الموضوع: هتجنن خلاص ....عندي جراج خاص وموش عارف اركن فيه !!!!

ربنا كرمني وعندي جراج خاص في العمارة اللي أنا ساكن فيها وبركن فيه عربيتي ...طبعا لغايه كده تمام وكل الناس هتقولي يا بختك....
اللي مجنني بقي أني موش عارف اركن فيه وكل يوم معكنن عليا ....
وأنا خارج الصبح لازم الاقيلي عربيه ولا اتنين واقفين قدام الجراج ....وعقبال ما صاحبهم ينزل (إذا ربنا كرمني طبعا وعرفت صاحبهم بسرعه :) ) أكون اتعطلتلي بتاع ربع ساعه ولا تلت ساعه ...
أرجع من الشغل (برجع متأخر دايما يعني 10 أو 11 بالليل ) في معظم الأحيان الاقي واحد ظريف راكن عربيته قدام الجراج ...ويتكرر موال الصبح

وكل واحد ينزل يعتذرلك ويقولك معلش ..ملقتش مكان ...كان عندي ظرف .... لسا راكن من 5 دقائق وكنت هنزل أشيلها ....قاموس الحجج اللي حفظته

وطبعا بقي لما يبقي ضيف جاي لحد في الشارع وراكن ...بتزبط عقبال ما الاقي البيه اللي مضايف البيه اللي راكن ... وطبعا الجمله الشهيره ...معلش أصله ضيف وغريب موش من المنطقة ....

أنا موش عارف أعمل ايه ....وكاتب بالبنط العريض علي الجراج "جراج خاص ....ممنوع الوقوف"
أنا موش عارف الدنيا جرا فيها ايه ....أنا عمري ما بفكر أركن قدام أي جراج ...حتي لما حد بيقولي دا المكان بتاع حد بيركن فيه بدور علي مكان تاني ...مع انه مكان في الشارع يعني موش ملكه ....

في ناس قالتلي حط حديد وسلاسل وطوب ....بس سمعت ان الحي بيجي يخلع الحديد ويعمل مخالفه للي حاطه ....جربت الطوب والحجارة والدبش مفيش فايدة برضوا ..بيتشال وبيدغدغ
أنا راجل محترم وموش بتاع خناق ولا زعيق وبحاول أفهم الناس بالحسنه ان اللي بيحصل ده غلط ...بس الناي بترجع تعمل الموضوع تاني وتطلعلي بحجج ...

موش عارف أعمل ايه ....لو كنتوا مكاني ...هتعملو ايه

أنا رأيى فى الخباثة كده كل ما حد يركن أمام الجراج فضيله العجلتين اللى ناحية الجراج. ممكن بعد كده فى حالة التكرار مسمار صغير فى الباب أو الرفرف- بتكلم بجد!. أصل دى ناس معندهاش دم!