الموضوع: عربيتي تحت قبضة التنين !!

وائل يا صاحبى, دى بقت قواعد السواقة فى مصر, انت شارى العربية دى على الزيرو مفكرتش ليه فى الكلام دة وانت بتشترى وجبت هاتشباك ؟؟؟
جاى تبيع دلوقتى والعربية لسة عاملة 17000 كم وتروح تدفع تانى وتشترى تانى زيرو علشان تعرف تركب ؟؟؟؟
انا زيك قرفان من بتوع التاكسى والميكروباض بس حليتها بالسرينة وماشية والله زى الفل بس اوعى تممسك بيها لان فيها قضية .

قدر الله وما شاء فعل ياصاحبى .. امال تقول ايه فى الفيرنا الزيرو كانت لسه ما عملتش 1000 وكنت باركنها جنب الرصيف زى اى شخص عادى وقعدت ياصاحبى اسبوع بحاله كل يوم انزل الاقى كدمه او خربوش او خاجة جامدة خابطاها واللى كان يجننك ان الخبطات كانت من ناحية الرصيف .. حللها انت بقى تيجى ازاى .. قلت اغير اتجاه العربية بدل ما وشها الناحية دى اخلى وشها الناحية التانية .. وكان القرار الغبى لانى تانى يوم لقيت العربية مخبوطة من الناحية التانية يعنى العربية اصبحت متخبطة من الناحيتين .. قررت انى البد طول النهار والليل علشان اشوفة وامسكه فهمى ده .. وبعد كفاح مرير وتلصص ومتابعة وتجسس اتضح الاتى .. العيال الصغيرين بيلعبوا بالعجل ونهاية مشوار المسابقات بينهم كانت المحروسة توته عربيتى وكان اللى ماعهوش فرامل يستخدم توته طبعا كمصد واللى مش عارف يقف ياولاد يدخل فى عربية عمو محمد صلاح ياولاد ماشى .. وهكذا ياصاحبى بالله عليك تعمل ايه .. هو الشعب المصرى كده فهمى باقول لك فهمى .. اضحك بقى يابو نورا وروق كده وخد الامور ببساطة وانا لو منك اسيبها بالخرابيش كده مده من الزمن وبعدين ابقى افكر اعملها .. وما تزعلش نفسك عشان انت صحيح صحيح فى مصر

قدر الله و ما شاء فعل يا ابو نورا انا حاسس بيك جدا و احساس الغيظ اللي بينتاب الواحد احيانا من اهمال الاخرين بالرغم من انك بتكون واحذرك زي الكتاب ما بيقول
انا كنت موعود زيك كده ايام ما كانت معايا المازدا و للاسف الشديد كل الخبطات و الحكات كانت تتم داخل الجراج طيب قولي اعمل ايه تاني و كنت كل مرة اكبر دماغي و اصبر نفسي لغاية ما لقيت منتهي الاهمال و الاستهتار لما كان الباشا سايس الجراج بيعلم اخوه السواقة جوه الجراج علي عربية مسكين من المساكين و كانت مرسيدس و الله و دخل في الرفرف الشمال عندي عصره عصر و لدرجة ان عزم الخبطة وصل للردياتير و البطارية و شرخ التابلوه و دمر الفانوس الشمال الامامي و دمر الاكصدام و اصريت اني استدعي الشرطة الي ان تدخل ولاد الحلال وولاد الحرام برضه و حكموا اني اتحمل التلت و السايس و اخوه يتحملوا التلتين و في الاخر دفعت انا التلت اللي هو 500 جنيه و دفعوا هما التلتين اللي هو 250 جنيه بالضالين
لغاية ربنا ما رزقني باللانسر الزيرو و اشترطت علي صاحب الجراج لكي ابقي في الجراج لن ادخل الجراج ابدا باللانسر اذا اراد لي البقاء فسأركن خارج الجراج و ده أمن مكان ممكن اركن فيه و اشتريت غطاء محترم و الحمد لله مافيش حاجة وحشة حصلت الا بوسة صغيرة من ميكروباس زي حضرتك كده كنت في صينية السيوف في اسكندرية و عربية فيرنا قدامي وقفت من غير داعي لحقت انا نفسي انما الميكروباس اللي ورايا عشان كان مشغول في لم الاجرة اداني بوسة صغيرة علي حد قوله في الاكصدام الخلفي انما الحمد لله ما عملتش اي أثر و ده اللي خلاني سيبته
اللي عايز اقوله لحضرتك احنا نعمل اللي علينا و ناخد باللاسباب و نسيبها علي الله و اللي عايزه ربنا حيكون انما انا رأي ان حضرتك دايما لازم تغطي العربية لان الغطاء بيعمل شغل كبير و الله
و ربنا هو الحامي و ربنا يلهمك الصبر في الشدائد


محمد فهمي

مشكله بتواجه كل الناس و مالهاش حل شد حيلك و ربنا يعوض عليك بس اوعى تبيع لأن اللي نعرفه احسن من اللي منعرفهوش ولا كلامي غلط
و على فكره الهاتشباك مش هتحل المشكله