرنك
يبقي جهاز الأكسس ده فاصل الثلاث دوائر حتي يستلم كود الميدالية
الفن في تركيب الجهاز بجوار كرسي السائق بحيث أن الميدالية تظل في جيبك طول ما أنت جالس علي الكرسي بتاع السواق و أول لما تقوم يفضل الموتور شغال شوية لغاية أما يطفيه و بعدها مستحيل أنه يشتغل تاني مهما عمل
و في جميع الأحوال أنت كده عطلته كتير لدرجة أنه ممكن يترك العربية و يجري بجلده.