الله يسلمكم جميعاً و الحمد لله على كل شئ ... بس من الواضح إن التوكيل مش عايز يتحمل مسؤلية خطأه (عدم الإهتمام بفحص الفرامل و إيجاد سبب المشكلة و إصلاحها قبل حدوث الحادثة) و عايزنى أنا أتحمل المسؤلية كاملة و فوق ده كمان عايزنى أرجع أركب العربية تانى من غير إصلاح الفرامل, يعنى قمة الإستهتار بحياتى و حياة أسرتى و حياة الناس اللى على الطريق. وكان لازم أدرك ده لما الإستاذ حسين قالى فى بداية لقاءنا إن العربية سليمة و مافيهاش مشاكل و إنى ليا الحرية فى التوجه للجهات المعنية لو أنا مش مقتنع بكلامه.

بما إن مافيش أى إتصال من التوكيل أو من الإستاذ حسين مسؤل خدمة ما بعد البيع فى صلاح سالم سواء لإبلاغى بنتيجة فحص فرامل العربية و معرفة سبب حدفة العربية و عدم عمل نظام الفرامل, أو حتى الإتصال بيا لإبلاغى بالمقايسة و التلفيات اللى فى العربية (حتى من باب الإحترام إنه أعطانى كلمته إنه هايتصل بيا فى خلال يومين لإبلاغى بنتيجة فحص العربية بنفسه, و الكلام ده كان يوم الأحد الماضى), يبقى كدا أنا عملت أقصى ما يعمل لمحاولة إصلاح الأمر بصورة ودية (زى ماجهاز حماية المستهلك بيطلب) و خصوصاً بعد مافضلوا على مدار أكتر من سبع ساعات يتكلموا معايا و يحاولوا يقنعونى بشتى الطرق غير المنطقية و المتضاربة إن الخطأ مش من نظام الفرامل.