شكر للقسم وسؤال ضروري جدااااااا

**smoke_vfx** · 28-01-2015 01:26 AM

بص يا صديقى مبدأيا مبروك عليك العربيه وربنا يباركلك فيها انا هانققلك تجربتى الخاصه علشان نا تقريبا وقعت فى كتير من اللى انت بتقوله واحب اقولك ان شاء الله ... مبدأيا انا شخصيا لسه عامل عمرة للموتور بتاعى وماردتش اجيب موتور استيراد بالرغم انه ثمنه 3000 جنيه كامل بالفتيس بس خلى بالك بقى اولا المواتير الاستيراد مش كلها مضمونه لان بمنتهى البساطه الموتور انت ماتقدرش تفتحه وتشوفه عامل ايه وممكن تركبه عادى ويمشى معاك كويس وبعد كده تلاقى بلاوى لان ده حصل معايا وللعم انا عمرت الموتور لان الموتور عندى بقى بيجيب دخان بس ابتدى ابيض وبعد كده ماشاء الله جاب اسود وكحلى وحاجه زى الفل وللعلم ماكنش فيه لا طحينه وسحب العربيه ممتاز ومافيش سخونه بس مجرد ماحلينا الموتور لاقينا وش السلندر مش متاكل هو مش موجود اساسا والموتور ده جاى ماكملش 6 شهور بمعنى ان اتنصب على اللى اشتراه وانا اتدبست فيه من بعده وعرفت القصه ان فى مواتير بتيجى من دول زى جنوب افريقيا وبلاد بتبقى المواتير جايه معدومة العافيه اصلا واللى هايبعلك موتور هايقولك معاك 15 يوم بس تجربه وانسى ان فى الوقت ده اى حاجه تبان وقررت انى اعمل العمره لكن عند واحد بيفهم الفليشيا لان الموتور لما بيتحل ممكن يتوه اى ميكانيكى مش فاهم فيها اساسا فانصيحه لو الموتور حالته كويسه يعنى وانت هاتغير وش السلندر وتعمل عمره يبقى اعملها احسن اهو الموتور مفتوح قدامك وانت عارف اوله من اخره ولو العمره اتعملت صح هاتحس بفرق انا عملتها والحمد لله الامور تمام بس ده لان ربنا كرمنى بحد بيفهم فيها فاخلى بالك ولو عاوز تشترى فتيس هات فتيس لواحده عادى وقبل ماتغيره لازم تعرف ايه مشكلته اصلا وماتسرحش اوى مع كلام الصنايعيه لانهم لو حسو انك مش عارف هايغرمك كتير ... ربنا معاك انا نقلتلك تجربتى وارجو انك تستفيد بيها الفليشيا عربيه ممتازه فعلا بس عاوزه اللى يفهمها ويقدرها

**هيثم كامل** · 28-01-2015 12:26 PM

الف شكر يا صديقي
افادتني جدا بمعلومات انا في اكس الحاجة اليها
وبتمني ت
1..شرح بالتفصيل عن العمرة والاسباب اللي خلتك تعملها ?
2..وبقالك اد ايه عاملها ?
3..وازاي بتلين بعدها ?
4..ونتيجتها عامله ايه ?
5..وعنوان الميكانيكي اللي عملها ?
6..وكمان اتمني تحكي اي معلومة عن فليشيتك ربنا يباركلك فيها
عشان كل معلومه هتقولها هتفيدني

**smoke_vfx** · 28-01-2015 01:13 PM

بص يا ريس انا عربيتى فليشيا 98 وش اوكتافيا كربراتير مش انجكشن السبب اللى خلانى اعمل عمره هى الدخنه لان العربيه فى اخر مرحله طلعت دخان بالعبيط ولما روحت للميكانيكى قالى ان شاء الله هانعمل طقم شنبر وبس على اساس ان الموتور ده متغير من 6 شهور انا مشتريها من 3 شهور وصاحبها اللى قبلى كان مغير موتور قبلها بـ3 شهور وطبعا اول ماحلينا اكتشفنا ان وش السلندر متاكل تماما حتى ماينفعش يتعمل فيه اى حاجه وكمان لاقينا البساتم فيها مشكله المهم الراجل قالى احنا كده هانحتاج لعمره او انك تسقط موتور استيراد لحد ماقررت موضوع العمره والحمد لله هى بقالها حوالى 10 ايام واهم حاجه ان اللى يعملها يكون فاهم اوى وعملها قبل كده لان موتور الفليشيا مش بسيط ومش اى حد يتعامل معاه اولا عملناها غيرنا بوجيهات وفلتر وزيت طبعا العربيه بتدور وهى واقفه يوم كامل وبعد كده التحرك يكون بهدوء ماتقرصش عليها لفتره يعنى ماتعديش بيها 80 كيلو فى الاول لحد مالموتور يلين ودى حاجه ممكن تاخد شويه يعنى انا مشيتها كتير والحمد لله طبعا الموتور بفضل الله الدنيا تمام جدا وللعلم مهم اوى كمان الميكانيكى اللى تتعامل معاه يكون فاهم نوع قطع الغيار وايه افضل وفى نفس الوقت يوفرلك انا شخصيا جبت وش سلندر فيكا بـ1200 جنيه وعاوز اقولك انا قبل اى خطوه بدخل واقرى عن الشركات اللى بتعمل قطع الغيار فيكا وارمى كلام للصنايعى اشوفه فاهم ولا لا الفيكا صينى اه لكن ممتاز ومش فى كل حاجه انا شخصيا عمرت بالفيكا والحمد لله تمام جدا والصنايعى نفسه عارف كده كويس ومجرب فى اكتر من عمره وطلع فعلا بيفهم العمره كلفتنى بالمصنعيه 2500 جنيه لكن انا مطمن لان الموتور قدامنا وعارفين فى ايه ومافيهوش ايه انما هاتسقط موتور زى ماقولتلك مش مضمون واحنا حاليا فى حاله غير طبيعيه من عدم الضمير فا لو الموتور عندك عاوز عمره ويشتغل كويس يبقى تعملها انما لو الموتور كله متدمر يبقى تجيب موتور بالفتيس وانا شخصيا سالت عليه وقدرت اوصله لـ3 الاف ... بالنسبه للميكانيكى اللى بتعامل معاه هو بعيد لان هو فى ناهيا لكن مارتحتش مع حد تانى وهو ممتاز وفاهم جدا وعنده ضمير انا من بولاق الدكرور لو احتاجت اى حاجه معاك ان شاء الله والمنتدى هنا مليان ناس كويسين ومحترمين