معاك 70 الف .. تشترى شيفرولية لانوس ولا بريليانس Frv ؟؟

**maka** · 12-11-2008 12:02 PM

المشاركة الأصلية كتبت بواسطة ahmedhamdy

بالتاكيد هجيب بريليانس frv
سعر منافس توكيل محترم مميزات كتير
انا زوج اخت مراتي لسه جايب لانوس مابقلوش 6 شهور
لما عرف اني حجزتها قاللي انا بفكر ابيع اللانوس واشتري ال frv
بس مشكلته انه هيخسر فيها كتير

نصيحة منى ميبعش هيخسر كتيير علشان ولا حاجة

**fadynabil** · 12-11-2008 02:21 PM

هجيب بونتو بنفس التمن
... عربيه محترمه ..... وكفايه إنها مش واخده نجمه زي ناس

**Mohamed_Ibiza** · 14-11-2008 03:35 AM

المشاركة الأصلية كتبت بواسطة sab3aawy

لو عايز عربية اكل عيش اقضى بيها مشاوير شغلى ايا كانت او عربية تشيل اسرة بدون مشاكل ووجع دماغ، طلبى منها هو الخدمة وليس المنظرة هشترى اللانوس بلا تردد

لو عايز عربية اركب لها جنوط وافيمها واركب لها عدة صوت تاخد الشطنة كلها وامشى فى الشوارى اقول بوم تش علشان البانت تبص عليا ويشوفونى راكب عربية شكلها اكتر بكتير من تمنها ومحدش عارف دى ايه بالظبط وبالتالى هتعمل معايا شغل، بس مسألش كتير بأه عن الخدمة وتوافر قطع الغيار واسعارها وسعر اعادة البيع لأنى من الاول تنازلت عن مبدأ انها عربية اكل عيش، هاجيب البريليانس

انا اديت صوتى للانوس لأنى من بتوع اكل العيش

+ 111111111111111111111

**Mostafa Taher** · 14-11-2008 12:07 PM

بريليانس Frv تتقدم على لانوس في نتائج استطلاع الراى بفارق كبير حتى الان

مفاجاة من الطراز الاول

**mido_919** · 14-11-2008 01:36 PM

لو معايا فلوس كتير ومش فارقة معايا اجيب بريليانس لو يدوبك علي ادي اجيب لانوس عشان قطع الغيار والعربية خلاص اتفقست عند الميكانيكية

**creative** · 14-11-2008 02:28 PM

المشاركة الأصلية كتبت بواسطة fadynabil

هجيب بونتو بنفس التمن
... عربيه محترمه ..... وكفايه إنها مش واخده نجمه زي ناس

+1111111111111

**mxz911** · 14-11-2008 02:34 PM

هجيب بونتو بنفس التمن
... عربيه محترمه ..... وكفايه إنها مش واخده نجمه زي ناس

يعنى ايه نجمة معلش :d

**HAZOMAL** · 14-11-2008 09:53 PM

أنا متهيألى معظم اللى اختار اللانوس هم من مالكى اللانوس وده يدل على ان السيارة عاجباهم جدا ومريحاهم وده أكبر دليل على نجاحها

ومتهيألى برضه معظم أن لم يكن كل اللى أختار frv مجربش العربية اساسا وهو من مالكى سيارات أخرى وبيقيمها من ناحية الشكل والامكانيات النظرية أعتقد لو هو ناوى يشترى مش حيشتريها

انا ممكن تعجبنى عربية جدا بس معنديش استعداد اخاطر بفلوسى وشقى عمرى فى حاجة مش متجربة بس ممكن أجربها فى غيرى هو أنا خسران حاجة

**Mostafa Taher** · 15-11-2008 12:46 PM

نقلا عن "كونتاكت كارز"

"بريليانس Frv" تكتسح السوق فور طرحها
13/11/2008 11:39:52 ص

حققت "بريليانس Frv" تحفة المجموعة البافارية الوكيل الوحيد لسيارات "بيريليناس" في مصر نجاحاً ملحوظاً فور طرحها في السوق نظرا لجاذبيتها وسعرها المغري الذي لم يتجاوز 69900 جنيه.

وفور طرحها في السوق للحجز وبهذا السعر لفترة محدودة نجحت السيارة "الهاتشباك" في زيادة الطلب عليها نظرا لأنها بمحرك "ميتسوبيشي" 1600 سي سي 101 حصان ، و2 وسائد هوائية للسائق والراكب الأمامي ، وأحدث نظام فرامل.

تتميز "بريليانس Frv" الصينية الصنع بمقصورة واسعة وتصميم داخلي جذاب ومقاعد ذات تصميم مريح وفرش داخلي فاخر ينافس فخامة السيارات الألمانية.

وتتوافر "بريليانس Frv" بأبواب مدعمة بدعامات فولاذية وهيكل صلب يساعد على امتصاص الصدمات.

السيارة الجديدة متوافرة لدى جميع موزعي ووكلاء مجموعة البافارية الوكيل في مصر الوكيل الوحيد لسيارات Bmw الألمانية الفاخرة أيضا.

وتعتبر بريليانس من أعرق الشركات الصينية ، ويتم تجميعها في مصر بواسطة المجموعة البافارية في مصنعها في مدينة 6 أكتوبر.

وقد تم إنشاء المصنع على مساحة 39.000 م2 متضمناً 76 خط إنتاج بسعة إنتاج 10.000 وحدة سنوياً من الأنواع والماركات المختلفة، وذلك بالعمل وردية واحدة. ويعتبر المصنع فريداً من نوعه نتيجة للمرونة التي يوفرها من حيث ما يقدمه من مزيج لأنواع وماركات السيارات.