الموضوع: ارجو المساعدة من خبراء رش وطلاء السيارة وايضا استخدام معجون الحديد

أول حاجه الفيديو : طبعاً هو بيرش حته صغيرة فى عربية و مش معقول حترش عربية كاملة بواسطة النفخ والنفخ ده بيطلع كمان بخار ميه مع البوية والدوكو عدو الميه اثناء الرش - بالنسبة للمعجون حتلاقيك كترت الدوا شوية علشان كده المعجون نشف معاك بسرعة و لتضريب المعجون بتاخد حته على الكف (بيبقى عامل زى سكينة المعجون المتوسطة بتاعة الحوائط أو زى سكينة تقطيع الهريسة - بتاخد عليها زى نصها معجون) وبتحط عليها الدوا ( انبوبة المصلب ) قد الغطا بتاع الدوا مرتين وبواسطة السكينة البلاستيك بتاعة معجون الحديد بتقلب الدوا مع المعجون كويس جداً وبعدين بتاخد حتة من الكف وتفردها على العربية وبتاخد الزيادات تانى بالسكينة وتمسحها فى ضهر الكف وبعدين تزقها ترميها وتنضف السكينة فى ضهر الكف وتاخد حته تانية من الكف وتفردها وهكذا - بس قبل كل ده تكون مصنفر تحت المعجون كويس بصنفرة حدادى ١٢٠ ولو فيه بوية بالمعجون قديمة تكسر حرفها بواسطة الصنفرة الحدادى ١٢٠ وبعدين بصنفرة دوكو ١٨٠ بالمية (يستحسن تحط على المية صابون سايل) لغاية مايبقى الحرف ناعم ومسلوب ناحية الحديد العريان . والصنفرة بتاعة الدوكو بتستعمل بالمية وبيبقى معاك زى حتة فل مستطيلة تلف عليها الصنفرة ( او لمؤخذه حتة من شبشب قديم ) :)
بعد المعجون ماينشف ويعضم تمام حتصنفر العالى بصنفرة حدادى ١٢٠ وبعدين بصنفرة دوكو ١٨٠ بالمية وبعدين بصنفرة دوكو ٢٢٠ بالمية . ولو لسه فيه حته واطية اديلها معجون حديد تانى وبعدين كرر نفس الحكاية . بعد متلاقى المعجون بقى ناعم جداً وفى نفس مستوى البوية القديمة حتغطيه بحاجه إسمها مستيكة بس تشترى لون مخالف عن لون المعجون وتعملها بنفس طريقة المعجون وهى مبيبقاش ليها دوا يعنى من العلبة للسكينة وخلى بالك إنها طرية عن المعجون وممكن تقع من على السكينة فبتاخد كمية صغيرة من المستيكة وتفردها على المعجون - ولما تنشف المستيكة بتصنفرها بصنفرة دوكو ٢٢٠ بالمية وبعدين بصنفرة دوكو ٣٦٠ بالمية لغاية متلاقى إن العربية بقت ناعمة وكلها مستوى واحد لما تمر عليها بإيدك وبعدين حتصنفر العربية كلها بصنفرة دوكو ٣٦٠ بالمية حتى لو فيها بوية من القديمة برضه حتصنفرها بس مش الغرض انك تشيل البوية لكن الغرض إنك تخشنها علشان تقبل الرش والعملية دى غسمها إنك بتطفى العربية . وبعدين حتلزق ورق جرايد على الحتت اللى مش عاوز البوية تيجى عليها زى البرابريز الامامى والخلفى والشبابيك والأكر والفوانيس والشبكة والإشارات وتغطى كل عجلة بشوال بتشتريه من عند أى فرن .
بعدين حتشترى بوية دوكو بطانة علشان ترش العربية كلها بيها - وبعد ماتنشف تمام حتصنفرها بصنفرة دوكو ٣٦٠ بالمية علشان حيبان معاك شوية عيوب حتغطيها بالمستيكة وتصنفر المستيكة تانى بعد ماتنشف بصنفرة ٣٦٠ بالمية.
بعد ماكله بقى تمام العربية بتبقى جاهزة للرش النهائى .
هو موضوع محتاج تمرين جامد ويستحسن تجرب تمعجن حتة حديد بره العربية فى الأول لغاية إيدك ماتمشى

المشاركة الأصلية كتبت بواسطة ahmed_eng2001

ربنا يكرمك و يباركلك .... رد اكثر من رائع و مفيد جدا جدا


عربيتى كان فيها بارومة و عملتها ..... فيه ناس كتير نصحتنى انى انزل البوية كلها و ارش العربية كلها من اول و جديد ... شوية اسئلة فى السريع كدة .....

1- اعمل كدة فعلا ؟ و لا بلاش ؟ امعجن الحتت الجديدة دى و ارش العربية كلها برضو بس من غير ما اشيل البوية القديمة ؟
2- احط معجون على الحديد على طول ؟ و لا ارش برايمر الاول ؟

الله يخليك يابوحميد
الشغل كان فى حتت كتير ولا فى أجزاء لو كان مثلاً فى رفرف ولا باب يبقى تعمل اللوحة كلها يعنى الرفرف كله او الباب كله وتجرب اللون فى حته صغيرة الأول وبعدين ابقى صنفره علشان ممكن يكون اللون الاصلى بتاع العربية بهت - ولو كانت كتير يبقى العربية كلها أفضل .
يستحسن بعد ماتصنفر الحديد وتنضفه إنك ترش إيبوكسى أحسن من البرايمر وده فيه منه نوع مصرى اسمه كابسى تقريباً ونوع مستورد بس المستورد أغلى والإتنين كويسين على فكرة وبيبقى معاه مادة تانية مصلب بتحطها على البوية قبل الرش مباشرة وبعد الايبوكسى تمعجن وتعمل الخطوات.
لو البوية القديمة تحتها كويس ومافيش صدا وسمك المعجون مش كبير وكمان المعجون متماسك فى العربية ومش فاصل يبقى سيبها ومعجن الحتت البايظة وبعدين رشها مرة واحدة وأقولك على نصيحة بعد ماتمعجن العربية وتبقى جاهزة للرش وديها لفرن دوكو أحسن وهما هناك حيرشوها وبياخدوا مبلغ مش كبير - كل بتوع الدوكو بيعملوا كده ـ عمرك شفت ورشة دوكو فيها فرن؟
ولو عاوز تشوف البوية والمعجون القديم متماسك ولا لأ ـ بسن سكينة معجون ( سكينة حديد ولا استانلس) حاتيجى على حته بين الحديد العريان والحديد المدهون القديم وتبدأ تحاول تشيل البوية بالمعجون القديم ببوز السكينة ( من زاويتها يعنى) لقيتها ماسكة جامد يبقى سيبها - لقيتها بتطلع معاك زى قشر كده خليك معاها لغاية ماتوصل للحتت المتماسكة .

المشاركة الأصلية كتبت بواسطة star200

استاذى الفاضل احمد عبد الفتاح اشكرك جدا على الرد ومدى براعتك فى الشرح وربنا يجعلة فى ميزان حسناتك وفعلا شرحك مبسط وعلمى ويدل على مدى الخبرة ولكن ارجو انا يتسع صدرك لبعض الاستفسارات اولا حضرتك بتقول تاخذة نصف سكينة المعجون بلمعجون الحديد واحط زى ملو الغطاء المصلب اوكى انا جربت الحكاية دة واول ما حطيت ما فتش دقيقة ولقيت المعجون حيبدء ينشف فى السكينة ومش حعرف اتعامل كعة فى الصاج ومعلومة لحضرتك انا عربيتى دوكو ميتالك وفى شرح حضرتك دة اكثر من خطوة عشان اوصل الافضل نتيجة وهل طبقة الدوكو الاولنية للى هيا الفلير ولا اى واسف على الاطالة

يبقى كده المصلب ( الدوا) كتير شوية حاول تقلل نسبته - المعجون والمستيكة بيعتبروا فيلر ( مادة مالئة ) والبطانة تعتبر مادة الربط بين الدوكو والفيلر وفيه ناس بتعتبره فيلر هو كمان - وابقى خد حتة معجون صغيرة فى الاول وجرب برة العربية - ممكن كمان نوع المعجون وحش او تاريخه قديم - ومتنساش كمان انك تقلب المعجون فى العلبة بتاعته كويس قبل اى حاجه لانه متعبى مواد فوق بعض مش مخلوط - بالنسبة للبوية لما بتروح لبياع بوية الدوكو قله على اللون وهو حيديلك البوية والبطانة الى لونها يناسب لو الدوكو النهائى .