هي البطارية ليه بتنام لو مدورتش العربية ؟؟

**م.محمد مختار** · 12-01-2015 06:06 PM

السلام عليكم..
هو ليه بطارية العربية بتفضى لو العربية اتركنت اسبوع مثلاً ؟؟ الكهرباء بتروح فين ؟؟

أختي مسافرة وسايبة عربيتها (127) تحت البيت. كنت بدورها كل شوية بس لما الدنيا بردت كده بقيت أكسل. طبعاً البطارية نامت خااالص.!!

1- هل الأفضل أسيبها نايمة وخلاص لغاية ما ترجع من السفر (ولا ممكن تبوظ) ؟؟
2- وهل لو فكيت البطارية من العربية -بعد ما تتشحن تاني- تحتفظ بشحنها مدة أطول ولا مش فارقة ؟؟
3- وايه حل إني لما أسيب العربية ال127 يومين تلاتة لازم أقعد أكارك عشر دقائق علشان العربية ترضى تدور ؟؟

شكراً مقدماً :)

**م/أحمد عبد الفتاح** · 12-01-2015 10:42 PM

راجع على كابلات البطارية الموجب والسالب يكونوا مربوطين كويس والقواطيش تكون سليمة - والبطارية والقواطيش نضاف مش مكونين ملح اخضر- لو كانوا مملحين نضفهم - كمان تشيل البطارية من مكانها لو لقيت فى الصندوق اللى قاعدة علية البطارية ملح برضه نضفه- كمان شوف مستوى السائل فى البطارية - لما توديها تشحنها عند الكهربائى خليه يقيسها ويكملها المية بتاعتها (ميه بحامض) وبعد مايشحنها كويس إعمل بيها مشوار - عموماً لما تدور العربية بعد كده علشان تشحن البطارية إمشى بيها شوية لأن الشحن إللى بتشحنه وهى واقفة مطرحها حايضيع فى الدوارة بتاعتها تانى يوم .
ولو حاتركن العربية اسبوع ولا ١٠ ايام إبقى إخلع القواطيش أضمن.