الموضوع: اختلافات بين جداول الصيانة في مصر و امريكا للرانجلر

الرانجلر ليها عدة طرازات أشهرهم sport, shahra, rubicon وفيه طرازات تانية غير دول (هما تقريباً كلهم ٩ طرازات مختلفة بتنزل كل سنة بس بكميات صغيرة زى الـ X , willys wheeler, freedom edition)
وأى طراز من دول بنزل منه بابين و٤ أبواب بيطلقوا عليها unlimited يعنى طرازات لاحصر لها بتنزل كل سنة بس التلاتة ألأولانيين دول الأكثر إنتشاراً وكلهو بيشتركوا فى نفس الموتور ومعظمهم بيشترك فى نفس الجيربوكس بس نيجى للـ transfer case وال front axle والـ rear axle حنلاقيهم بيحصل شوية إختلافات حسب الطرازات اللى ذكرتها فوق . ممكن يكون الكتالوج بتاع الصيانة والاستخدام ده لطراز او طرازين بس مش لكل الطرازات فيه طرازات تغير زيت الـ transfer case على مسافات كبيرة وفيه طرازات بتغيره على مسافات أقل ( حسب نسبة تخفيضه وحاجات تانية فى تصميمه) كمان ال Front and rear axles نفس الوضع طرازات بتغير الزيت على مسافات كبيرة وطرازات على مسافات اقل ( حسب نوع الكورونة open ولا limited slip وحسب كمان طراز الكورونة).
وحاول تقرا الموضوع بتاع الكورونات الخلفية والموضوع بتاع الكورونات الأمامية هنا فى قسم الجيب علشان تقدر تحدد طرازات الكورونات بتاعتك وتحت أمرك فى أى سؤال او إستفسار تانى.

المشاركة الأصلية كتبت بواسطة stonecoldmido5

الف شكر لرد حضرتك, و طبعا استفدت من شرح حضرتك عن الكورونات الامامية و الخلفية , ووفقا لشرح حضرتك فان الكورونا الخلفية عنديDANA super 44/226 , بس جدول الصيانة الامريكي بيتكلم عن نظامي COMMAND-TRAC®/ROCK-TRAC الطرازين ببابين و 4 ابواب علي حد سواء , و طبعا سيادتك عارف ان اللي بتنزل في مصر command trac بنفس طراز الكورونا الامامية و الخلفية اللي بيتكلم عنها جدول الصيانة الامريكي بنفس تركيزات الزيوت اللي بنستعملها في مصر , سؤالي لحضرتك اغير زيت الكورونا الاميمية و الخلفية كل كام كم ؟ علما ان استهلاكي للعربية استهلاك عادي مش استعمال شاق؟ و شكرا علي مجهود و اهتمام حضرتك

كلام تمام - بس داخل ال command trac و الـ rock trac فيه عدة تصميمات تحت نفس الإسماء منها نوع عادة ونوع متركب عليه differential عادى ونوع متركب عليه Differential LSD ( على الـ transfer case NV241) - وسألت ناس فى أمريكا طلعوا بيغيروا على ١٢,٠٠٠ ميل هما كمان ( حتى لو إستخدامهم مش اوفرود كتير) يعنى حوالى ٢٠,٠٠٠كم تقريباً.
الخلاصة ان تعليمات التوكيل مظبوطة ومش غلط .
والكورونة الدانا ٤٤ الأمامية بتاخد حوالى لتر وشوية والدانا ٤٤ الخلفية بتاخد ٢ لتر وشوية .

بص أنا مبحبش ألعب فى سائل التبريد واغيره كتير ليه ؟ أى مياه بيبقى فيها أملاح ومع سخونة العربية وسخونة المياه الأملاح دى بتترسب على جدران الموتور وتعمل طبقة ـ كل ماتغير الميه حاتعمل طبقة جديدة فيستحسن متغيرش المية كتير ويستحسن إنك بتغير سائل التبريد كل من ١٠٠ الف لـ ١٢٠ ألف ( ولو لونه كويس وشفاف ممكن تسيبه شوية كمان ـ بس أهم حاجه إن الميه تكون عليها المانع بتاع الصدا بتاعها - بالنسبة للزيوت أنا باغير عند واحد إسمه سامح فى الأزاريطة ( وعنده ميكانيكى اسمه محمد وواحد تانى اسمه حامد الاتنين كويسين) فى الشارع بتاع الكليات النطرية بعد ماتعدى الترام وانت جاى من البحر حتلاقى واحد بتاع كاوتش الشارع اللى بعده على طول يمين حتلاقيه على الشمال قدام شوية- وانت كمان لو الكورونات عندك دانا ٤٤ يبقى ميت فل لأنها بطبة من تحت يعنى مش حاتفك غطا الكورونة وتعمل جوان سيليكون وتستنى ينشف وكمان الطبة عليها مغناطيس لازم اول ماتتفك تبص عليها لو فيها رايش حديد او حاجه . أنا مبحبش البنزينات فى غيار الزيوت لأنهم بيبوظوا الطبات لو مش من اول مرة حايبقى من تانى او تالت مرة بالكتييييير.
بس عندى سؤال هو الكرورنة الأمامية عندك فعلا دانا ٤٤ ولا دانا ٣٠ لأن ٢٠١٢ كانت دانا ٣٠ ؟