الموضوع: حصرياً انضمام 2015 Ciaz لعائلة سوزوكى محلياً

المشاركة الأصلية كتبت بواسطة medoxxxxxx

السلام عليكم
تجربتي مع السياز حتي 550 كيلو العداد
الثبات علي السرعات العالية حلو جدا
ارتفاعها عن الارض ممتاز يعني بتتحدي اي مطب
استهلاك البنزين اكثر من الممتاز متوسط 19 كيلو للتر عند سرعة 120
سحب العربية حلو جدا مع العلم انها 1400 سي سي
كماليتها محترمة جدا جدا
عزل الصوت ممتاز
بلوتوث العربية مع التليفون نقي جدا
التكييف حلو
مع العلم باني لم اقم بصيانة ال1000 كيلو
بجد تقيمي الشخصي 9/10
بنصحكو بيها اللي بيفكر يتوكل علي الله و مش هايندم
المقارنة بتاعتي كانت مع اللانسر القرش والسوزوكي كسبت
العربية معايا بقالها 5 ايام
ده تقرير منجز و هارجعلكم إن شاء الله لما اروح التوكيل واعمل صيانة ال 1000
السلام عليكم ورحمة الله وبركاته

فى الانتظار وربنا يبارك فيها ويكفيك شرها

المشاركة الأصلية كتبت بواسطة mohamed.ramah

هو اغلب العربيات فى الفئة السعرية دة لداخل المدينة وممكن عادى الواحد يسافر بيها بس مع السرعات العالية هتكون مزعجة علشان سعة الموتور ودة طبيعى + السفر هنا بمعنى يروح شرم بالعربية ولى صديق بيعمل كدة بالكيا سيراتو موديل 2014 وهى مساعدة على دة واخر بيروح بالجيتا البحر الاحمر ومعندوش مشاكل هنا العربية مع المشاوير دة مش حتنفع لطبيعة الطريق والجو وسعة الموتور ليها عامل حتى لو حتروح مع الوقت حتتغير القطع بتاعتها اسرع وحيبقى فى جهد على المحرك اكبر لاكن البيطلع بيها لاسكندرية مرة ولا مرتين مش حتقول لاء واغلب الناس بتكون مشاويرها داخل القاهرة وبيطحنو فى الزحمة وكثرة الوقوف المتكرر وهنا العربيات السعتها اقل بتكون افضل فموضوع التماسك دة لو العربية فى الطبيعى على طريق زى السويس مثلاً ولا الاسماعيلية ولا لاكتوبر ماشى 120 فما فوق وحاسس انها ملاهى وعدم اتزان والعربية تخليك مقلق هنا بقى فية مشكلة ودة المش طبيعى ولسة برضو كل دة والعربية متجربتش علشان نحكم ان التيل حيتغير بسرعة او حيبقى فيها مشكلة فى التيل او الطنابير الا لو حضرتك تعرف حد حصل معاة المشكلة دة خارج مصر و علشان كدة قولت منقدرش نحكم غير لما تتجرب فى المشاركة السابقة ..

احبائى - كل العربيات اللى فى الفئة دى اسمها سيتى كار - يعنى عربيات لاستخدام المدينة -تروح الشغل تودى مدرسة - تودى النادى وكده - بس مش عايزيين ننسى ا المصريين كانو بيسافرو ب 127 اللى هى 900 سى سى - او 128 اللى كانت 1100 سى سى - او 1300 سى سى - الفكرة من كلامى العربيات دى كلها مبالغ فى سعرها وخصوصا الهونضاى اللى بقت اسعارها هبل - بس على حد علمى ان السياز نازلة بتورشن بيم وده بيساعد على ثبات العربية بقدر كبير مع وجود عوامل امان زى abs ebd - بباقى الكماليات تبقى بفهوم السوق صفقة كويسة وخاصة ان العربية بتعمل 400 كيلو فى الصفيحة ودى نقطة تحسب ليها لاننا هشوف ايام سودة فى سعر البنزين - واللع المستعان

المشاركة الأصلية كتبت بواسطة deshahcoka

مفيش مثبت ولا سنسور خلفي ولا فاميه هههههههههه بس شغال يعني مفيش حاجه كاملة و الا كانت اكتسحت عربيات السوق لحد 200 الف جنيه :)

ممكن حد يأكد لنا هل فتيسها cvt ولا اوتوماتيك عادى