الموضوع: تجريتي مع عمرة الاوبترا

السلام عليكم
عربيتي شيفورليه اوبترا 2008 منيول
عايز انقلكم تجربتي مع عربيتي الاوبترا والمعاناااه الي انا فيها دلوقتي المشكلة ان العربية انا اشترتها مستعمله ومكنش عندي خبرة في الصيانة الدورية والكلام ده وكمان كنت سيبها باستمرار للحج ولدي فمكنتش متابعها المهم الفترة الاخيرة لاحظت ان الزبت بينقص ودخنه بيضا خارجه من الشكمان والعربة كان سحبها تمام المهم
غيرت زبت والمشكلة مستمرة
روحت للميكانيكي قالي اننا لازم نفتح الموتور قلتله مش محتاجين نقيس كبس الموتور ؟؟ قالي مدام في دخنه يبقي لازم نفتح الموتور قلتله طيب هتتكلف كاام ؟؟ قالي من 1000 ل 3000 ج حسب حالته
المهم فتحنا الموتور وقالي هنحتاج نعمل عمرة كاملة !! طبعا انا كنت محتار بين موتور استيراد و عمرة موتور بس الميكانيكي فالي ان الموتور دلوقتي سعره وصل ل 7000 ج وطمني المهم اتوكلنا علي الله انا طبعا مكنتش فاضي فسبت مع الميكاميكي عربون 1000 ج علشان يجيب الي لازمه المهم الحج ولدي قالي احسن نجيب احنا الحاجه وكده فقلتله طيب ماشي المهم عطيت للحج 1200 ج علشان يجيب الي طلبات الميكانيكي الحج نزل جاب الاتي
طقم بستم وطفم سبيكه و طقم جوان وطلمبة زيت وطقم بوجيهات الحجات دي اتكلفت 1200 ج تقريبا و هكتب تفاصيلهم بالظبط بس علشان فاتوريتهم مش معايا دلوقتي بس تقريبا 300 ج طقم بستم و 370 ج طلمبة زيت وطقم جوان كوري ب 200 ج و بوجيهات ب 170 ج

المهم الميكانيكي كلمني وقالي انه محتاج

طقم شنبر


هنا بقي المشكلة والمفارقة والعجائب


طقم الشنبر كان هين الميكانيكي قالي روح للخراط علشان يقلك تجيب طفم الشنبر منين
قبل مروح للخراط سالت علي طقم الشنبر الاصلي ب 370 ج بس لازم تجبلي الشنبر معاك قالي !!
المهم روحت للخراط قالي الشارع الي ورانا ده روح عند فلان قله هات طقم شنبر 020 اوبترا قلتله هو انا مش لازم اجبله البستم قالي لا روحله بس وهو هيعرفه قلتله بس انا عايز الاصلي قالي طيب خلاص روح عند فلان التاني عنده الاصلي المهم روحت للاول قلتله علي الشنبر قالي 130 ج ياباني سبته وروحت للتاني قالي فيه نوعين الياباني ب 130ج والاصلي ب 370 ج بس هيا العربيه خليجي ولا كوري قلتله انت بتسال علشان اليستم قالي اه والافضل تجيب اليستم قلتله خلاص كلمت الميكانيكي قالي خلاص تعالي خد البستم وانا هبعتك لواحد قريب انا كنت في شارع صلاح الدين في الاسكندرية طبعا و الميكانيكي في الازاريطه المهم روحت للميكانيكي عطاني البستم وقالي هتروح لمحل شنابر بس بعد كوم الدكه كده وكلمني من عنده المهم روحتله قالي طقم الشنبر الي عندي الماني و ب 260 ج !! وطبعا في صلاح الدين بلغوني ان الياياني زي الفل !! وده الي نفهولي تماما محل الشنابر ده وان الالماني احسن حاجه وده اكدهولي الميكانكي وانا معاه علي التليفون اتوكلت علي الله وجبت الطقم والميكانيكي قالي تمام انا كده دي كانت اول دوخه !!!
اليوم الي بعده بقي كان الدوخه الاكبر


الميكانيكي طلب الاتي
محتاج كوعة مايه
اويلسيل كرنك خلفي
2 اويلسيل كامه



المهم لما روحت للميكانيكي عرفت ان الحجات الي هو طلبها دي كانت المفروض كانت مع طقم الجوان
الاويسلات يعني طب راحو فيين ؟؟ اكلم الحج بقولي مهو الطقم كان مفتوح وهو كمله اروح للاخ الي في صلاح الدين يقوليا انا كملت الطقم للحج والطقم كامل اكلم الميكانكي يقولي انا اخد الطقم مني من يومين ولما فتحه النهارده لقاه ناقص !!! المهم بعد حرقة الدم دي استعوضت ربنا وروحت صلاح الدين وكيل منصور جبت من عنده
اويل سبل كرنك خلفي اصلي ب 50 ج
2 اويل سبل كامه الواحده ب 30 ج
كوعة ميه اصليه المونيوم ب 140 ج


ولما رجعت للميكانيكي كان بيقفل الموتور والمفارقة برضه ان طقم الجوانات اللي ضاع منه الحاجه ده جوان وش السلندر مرضاش يركب والميكانيكي قالي ان ده طقم جوان نوبيرا و جوان وش السلندر مش هيركب وراح جاب جوان بمعرفته علشان يقفل طبعا الي عرفته ان طفم الجوان كوري حتي عند وكيل منصور في صلاح الدين كوري برضه ب 220 ج والميكانيكي قالي ان ان شاء الله بكرة هندور العربية وتبدء تلين وبلغني اجيب معايا 5 كبلو زيت وقالي ارخص زيت هات التعاون حتي .... وكنت انا من شهر كده كنت مغير سير التقسيمة و البلي بتاعها فقالي مفيش مشكلة واننا ممكن نغير سير المجومعة كنت سالت عليه عند وكيل منصور ب 110 الجي ام وسير التقسيمة ب 290 ج الجي ام و 90 ج الماني ...

وكده هانت وبكرة العربية تدور ان شاء الله ونشوف هيحصل ايه

الخراط ..
خراط البلوك اخد 470 ج وخرط في البلوك 020
خراط وش السلندر 450 ج بيقول انه ان كان فيه تسوس وهو لحم وقشط
بلغت الميكانيكي يحاسبه


التكييف ...
التكيف كنت شحنته وبعد شهر لقيت التكييف رجع تاني مش بيسقع
فقلت والعربية محلوله كده بتاع التكييف يشوف التسريب من ايه وهو دلوقتي بيعمل للكمبرسور اختبار كده علشان يشوف تسريبه وبعد كده بشوف المشكلة جيه منين


انا اسف للاطاله بس حبيت انقل تجربتي وافضفض معاكم لعل وعسي حد يستفيد

والله سبب الفشل كان مجهول السبب ورحت بعدها ل3 ميكانيكى واكثر يدنه يفتى فيها ويحل الوش ومفيش فايده .العربيه كانت فيها رعشه جامده بحيث متقدرش تمشى بيها وكانت ماشيه على بجهين فقط وحلينا الوش وغيرنا كل حاجه فيه ووديناه لاكثر من خراط ولكن بدون جدوى .اخر حاجه جبنا وش تانى استراد وبرده نفس المشكله فى الاخر جبت ماتور وخلصت .من الاخر كده الموضوع دخل فى 11000 جنيه يعنى لو كنت جايب ماتور من الاول مكنتش صرفت المبلغ ده .يله حسبى الله ونعم الوكيل على كل ميكانيكى معندوش ضمير ويقول اعرف وهو مبيعرفش حاجه غير الفتى