اول ميعاد فى صيانة التوكيل بعد شهر ونص!!!!

**AhmedElsayed** · 06-11-2008 11:18 AM

انا خلاص قرفت من التوكيل ده
كل الناس بتشكر فى دايهاتسو وتوكيل محترم
لكن انى اتصل احجز صيانة يقولى بعد شهر ونص !!!!!!!!!!!ده بقى كلام غير مقبول
فى الصيف كان الحجز بعد 3 اسابيع وقالولنا علشان ضغط الصيف والسفر
طيب ايه المشكلة دلوقتى، ودى صيانة دورية، طيب لاقدر الله لو واحد عنده مشكلة جامدة فى العربية يقعد بيها شهرين؟!!!!!!!!

ياريت ياريت محدش يجبلى سيرة ابو رواش وانه خلاص حيتفتح لان دى سورى بقت اسطوانة مشروخة ملهاش اى قيمة عندى

انا لو مسئول فى البلد دى اوقف استيرادهم لاى عربية لغاية لما يقدروا يعملوا صيانة للى موجود عندهم
ساعتها ابوراوش ده حيخلص هوا، لكن دلوقتى هما معندهومش مشكلة وعادى فى ساعة بريك فى النص واجازة جمعة مفيش مشكلة

لو انا توكيل فعلا مهتم بالناس كنت زودت ساعات العمل ولغيت اجازة الجمعة لان الضغط يبقى على الموظفين مش على العملا اللى ملهمش ذنب

انا كلمت جهاز المستهلك النهاردة وقالولى ممكن يتحركوا فيها لان فيها ضرر على المستهلكين وحبعتلهم كل الورق علشان تبقى شكوى رسمية

ياريت ياجماعة نتحرك وتقدموا اكتر من شكوى لحماية المستهلك علشان متبقاش شكوى وحيدة

ومنبقاش متعاطفين مع التوكيل اوى كده لان ده بقى استهبال زيادة عن اللزوم

**AhmedElsayed** · 06-11-2008 11:35 AM

انا عارف ان ناس كتير حتدخل تهتف للتوكيل دلوقتى وتقولى متشوف التوكيلات التانية بتعمل ايه (كان المفروض اننا نفضل نقبل اوضاع غلط ومنطالبش بحقوقنا)

لكن ادى لينك لتقديم شكاوى حماية المستهلك الكترونيا للى عايز يشارك
http://www.cpa.gov.eg/ComplaintForm.aspx

**معاذ الشرباصى** · 07-11-2008 11:16 PM

المشاركة الأصلية كتبت بواسطة AhmedElsayed

انا عارف ان ناس كتير حتدخل تهتف للتوكيل دلوقتى وتقولى متشوف التوكيلات التانية بتعمل ايه (كان المفروض اننا نفضل نقبل اوضاع غلط ومنطالبش بحقوقنا)

لكن ادى لينك لتقديم شكاوى حماية المستهلك الكترونيا للى عايز يشارك
http://www.cpa.gov.eg/ComplaintForm.aspx

استاذ احمد

اولا حضرتك لك كل الحق انك تضايق من اللى حصل, لأنه شىء مستفز

بس اعيب على حضرتك الجملة اللى محطوط تحتها خط, لأن الحمد لله مفيش حد هنا بيهلل للتوكيل, و لا بيجامل, مكن تقول بيلتمس لهم العذر زيادة

يعنى لما يكون فى موقف ايجابى منهم, بنقوله, و لما يكون فى موقف سلبى بنذكره و ننتقده

بغض النظر

انا كان لى نفس الموقف, و قبل لما الجأ لجهاز حماية المستهلك, اللى هو الخيار الاخير بالنسبة لى

اتصلت بيهم على الكول سنتر فى قسم الشكاوى و الاقتراحات, و قلت لهم يا جماعة انا ميعادى يوم 23/11, و ده مستحيل لأن كده العربية هتكون عدت الكم المطلوب بكتير, و انا طالب ميعاد يوم كذا او كذا
و بالفعل 3 ايام و كان فى اتصال بيا و تحديد ميعاد فى الفترة اللى طلبتها

بعدها حصل ظرف عندى و مستحيل اروح فى اليوم ده, الو هو 9/11, كلمتهم تانى و قلت لهم انا طالب بتغيير الميعاد, و حصل فعلا و اخدت ميعاد تانى يوم 10/11

كل الاتصالات دى مع بتوع الكول سنتر, و الاتصال الاخير بمركز الخدمة مباشرة, مع الانسة اللى ماسكة الحجوزات, يعنى من غير واسطة او حاجة

هل حضرت جربت كده؟

حضرتك بتقول ان لو حد عنده مشكلة عويصة و محتاجة حل, هل لازم يستنى شهرين: طيب حضرتك معانا هنا عضوة عربيتهم كانت بايظة جامد بسبب مشكلة فى البنزين. راحوا التوكيل مباشرة من غير ميعاد اصلا, و وتم التعامل معهم فى احسن صورة, و الموضوع اتحل و الحمد لله
اتفضل: الموضوع المذكور

انا اقتراحى لحضرتك, اتصل بمركز الخدمة مباشرة, و اطلعهم على الوضع و اديهم مواعيد مقترحة, يعنى اكتر من اختيار لمواعيد و هما فعلا هيتجاوبوا

لو حضرتك شايف ان فى تقصير فعلا ساعتها يبقى ليك كل الحق فى اللى انت تعمله, و كلنا هنؤيدك ساعتها, او على الاقل انا بتكلم على نفسى

احنا امام امر واقع, هما بيحاولوا يتعاملوا معاه و فى نفس الوقت الحلول المتاحة مش هى الافضل. ممكن نتفاعل معاهم مباشرة بالاقتراحات بتاعتنا لتخطى الامر ده الى ان يفتتح مراكز صيانة اخرى: سواء بعمل فترتين عمل فى اليوم, او اتاحة يوم الجمعة او لو فى اقتراحات تانية

عن نفسى كل لما بروح و يبقى عندى اقتراح عن حاجة, او شكوى, بكتبها هناك فى الصندوق اللى موجود فى ساحة انتظار العملاء

يا ريت حضرتك تطلعنا على اخر التطورات, و ان شاء الله الموضوع يتحل بصورة ودية

**Sharky** · 06-11-2008 12:07 PM

أولا أحييك على موقفك الإيجابى
ثانيا ربنا يعينك و تحل مشكلة تأخر حجز الصيانة فى توكيل دايهاتسو

**aliabutaleb** · 06-11-2008 12:51 PM

بجد إحنا لينا الجنة من اللي بنشوفه في المواعيد

**AhmedElsayed** · 06-11-2008 01:02 PM

يا اخ على

مهو بصراحة التوكيل ليه حق يعمل كده
مدام احنا ساكتين

حد يقولى كده ابو رواوش ده بتسمعوا عنه من امتى
انا سمعت الف مرة انه حيخلص سبتمبر 2007!!!!!! يعنى بقالنا 14 شهر مخلصش
طيب وحتى لما يخلص حيفرق اد ايه على حجم المبيعات الحالى؟
يعنى المواعيد حتبقى بعد 3 اسابيع بس مش بعد شهر ونص؟
وكده نبوس ايدينا وش وضهر ونفرح نقول الحمد لله اهو احسن من توكيلات تانية كتير!!!!!!!!!!1

غير كده مش راضى يفتح مراكز معتمدة وسايبنا نضرب دماغنا فى الحيط
مرة تانية لا قدر الله لو واحد عنده مشكلة خطيرة فى العربية، مطلوب منه يستنى شهر ونص علشان يرضوا يكشفوا على العربية؟ مش يصلحوها لا بس علشان يستقبلوها

وطبعا لو عملنا حاجة بره التوكيل يبقى علطول نسمع حتطلع من الضمان

**aliabutaleb** · 06-11-2008 01:43 PM

المشاركة الأصلية كتبت بواسطة AhmedElsayed

حد يقولى كده ابو رواوش ده بتسمعوا عنه من امتى
انا سمعت الف مرة انه حيخلص سبتمبر 2007!!!!!! يعنى بقالنا 14 شهر مخلصش

أنا شخصياً كنت حاسبها على أول شئ اتقال وكنت فاكر اني هاعمل صيانة الـألف في أبو رواش
أيامها الواحد كان متفااائل أوي
ولو ربنا مد في عمري ل يوم 15/11 هاعمل صيانة الـ 15 ألف برضة في العبور
ويمكن أعمل كمان صيانة الـ 35 هناك