الموضوع: بعد حيره خمس شهور اخيرا فلوانس e3sr و تقرير و تقييم مفصل

اولا الحمد لله ربنا كرمني برينو فلوانس e3sr 2015 و دا بعد حيره ٥ شهور كنت محتار بين استرا و كورولا و فلوانس و بصراحه كانت الفلوانس اخر اختيار و حجزت فعلا استرا و كنت المفروض استلم ١٠/١ طبعا انا كنت بقراء كتير عن مشاكل فيها بس كنت عايز اركب الماني بصراحه ركووبه و يوم الاستلام صليت استخاره تاني و بالصدفه بكلم صاحبي لقيت معاه الاسترا و ركبتها و رحت اخدت باقي الفلوس اللي كانت معايا ١٧٥٠٠٠ و جبت بيهم الفلوانس حده علي طول مافيش تفاهم طبعا انا كنت دارس الثلاث عربيات بالمسمار و عارف مميزات و عيوب كل واحده يعني مشترتش عمياني
المهم رحت كلمت كذا معرض بسال عن العربيه تسليم فوري لحد ما لقيت معرض الملك اللي في النزهه رحت دفعت و خدت العربيه و شغلت قران و مشيت علي طول كدا انا بحب الانجاز لدرجه ان المصريه قالي هنجيبلك العربيه الساعه ٥ و سعرها ١٧٣٥٠٠٠ و بصراحه انا كنت مشتاق اركب العربيه و بقالي خمش شهور باجر عربيات لحد ما ورمت فقررت و اخدتها زياده ٥٠٠ جنيه الساعه ٢ و رحت اخدت مقدم حجز الاسترا و امنت في المصريه تبع المعرض
معاش طولت عليكو بس عشان اوضح لكل واحد محتار انك مش لوحدك كلنا هذا الرجل و اللي ربنا عايزه هايكون
ندخل علي تقييم العربيه انا استلمتها يوم الاربعاء و النهارده انا عامل بيها ١١٠٠ كم منهم ٥٠٠ سفر
الموتور ١٠/١٠ مع الاعتبار انه لسه بيلين و دا في فءته السعريه و اللتريه يعني نقول اداء مرضي جدا و هيتحسن كمان
العزل ٩/١٠ يعني تقريبا مش بسمع حاجه و انا سايق بس في احسن من كده
الثبات ٩/١٠ ودا اللي فاجءني لاني كنت متوقع اداء متواضع من التوشن بيم لاكن السياره ثابته حتي ١٥٠ مزودتش عن كده مش عايز اقرص بس هقول السياره تحتا ج esp عشان ال fish tail effict مع غرزه حاده بسياره بهذا الطول يعني لو مش هتتشاقي بالعربيه علي سرعه عاليه ١٥٠ و اكتر ولا هتحس بحاجه
التكييف ١٠/١٠ جربته في صحراء سيناء الجميله وكان مرضي و سريع و جيد التوزيع و دي حته ياباني مفيده درجه الحراره الخارجيه كانت ٣٠
الاوبشن ١٠/١٠ بالنسبه لفءتها ممتازه يعني هتلاقي كل اللي عايزه منها و فيها حاجات يمكن مش متوفره غير بسيارات اسعارها اعلي كتير بس ناقصها سينسور امامي او شاشه بها كاميرا امامي و خلفي و دي هدور عليها و لو لقيتها هقولكو
الصوت ١٠/١٠ الساوند سيستم ممتاز و نقي سواء aux cd's bluetooth usp بصراحه كل ال readers كويسه
الراحه ١٠/١٠ ودا برده في فءتها ممتازه و الكراسي مريحه سواء في الامام و الخلف و العفشه مريحه علي عكس المتوقع منها و دا عشان الsetup محترم و دا اللي بيفرق عفشتين توشن بيم عن بعض
الفتيس ١٠/١٠ ودا خليته للاخر عشان الكلام عنه كتير اولا استهلاك بنزين ممتاز استجابه مش بطيءه ولكن محتاجه انك تفهم هو بيشتغل ازاي عشان تطلع منه الاي انت عايزه مخلي صوت الموتور هادي جدا عشان ال rpm بيكون علي اقل ما يمكن بصراحه انا شايف انه فتيس عبقري جدا وليه مستقبل جدااااا
اخيرا شويه مميزات تانيه شايفها في العربيه
التقفيل محترم دليل علي quality control محترم من رينو للمصنع خارج فرنسا السياره تقفيل تركي
السياره خاماتها ممتازه بالنسبه لفءتها السعريه و افضل من منافسين كتيير اولهم الكورولا
السياره مصفحه بالكامل من اسفل ودا شيء مطمءن جدا
صدر السياره بعيد عن المتور و اي حاجات حساسه اخري يعني لا قدر الله في حاله الحادث مش هتتعور اوي ربنا يحمينا كلنا
صوت الموتور هادي و لسه هايهدي اكتر
Smart key مش هقول اكتر من عبقري
وحدات رفع الزجاج و فتحه السقف مفيده جدا
السياره واسعه جدا و عاليه خلوصها الارضي ممتاز يعني مش هتحك في مطبات بلدنا الجميله
ثانيا العيوب من منطلق ان مافيش عربيه مافيهاش عيوب
كان هيبقي افضل لو فيها esp و screen و rear viewcamera
في جزء قدام رجل الاي سايق عند عمود الاداره بتاع الدركسيون مش متقفل ودا مش عاجبني انا مش مشتري عربيه اي كلام ولا دافع فلوس قايله
الفوجات نورها مش قوي هجيب لها osram هيظبط الدنيا لما انزل اجازه
مفيض زرار ok ودي حاجه مش لطيفه علما انه كان موجود في الشكل الاول
دا الاي اقدر اقوله دلوقتي و انا شايف بصراحه انها صفقه رابحه بكل المقاييس واسف جدا علي الاطاله و لكن حبيت انقل التجربه كامله عسي ان يستفيد منها احد زي ما انا استفدت من مشاركات من سبقوني و شكرا

كمان من المميزات اللي نسيتها سير كاتينه جنزير مش rupper
الصيانات كل ١٠،٠٠٠ مش كل ٥٠٠٠ زي الاسترا
اسعار قطع الغيار معقوله نسبيا ب الاسترا
زجاج الابواب كله one touch anti pinch
مساحه الشنطه الخلفيه محترمه نور درج التخزين بالتابلوه لانه كبيييير بجد لو عندك طفل صغير ممكن يدخل جوه هههه
الجلد في الدركسيون و الفتيس و الابواب لمسه لطيفه وخامات التابلوه كويسه
اسف لو في اي اخطاء املاءيه بس انا بكتب من التقرير من الموبايل

ألف مبروك وأختيار موفق ان شاء الله
لكن ياريت تقولنا اسباب تفضيلك للفلوانس عن الأسترا والكرولا

المشاركة الأصلية كتبت بواسطة aly_elhawary

ألف مبروك وأختيار موفق ان شاء الله
لكن ياريت تقولنا اسباب تفضيلك للفلوانس عن الأسترا والكرولا

اولا مشكورا علي مرورك الكريم
ثانيا تفضيلي للفلوانس رغم اني كنت حاجز الاسترا زي ما قلت اني ركبتها يوم الاستلام مع صاحبي وصاحبي دا نمكيي جدا زيي في العربيات لقيت جلد الفتيس و زرار النور علي الشمال متاكلين و العربيه بترجرج رجرجه خفيفه اوي مش هايلاحظها غير واحد فاهم بس ماهو انا مش مشتري عربيه ب ٢٠٠ الف عشان تترجرج و الجلد يقشر و التوكيل يقولي دا سوء استخدام دا علي اساس انه علي طول ايده علي الفتيس الاوتوماتيك و كمان ايده بتعرق نابالم
طبعا دا كله زاءد اني كنت بالع صيانات كل خمس الاف بالعافيه و تكلفتها تقريبا ١٠٠٠ جنيه والتيل اللي بيصفر و يعمل ريجا في الطنابير و ب ٩٥٠ جنيه ف بصراحه تراجعت ف اخر لحظه برضو العربيه ممتازه ولكن كل الموضوع توكيل زباااااااااااااله علي كلام تعامل معه مش عارف يفهم العربيه و يحتوي العملاء يعني جلد الفتيس مش هيخسره لما يتغير
انما الكورولا من الاول خرجتها من حساباتي ليه اقول لسيادتك
اولا مش الكورولا اللي هتكون ب ٢٠٠ الف سابت ايه للاوروبي و ياريت محدش يقولي السوق احنا في مصر بجهلنا اللي عملنا للتويوتا سعر هي عربيه ممتازه لكن مش ب ٢٢٠٠٠٠ معلش انا ازود شويه و اركب اوبل انسجنيا ١٨٠ حصان علي ما اذكر
و فقر الخامات الداخليه درج التابلوه و المخدع بلاستك تقفيل الهلال و النجمه
الدركسيون اللي صممه عنده مرض نفسي مش عاجبني خالص و دي اذواق
اخر حاجه التوكيل عللي العربيه و دا اغرب تعديل شفت توكيل يعمله في العالم لان ارتفاع العربيه دا مهم جدا يترتب عليه ايروديناميه السياره من تسارع و مستوي الضغط الخلفي لاجبار السياره الالتصاق بالارض و طريقه تشتييت الهوا اللي تحت العربيه و حاجات كتير من التخر التوكيل بيفتي عشان مبيعان العربيه و النتيجه العربيه بقت زي ما بيقولو مكفيه لقدام
من الاخر اوبشن فلولنس تكسب الاتنين في فتحه سقف و زينون و دا مش عندي لاني بقارن اعلي فءات
التويوتا تتفوق auto park esp شاشه مع كاميرا في مقابل سعر ربع مليون تقريبا و قطع غيار اغلي و بعض الخامات فقيره
الاسترا لا تتفوق الا في التابلوه وهمي وهمي وهمي بجد تحفه وجنط ١٧ ودا انا بعتبره عيب مش ميزه في مصر
واسف تاني للاطاله بس حبيت انقل كل شيء بامانه

الف مبروك, ربنا يديك خيرها ويكفيك شرها

المشاركة الأصلية كتبت بواسطة bluemail

الف مبروك, ربنا يديك خيرها ويكفيك شرها

الله يبارك فيك يا فندم

ألف مبروك وربنا يباركلك فيها
الالوان المتوفرة ايه ورينج الoverprice قد إيه، ولو حشتري من غير overprice حستنى قد إيه؟
ومعلش سؤال أخير بالنسبة للفتيس: ممكن العربية تتساب مركونة على وضع ال N

المشاركة الأصلية كتبت بواسطة hany saad

الف مبروك استاذ علاء و ربنا يديك خيرها و يكفيك شرها
فعلاً الفلوانس صفقة رابحة جداً فى هذه الفئة السعرية و عربية أسرة و سفر بإمتياز مع تاتش فخامة لا تخطئه العين
اشكرك على هذا التقرير الممتاز و ان شاء الله تستمع بالعربية كمان و كمان
بالنسبة لموضوع ضعف لمبات الفوجات فأنا معاك فيه و كنت بقارنها بعربيتى السابقة الميجان ii و كانت فوجاتها اقوى بكتير
اعتقد العيب من الفوج نفسه و مش من اللمبة......الميجان كان عدسات الفوج زجاج اما الفلوانس فهو بلاستيك لأنى اتأكدت من التوكيل ان قوة اللمبات واحدة فى العربيتين و لكن تصميم الفوج و استخدام عدسة بلاستيك مش زجاج هو اللى قلل الأضاءة
طبعاً نصحتى ليك لو حبيت تغير لمبات انك تجيب نفس الوات بتاع اللمبات الموجودة بس مع شدة إضاءة أعلى ( luminous) لأن استخدام لمبات الوات بتاعها اعلى هيسخن دويل الفوج و هيسيحه....نفس المشكلة حصلت فى الكورولا و نصحت الزملا بلاش تغيير لمض اقوى و للأسف غيروا و ساح الدويل من السخونة العالية

الف مبروك مرة أخرى

تحياتى

شكرا لحضرتك
الشكر الاكبر لمعلوماتك عن الميجان و فلوانش شكلك ركيب رينو قديم شكرا جزيلا