علاقة الميجان 1 و اللوجان - سؤال فنى ؟

**amr123** · 03-11-2008 05:43 PM

السلام عليكم ...ازيكم جميعا

عندى سؤال فنى شوية ... انا معايا لوجان سيدان و اعرف من خلال المنتدى الجميل ده انه موتورها هو نفس موتور الميجان 1
سؤالى بقى :
هل عشان هما نفس الموتور يبقو زي بعض فى كل حاجة جوه الكبوت يعنى مثلا
الفلاتر هل نفس النوع بتاع الميجان 1 ..هل في نفس المكان
و نفس السؤال للباقى ...نفس السيور ...و ..و

وشكرا

**amr123** · 05-11-2008 02:45 PM

مفيش امل حد يرد عليا :(

**محمد عز** · 06-11-2008 06:19 AM

الحقيقة انا معرفش صحة المعلومة اوى

بس صعب موتور عزمه وعدد احصنته قليل ، ده غير ان نسبه انضغاطه واطيه علشان يشتغل ببنزين اوكتانه واطي
يكون لعربيه زى الميجان لانها عربيه كبيره وتقيله

**Ramy_Tantawi** · 06-11-2008 06:42 AM

السلام عليكم...........ازيك يا باشمهندش عمرو يا رب تكون باحسن حال ان شاء الله.

بالنسبه للمعلومه هي صحيحه وانا كنت ذكرتها في موضوع عملته هنا عن اسعار بعض قطع غيار اللوجان وكان نص الاجابه من التوكيل لما سألتهم قالوا .

موتور اللوجان هو موتور الميجان 1 لا اختلاف.
قطع غيار اللوجان في حاجات بتمشي عليها ميجان 1 وفي حاجات بتمشي عليها كليو وده كان اجابه لسؤال التوكيل هل انت مهتم بقطع غيار العربيه لأنها جديده في السوق وممكن مانلاقيش قطع غيار ليها ؟؟؟ فكانت الاجابه زي ما ذكرت سلفاً ان 60% تقريباً من مكونات اللوجان متاخده من الميجان 1 والكليو.

طيب السؤال عن هل الفلاتر والكلام ده يمشي ؟؟ في الغالب يمشي طالما نفس الموتور وتأكيداً للمعلومه دي والوحوش يأكدوا على كلامي فيها ان شاء الله موتور الميجان 2 عندنا هو موتور السينيك ولذلك قطع غيار هنلاقي مكتوب عليها Scenic يعني فلتر هواء.....تيل فرامل خلفي......وشوية حاجات كده .

يا رب اكون قدرت اساعد حضرتك ودمتم بأفضل حال يا باشمهندس عمرو ان شاء الله.

**amr123** · 06-11-2008 10:37 AM

استاذ رامى ...اسمحلى اشكرك بشدة :) ..منتحرمش منك

**Ramy_Tantawi** · 06-11-2008 03:33 PM

العفو يا باشمهندس عمرو انا لم افعل شيء يذكر وجزاكم الله خير.

**amr123** · 06-11-2008 06:17 PM

طيب يا استاذ رامى هل فيه اي كتالوج اوكتاب تعرفه للصيانه للميجان 1

اصل انا عايز اتعلم العربية شوية من جوه ...يعني مثى الضفيرة ...اماكن السيور وكده
عشان بحب اشتغل ساعات في العربية بنفسي بس لما اكون فاهم فيها ,,,لو تعرف حضرتك حاجة زى كده ختى لو للقراءة فقط من غير ما انفذ منه حاجة هيكون مفيد جدا

و لكم جزيل الشكر

**Ramy_Tantawi** · 08-11-2008 10:37 AM

آسف جداً على التأخير يا باشمهندس عمرو والله لضيق الوقت مش أكتر تقبل اعتذاري ارجوك...........بالنسبه لسؤال حضرتك انا لا املك للأسف كاتالوج حاليا لميجان 1 لكن جاري البحث ان شاء الله واول ما الاقي حاجه تفيد حضرتك هانزلها على طول ان شاء الله.

تحياتي ,,,,,,,,

**amr123** · 08-11-2008 12:21 PM

المشاركة الأصلية كتبت بواسطة Ramy_Tantawi

آسف جداً على التأخير يا باشمهندس عمرو والله لضيق الوقت مش أكتر تقبل اعتذاري ارجوك...........بالنسبه لسؤال حضرتك انا لا املك للأسف كاتالوج حاليا لميجان 1 لكن جاري البحث ان شاء الله واول ما الاقي حاجه تفيد حضرتك هانزلها على طول ان شاء الله.

تحياتي ,,,,,,,,

يا باشا انت تتأخر براحتك ....لا داعى اطلاقا للاعتذار ...حضرتك اخ كريم و مش ملزم بحاجة
لما وقتك يسمح و يجيلك مزاج كمان :)

وشكراااااا