الموضوع: بفكر انا و صحابى نفتح كافيتريا

باختصار شديد طالما مش حتشتغل بنفسك وتكون عارف اسرار الشغلة ماتدخلهاش لانك حتتسرق لانك مش متفرغ وكمان مش خبير باسرار المهنة غير ان الصنايعية علشان عارفين انهم مشغلين الشغل حيلاعبوكم علي الشناكل

أهم حاجة المكان وتجهيزة .
هل هتأجر قهوة كانت واقعة و قفلت بسبب ان مفيش اقبال, أو بسبب مشاكل مع السكان أو مع المرافق ؟
ولا قهوة صاحبها هيسافر مثلا وانت هتاخدها منه شغاله ؟
ولا هتعمل انت القهوة من الأول ؟

كل طريق من دول ليه مخاطر و ليه تكلفة. أنا من 7 سنين كنت هعملها و القهوة شغاله و في شارع رئيسي كان مطلوب الايجار بس 15 ألف في الشهر و اختلفت انا و شريكي لان هو كان رايه ان لازم نخلي الشيشة لانها اساسية في جذب الزباين في المكان دا وانا كنت رافضها.

لو هتبدأ من الصفر محتاج تراخيص و تظبيط في المكان اللي انت فيه من ناحية السكان والمنطقة وهتحتاج وسايط او حماية زي ما بيقولوا. ولو هتاخد مكان كان واقع, لازم تعرف مشاكله كلها بالظبط, وتسأل في المنطقة. و اسهل مشاكل بتبقى ان الناس مش بتيجي بسبب الغلاء بتاع الحاجة أو عدم الجودة وعدم التنوع. المشاكل الكبيرة بتبقى مع السكان, او عن سمعة المكان (فيه قهاوي مشهور انها بيتلعب فيها قمار وبتتقفل للسبب دا). فلازم تكون فاهم كويس المشاكل و عندك قدرة على انك تعالجها.

هتحتاج 6 عمال. عامل واقف على النصبة صنايعي. و عامل توزيع الطلبات على الزباين. و عامل بيوضب المكان لما الناس تقوم و يساعد في الرقابة وحساب الزباين برضه. دول تلاته و بيغريهم تلاتة تلاته تانيين في وردية تانية.

التلاجة بتاخدها من شركة كوكاكولا او بيبسي مجانات. والخامات لا تذكر في التكلفة بالنسبة للدخل. 300 جرام شاي ليبتون وكيلو سكر بيعملوا حوالي 50 كوباية شاي. يعني 10 جنيه خامات بيجيبوا 75 جنيه (لو حسبت الكوباية ب جنيه ونصف)

دي حدود معلوماتي. لو افتكرت حاجة تاني هقولهالك ان شاء الله

بلاش شيشه
شد حيلك ربنا الرازق