تـقـريـر مـبدئ عـن ريـنـو لـوجـان 2015

**Amr Axel** · 25-12-2014 08:49 PM

بسم الله الرحمن الرحيم
السلام عليكم و رحمة الله و بركاته

لقد انضممت لكم يا شباب رينو :d
الحمد لله اخيرا استلمت لوجي انهاردة باوفر برايس 3 فئة 3 و رخصتها
البداية روحت استلم من المعرض الصبح بالرغم انها جاهزة عنده بقالها شوية بس طبعا الشغل و في نفس الوقت مش هستلم و اركن لكن زي ما متعود استلم و ع المرور عدل
طبعا العربية اتفحصت شبر شبر و اللي شغالين في المعرض كانوا بيبصولي باستغراب و بيحاولوا يستعجلوني عشان الحق المرور لأنه نص يوم انهاردة قولتلهم لو حكمت مستلمش انهاردة و استلم يوم السبت و ارخص معنديش مانع :d استلمت و الحمد لله كله تمام التمام و استلمت مع العربية الآتي :
3 كتيبات في جراب جلد ( دليل الراديو و دليل المستخدم و الصيانات ) - 4 طاسات - كوريك و مفتاحه و مفتاح عجل و طبعا استبن - مسمار القطر اللي بيركب في العربية للقطر - طفاية + ولاعة - اريال و يا رب مكونش سقطت حاجة طبعا بجانب الورق الخاص بالعربية للمرور و بعدين سميت و توكلت ع الله ع المرور و مونت صفيحة و ظبطت الكاوتش عشان كان ع 38 و كان جي معايا مندوب من المعرض الله يكون في عونه فضل قاعد جنبي متلبش من الغرز و ما صدق وصلنا المرور عايزين نلحق المرور اجدعان :d :d
و الحمد لله تم الترخيص و ترخيص سنة التكلفة حوالي 800 ج بالمصاريف الجانبية : الضريبة + النماذج و الاوراق + الطفاية و شنطة الاسعافات و كالعادة خدت نمرة مضروبة بالنار و متبهدلة شوية بس ارحم من ناس كتيير انا شوفت حروف مكونة بلاوي قبلي و بعدي و ربن يستر عليهم :d و الحمد لله في مرور م نصر مبيجيش يقولك أصل البصمة و فرن الشكمان طلع العدة و اشتغل عالطول و رفع البصمة
اما انطباعي المبدئي عن العربية العربية بسم الله ما شاء الله كويسة في فئتها و الاوبشنز اللي فيها ظريف و من وجهة نظري يعتبر الحد الادني للاوبشنز في اي عربية العربية سحبها افضل من بعد التاني و اعتقد ان شكلهم غيروا دواسة البنزين لكهربا في الجديد لأني ملاحظ ان فيه فرق ما بين الدوسة و عقبال ما تسمع بس هتأكد
الفرامل معقولة جداا لكن ملاحظتي ان مشوارها طويل حبتين لكن انا مرتاح معاه
العفشة متوسطة مقدرش اقل ناعمة اوي و لا اقول نشفة اوي لكن متوسطة
النقلات مشوارها قصير
التقفيل الداخلي ما شاء الله محترم و بيخفض صوت الموتور بشكل كبيير عن الصوت الحقيقي جوة بتحس انك معزول برة تحس ان فيه حمار في الموتور تفتح الكبوت تحس بعربجي :d
الساوند سيستم ما شاء الله حلو بعد ما ظبطت البيز و التريبل و ده ع الراديو كمان
ملاحظتي ع التقفيل في نقط كده زي اخر كاوتش الباب الخلفي مش مكملينه و ده لقيته في كل العربيات اللي واقفة في المعرض و كذلك نقط اللحام تقفيلها مش اد كده تحت الكاوتش و نقط التقاء الصاج هي مش عيوب قاتلة طالما فبريكة بس مستفزة و اي حد يشوفها هيعمل فيها خبير سمكرة و دهان و يقولك العربية ديه و ديه و ديه و افتي يا معلم
موضوع تأخير الدوارة حله بسيط جدااا استني لما الانوار كلها تطفي و تدور هتدور الفكرة ان طلمبة البنزين تلحق تضخ الرعشة في الفتيس عادية مش محسوسة غير للي بيدقق اوي و ده طبيعي طالما الدبرياج ع واير
موضوع تانك البنزين بالمفتاح مستفز الصراحة
فيه حاجتين حصلوا معايا انهاردة و انا مروح اخر اليوم حسيت صوت الموتور بقي اعلي فجأة و ظهر صوت طقة لما باخد المطبات لكن الصوت مش موجود في التكسيرات و اعتقد ده حسب ما اتقالي انه بسبب الضفدعة محتاجة تتشحم بس لكن لسه هجرب تاني و نشوف
في المجمل العربية ما شاء الله كويسة و تستاهل سعرها و مريحة في السواقة و تبقي قاعد شايف كل حاجة ماعدا الركن لو بترجع بضهرك انت محتاج كاميرا حتي الباركينج سينسور مش هيسد اوي نظرا لارتفاع الشنطة و ده ضايقني في الركنة في اماكن ضيقة
و طبعا فيه اوبشنز لسه مجربتهاش و هي محدد سرعة و مثبت سرعة و البلوتوث و الحمد لله جابولي العربية الهيد يونت متفعل و لسه مشوفتش كومبيوتر الرحلات
من وجهة نظري العربية محتاجة جنط 16 و كاوتش اعرض درجة او درجتين
و اخيرا و ليس اخرا ده لسه تقرير مبدئي قبل 1000 ك و ان شاء الله انتظروا تقرير بعد اول 1000 و بعد 3000 لأن حسب الدليل افضل اداء بعد 3000
و طبعا كالعادة اهم حاجة النور يا باشا يا كابتن اطفي النور يا ريس نورك والع
حاضر يا باشا انت تؤمر و حسبي الله و نعم الوكيل :d
و الحمد لله انهاردة ربنا سترها و انا مروح العربية كانت هتتخرشم الربع الامامي يمين نص نقل ماشي جنبي اكتشف انه هيدخل الشارع غلط راح كاسر شمال عالطول و انا جنبه لولا ستر ربنا و ضربت فرامل فجأة و رميت شمال و هو اتخض و وقف كان زمانها اتخرشمت لكن الحمد لله ربنا ستر و ربنا يكفينا شر الطرق و شر البهايم اللي بتسوق
و اي استفسار اتفضلوا يا رجالة
و بالتوفيق للجميع ان شاء الله

**Amr Axel** · 25-12-2014 09:57 PM

الله يبارك فيك و يكرمك يا باشا :)
بص يا باشا انا عايز اقولك ان المقارنة بدأت من فيرنا بالرغم مفيش وجه مقارنة لكن بدأت من الفيرنا و وصلت لحد الصني و الـ301 و الريو و لقيت انها قيمة مقابل سعر و ما شاء الله تعتبر افضل عربية في الفئة من 90-120 في الوقت الحالي بالاوبشن ده و فيها اوبشنز ممكن متلقيهاش في عربيات اقل فئة فيها معدية 140 و لاحظ ان اللي مساعد ع قلة سعرها هو انها بدون جمارك ديه لو بجمارك مش هتقل عن 110 من الاخر احسن عربيتين شايفيهم في الوقت الحالي لوجان و فلونس كسعر مقابلة قيمة لكن ده لا يمنع من وجود عربيات برده كويسة زي السيراتو بس مثلا شوف انت في فئة 150-160 في الفلونس تاخد تالتة اوتو في حين اللي توازيها في السيراتو توصل لـ190 لكن فيه نقطة لصالح الكورولا و الاوبل و هو esp اللي مش موجود في الفئة ديه لحد 200 الف غير فيهم
و للعلم الاوتو بتاع اللوجان هينزل اوتوماك فورميلا الجاي ان شاء الله بس الاستلام غالبا مش قبل شهر 5 او 6 و هيبقي موتور اعلي 16 صمام 2 كامة عشان اوتو بس استهلاك اعلي الحالي كامة 8 صمام بيوفر معاك و مش هتقل عن فرق 10 الاف في الفئة و بصراحة مبعترفش بالاوتو هو المانيوال او التبترونك و احوله مانيوال :)

**Hany Saad** · 26-12-2014 12:57 AM

ألف مبروك و فعلاً انا شايف ان اللوجان صفقة رابحة فى الفئة بتاعتها
منتظرين المزيد من التقارير الممتازة

تحياتى

**ARKOON** · 26-12-2014 01:38 AM

انا عندي البروشور بتاع العربية 2014 فلو Comfort يبقى فئة 3 وهما اربعة فئات لكن في المعارض ف 5 فئات ؟ أرجو التأكد من صحة المعلومة ؟ شكرا أ/ عمرو.

**ARKOON** · 26-12-2014 01:50 AM

المشاركة الأصلية كتبت بواسطة Amr Axel

3 كتيبات في جراب جلد ( شياكة )
كان جي معايا مندوب من المعرض الله يكون في عونه فضل قاعد جنبي متلبش من الغرز و ما صدق وصلنا المرور عايزين نلحق المرور اجدعان :d :d
( ههههههه إحساس جامد لما تسوق سبور وتلاقي الى جمبك ماسك في الكرسي )

الفرامل معقولة جداا لكن ملاحظتي ان مشوارها طويل حبتين لكن انا مرتاح معاه
( الموضوع تعود مش اكتر )
العفشة متوسطة مقدرش اقل ناعمة اوي و لا اقول نشفة اوي لكن متوسطة
( لسة بعد اول 5000 كم تبدأ تحكم على العربية )
مشوار النقلات قصيرة ! عشان 8 صباب
التقفيل الداخلي ما شاء الله محترم و بيخفض صوت الموتور بشكل كبيير عن الصوت الحقيقي جوة بتحس انك معزول برة تحس ان فيه حمار في الموتور تفتح الكبوت تحس بعربجي :d
( هههههههه تشبية بردو )

موضوع تانك البنزين بالمفتاح مستفز الصراحة
( انا معاك في دي )

في المجمل العربية ما شاء الله كويسة و تستاهل سعرها و مريحة في السواقة و تبقي قاعد شايف كل حاجة ماعدا الركن لو بترجع بضهرك انت محتاج كاميرا حتي الباركينج سينسور مش هيسد اوي نظرا لارتفاع الشنطة و ده ضايقني في الركنة في اماكن ضيقة
و طبعا فيه اوبشنز لسه مجربتهاش و هي محدد سرعة و مثبت سرعة و البلوتوث و الحمد لله جابولي العربية الهيد يونت متفعل و لسه مشوفتش كومبيوتر الرحلات
من وجهة نظري العربية محتاجة جنط 16 و كاوتش اعرض درجة او درجتين
و اخيرا و ليس اخرا ده لسه تقرير مبدئي قبل 1000 ك و ان شاء الله انتظروا تقرير بعد اول 1000 و بعد 3000 لأن حسب الدليل افضل اداء بعد 3000
و طبعا كالعادة اهم حاجة النور يا باشا يا كابتن اطفي النور يا ريس نورك والع
حاضر يا باشا انت تؤمر و حسبي الله و نعم الوكيل :d
: )
و الحمد لله انهاردة ربنا سترها و انا مروح العربية كانت هتتخرشم الربع الامامي يمين نص نقل ماشي جنبي اكتشف انه هيدخل الشارع غلط راح كاسر شمال عالطول و انا جنبه لولا ستر ربنا و ضربت فرامل فجأة و رميت شمال و هو اتخض و وقف كان زمانها اتخرشمت لكن الحمد لله ربنا ستر و ربنا يكفينا شر الطرق و شر البهايم اللي بتسوق
( ربنا يستر طريقك )

**Amr Axel** · 26-12-2014 02:52 PM

الله يبارك فيكم جميعا شكرا لذوقكم :)

arkoon
بص يا باشا هي 5 فئات الأولي و التانية في التمنينات
و التالتة بـ 92,5 و الرابعة 95,5 و الخامسة 97,5
ديه اسعار التوكيل حجز و استلام بعد 3-4 شهور و للعلم الحجز اتقفل دلوقتي
و بالتالي بتشتري من برة المعارض تسليم فوري باوفر برايس لا يقل عن 2000 و لا يزيد عن 5000
التالتة كل الامكانيات ماعدا جنوط سبور و باركينج سيسنور و ديه الكومفرت
الرابعة كل الامكانيات بالاضافة لجنوط سبور و باركينج سيسنور ديه هاي لاين
الخامسة كل الامكانيات بالاضافة لجنيوط سبور و باركينج سينسور و نافيجيشن ديه نافجيشن

-

الموضوع: تـقـريـر مـبدئ عـن ريـنـو لـوجـان 2015

LinkBack

أدوات الموضوع

عرض

تـقـريـر مـبدئ عـن ريـنـو لـوجـان 2015 - انشر الموضوع فى :

-

-

-

المواضيع المتشابهه

تـقـريـر مـبدئ عـن ريـنـو لـوجـان 2015

تـقـريـر شـراء و تـركـيـب سـمـاعـات بـايـونـيـيـر 400 وات

Ahmed Selim اســتشــارى قســم ريـنـو

تـقـريـر شـراء و تـركـيـب سـمـاعـات بـايـونـيـر 400 وات

الكلمات الدلالية لهذا الموضوع

المفضلات

المفضلات

ضوابط المشاركة