السلام عليكم في الاول .
عندي مشكله في موضوع الموتور بتاع الانوس جامده جدا وهي موضوع اكل الزيت . لسه مغير زيت من حوالي 3 اسابيع وحطيت كالمعتاد 3 كيلو . المهم بعد حوالي 370 كيلو مشي ابص علي مقاس الزيت الاقي الي موجود تقريبا كيلو ونص بس . ده غير اني لما اجي ادور العربيه في الاول الصبح مثلا اشوف الدخان الابيض بعيني . انا مش قلقان من الدخان لانه بيستمر شويه وبيروح بس بيرجع يظهر تاني مع السحبه او مع طلوع اي مطلع او مع عزم شديد . الي مخليني قلقان فعلا هو الصوت الي بسمعه في بدايه الدوران بسمع زي مايكون تخبيط في الموتور لمده دقيقه ولا حاجه هو مش صوت عالي بس خشونه ملحوظه في الموتور .
انا في ناس نصحوني بعد ماسألتهم قولتلهم هل الحل طقم شامبر واخرط الكرنك وكده . فردوا عليا وقالولي العربيات دي مبتعملش فيها كده دي بتروح عند وحد بتاع استيراد وتقوله عاوز نص تحتاني للموتور الي بيشمل الكرنك والبساتم من غير وش السلندر .
وناس تانيه قالتلي استني لما تجيب اخر الموتور خالص وهات موتور استيراد وخلاص بس طبعا مكلف شويه . وبعدين مش هستني انا الموتور لما يفوت اويقفش مني علشان اصلحه .
السؤال هو ايه رأيكم يااهل الخبره والي مجربين هل اعمل بالنصيحه واشتري نص تحتاني للموتور استيراد زي ماقالو . ولا اشتري موتور كامل (3700)كامل استيراد .
ولا اعمل ايه ياريت النصيحه الله يخيكوا وياريت كمان تكون عن تجربه والسعر تقريبا هتتكلف كام .
وشكرا ليكم .