الموضوع: تقرير فعلي عن الجيب رانجلر 2013 بعد 40 الف كم

احب اشكر كل اعضاء المنتدي المحترمين علي الدعم و الجهد المستمر في ايصال المعلومات لكل الناس بدون بخل او كلل , و ده موضوعي المتواضع عن تجربتي لجيب رانجلر انليمتيد موديل 2013 بعد حوالي سنة و نص من الشراء و حوالي 40 الف وكل الموضوع عبارة عن اجتهاد عن تجربتي الشخصية للسيارة ومن الممكن ان يختلف او يتفق معايا ملاك اخرين للسيارة .

اولا المواصفات الفنية للسيار موديل 2013 وما فوق:
تمتلك السيارة موتورV6 PENTASTAR سلندر 3.6 سي سي , ينتج قوة حصانية قدرها 285 حصان عند/6400 لفة في الدقيقة , و عزم قدره 352 نيوتن متر عند 4000 دورة في الدقيقة و تعمل السيارة بنظام كوماند تراك COMMAND TRAC, و نظام دفع رباعي جزئي Part time 4×4 لانها في الوضع الطبيعي تعمل دفع ثنائي خلفي علي وضع 2H , و تتمتع بفتيس اوتماتيك 5 سرعات مع خاصية اوتو ستيك.




ثانيا مميزات و كماليات السيارة من واقع الاستخدام :
- طبعا شكل السيارة الشبابي و طابعها الاسطوري من اهم المميزات بالنسبة لكتير من اللي بيحبوا الطراز ده من الجيب , وطبعا اللي مش متقبل شكلها من الاساس فأحسن له يختار اي موديل تاني .
- العربية سحبها فوق ممتاز و بتجمع من 0- 100 كم في حوالي 10 ثواني و عزل الموتور جيدا جدا .
- اماكن تخزينية متعددة و مساحة خلفية جيدة جدا للتخزين حوالي 1.31م2 و حوالي 2.46م2 في حالة طي الكنبة الخلفية.

- نظام تعليق لا غبار عليه من حيث القوة و المتانة يناسب جميع الطرق سواء الوعرة او الممهدة و بالتالي فهي مناسبة للظروف الحالية في الطرق المصرية.
- عربية فكرتها زي الميكانو ممكن تتفكك كلها و اسهل عربية ممكن تعديلها بدون مشاكل و خصوصا في نظام التعليق.
- ثبات السيارة مميز جدا حتي 140كم .
- الارتفاع عن الارض 262 مم والارتفاع ده في حالة وجود الاكصدام الاصلي .
- سيارة ليها شخصية علي الطريق و اكتر السيارات المناسبة للطرق المصرية .
- انظمة الامان الموجودة فيها و من اهمها نظام الثبات الالكتروني ESC و نظام المساعدة علي تسلق و هبوط التلال , نظام منع الميلان و الدحرجة , اطراف امامية تمتص الصدمات , خزان الوقود في وسط السيارة مصفح بالكامل بالاضافة الي ABS , EBD, تصفيح حديدي اسفل المناطق المهمة اسفل السيارة
- السقف القابل للازالة بالكامل , وده طبعا شعور مختلف خالص بالنسبة للي جرب .
- و من اهم الكماليات المتوافرة في السيارة : زجاج كهرباء , نظام يو كونكت و نظام بلوتوث , التحكم في النظام الصوتي من عجلة القيادة , مراية تعتيم , كاسيت بخزان اسطوانات (6 اسطوانات) و وصلة AUX , 4 سماعات و صب ووفر في المساحة الخلفية عالي الجودة و مقاومين للمياه , مثبت سرعة, حساس لقياس ضغط اطارات السيارة و تنبيه صوتي في حالة نقص احد اطارات السيارة عن الحد المسموح .
- ارضية السيارة ممكن فكها و غسلها بالكامل بالاضافة الي طبات مياه لتصريف المياه من السيارة.
- استهلاك البنزين مميز بالنسبة لحجم الموتور حوالي 11 لتر لكل 100 كم في الطرق السريعة و عدم تخطي سرعة 90 كم و الاعتماد علي النظام الاقتصادي , و حوالي 16 لتر لكل 100 كم داخل المدينة و في الطرق المزدحمة.
- سعرها مناسب بالنسبة لقدرتها و امكانيتها و عند مقارنتها باغلب العربيات اللي سعرها مش معقول في الفترة الاخيرة علما بان اشتريت السيارة من سنة بحوالي 285 الف و رخصتها 3 سنين بحوالي 15 الف جنيه.
- التكييف تلاجة في عز الحر و من اول درجة .
- قطع غيار السيارة و اكسسوارتها متوافرة في شارع شامبليون في القاهرة و بعض المحلات في الاسكندرية باسعار مناسبة بالنسبة لفئة العربية ( مثلا تيل الفرامل المامي الاصلي 800 جنية و التقليد 200 جنية , فلتر الزيت الاصلي 100 جنية, طنابير امامي 1200 جنية اصلي و 600 جنية صيني).



ثالثا عيوب السيارة من واقع الاستخدام :
- السيارة متعبة الي اقصي درجة و ده طبيعة نظام التعليق للدفع الرباعي بس في الرانجلر بزيادة شوية , و لا انصح بشرائها لاي شخص عنده مشاكل في الظهر .
- فيه شكاوي كتير من تسريب سقف العربية و الابواب للمياه و خصوصا في الامطار الغزيرة و سمعت كده كتير من عملاء في التوكيل و في كذا شكوى معمولة بالكلام ده وده محصلهش الحمد لله معايا لاني مفتحتش اصلا السقف .
- صوت الموتور عالي شوية و فيه شوية تكتكة و ده من اول ما العربية جت و بصفة عامة فهي شكوي عامة من مواتير Pentastar.
- العربية في المجمل ضيقة جدا بعكس ما هو متوقع و خصوصا الكنبة الخلفية ( الله يكون في عون اللي بيركب فيها).

- عزل السيارة من اسوء ما يكون و خصوصا بعد سرعة 100 كم.
- ينقصها كتير من الرفاهية عند مقارتها باغلب العربيات الحديثة مثل وحدة رفع الزجاج , و كاميرا خلفي او حساسات , كراسي كهربا , GPS , DVD و غيرها من وسائل الرفاهية الاخري .
- الثبات معدوم شبه نهائي بعد 140 كم في الساعة و طبعا العربية دي اصلا مش بتاعت سرعة.
- الخامات الداخلية مش كويسة الي حد ما و خصوصا التابلوه اللي ساعات بيزيق في اوقات متباعدة في الطرق غير الممهدة .
- اضاءة العربية سيئة الي اقصي درجة .

رابعا اهم الصيانات اللي عملتها في 40 الف كم ( تقريبا سنة و نص ) :
- غيرت بطارية بعد حوالي سنة و شهرين وسمعت ان ده طبيعي في المواتير الكبيرة و خصوصا اني ضايف كشافات اضاءة او فورس لايت.
- سمعت صوت تكتكة مع الفرامل مع السلانسية و سألت التوكيل و نصحوا بتغيير تيل و طنابير علي 30 الف كم بس مغيرتهمش لغاية دلوقتي.
- حساس الزيت من يومين لاني غيرت الزيت بكثافة مختلفة بره التوكيل .
- الصيانة الدورية في التوكيل كل 10 الاف كم و تشمل تغيير زيت و فلتر بحوالي 800 جنية , وكل 20 الف تغيير كل الزيوت ( دفرانس امامي و خلفي و زيت فرامل , و زيت موتور و فلتر ) و ده بيتكلف حوالي 1600 جنية.

خامسا اهم الكماليات اللي ضفتها للعربية :
- بالنسبة للاضاءة: ركبت اتنين فورس لايت بيتعلقوا علي جانبي البربيز الامامي وحسنوا الاضاءة بشكل كبير من شركة اسمها اوتو لامب و كانوا بحوالي 700 جنيه بالحامل, بالاضافة الي تركيب ليد بارled light bar بحوالي 3000 جنية بالبار الحديد و ده مش محتاج معاه اني اشغل نور العربية اصلا .
- ركبت وحدتين رفع للزجاج الامامي و الخلفي بحوالي 200 جنية بالتركيب .
- ركبت شاشة 3 بوصة بكاميرا خلفية ( رؤية ليلية ) بحوالي 500 جنية بالتركيب و ده حن ركن العربية بصورة كبيرة .

سادسا تحذيرات بخصوص صيانة الرانجلر موديل 2013 الي ما فوق :
- عدم تركيب زينون غير اصلي لان ده ممكن يحرق بوردة التابلوه و بيسبب تهنيج للكمبيوتر, و لو اي حد حب يزود اضاء السيارة يركب فورس لايت علي جانبي البربيز الامامي و ده كفاية جدا و و تركيبهم يكون عند حد فاهم في العربية علشان ميظهرش اي اسلاك .
- تحذير مهم : يجب عدم تغيير الزيت خارج التوكيل نهائي لاني عملت كده و ده ضرب عندي حساس الزيت و ظهرت عندي لمبة Check engine ودي مشكلة شائعة في سيارات جيب رانجلر موديلات 2013 الي ما فوق وفقا لمعظم المنتديات الاجنبية , اضطريت اني اروح بيها للتوكيل و غيرته في الضمان و هما قالوا ان العربية دي حساسة جدا بالنسبة نوع و لزوجة زيت المحرك.
- عدم اخذ المنعطفات بشكل حاد او عمل اي مناورات فجائية لان الرانجلر من العربيات العالية و ده بيعرضها لا قدر الله لخطر الانقلاب اكتر من غيرها و اي حد عايز عربية بتجري فوق 140 يجيب انصحه بعربية تاني.



التقييم النهائي للسيارة من وجهة نظري لو اتخيلنا ان الدرجات من 1 الي10
- الثبات 8/10 عند 120 كم , 5/10 بعد 140 كم
- الاعتمادية 9/10
- الصيانة 7/10
- التسارع 7/10
- الراحة 4/10
- الرفاهية 5/10

واي سؤال انا تحت امر حضراتكوا

تم التثبيت والتنسيق بولسطة منسق القسم