الموضوع: اول ميعاد فى صيانة التوكيل بعد شهر ونص!!!!

المشاركة الأصلية كتبت بواسطة AhmedElsayed

الاستاذ الفاضل معاذ
انا مبدورش على حل لمشكلتى
انا فعلا لما قلتلهم انى حشتكى اتصل بيا واحد فى نفس اليوم وجابلى ميعاد بعد يومين!!!!
وانا رفضت لان الموضوع مش موضوع انا عايز اخلص وادام خدت ميعاد يبقى خلاص المشكلة اتحات

موضوع ان فى حقوق لازم الناس كلها تاخدها مش علشان انا اتنرفزت عليهم او واحد تانى عنده واسطة او واحد ثالث ...الخ

وبعدين ازاى المواعيد دى بتبدا تظهر لما الناس تشتكى
طيب متظهر من الاول للى يتصل يحجز

معلش ياجماعة انا مش متعاطف مع التوكيل نهائيا ولا شايف انه بيحاول يتعامل مع الوضع
ولا شايف ان انا اللى المفروض ادور على مقترحات
هما خدوا وقتهم وزيادة جدا وبقالهم تقريبا 3 سنين فى السوق
3 سنين مش عارفين يحلوا مشكلة زى دى، ناهيك ان المفروض مكنش يتسمحلهم اصلا انهم يبدوا بمركز صيانة واحد

على فكرة ياجماعة ابو رواش اللى كلنا عايشين بنحلم بيها مش حتحل حاجة ولما يتفتح يحينا ويحيكم ربنا العدد اللى بيروح العبور حيتقسم على اتنين وبكده المواعيد بحتبقى عد شهر واحد بس مش شهر ونص، وكام شهر كمان ولا سنة حتى ومع المبيعات حنلاقى الفرعين الحجز فيهم بعد شهر ونص

أستاذ احمد كلامك مظبوط ومفيش مشكلة
ولكن المشكلة ان الواحد لما بيقيس حاجه مش لازم من وجهة نظره تبقى صحيحه

يعني حضرتك لما قولتلهم انك هتشتكي ليه بتعتبرها انك هددتهم وعلشان كده اعطوك ميعاد جديد
ما يمكن حضرتك لو كنت عملت زي معاذ ما عمل بالظبط وقولتلهم ان الميعاد ده مش هينفع ومش مناسب
كانو ساعتها عملو نفس اللي عملوا برضه
ما هيا حصلت مع معاذ بالظبط

يعني ممكن يكون بيبقى في مواعيد احتياطي لمثل الحاجات دي
وده اللي واضح ليا


وبعدين موضوع ابو رواش ده اسمحلي اختلف في قياسك تماما لعدة اسباب
أولها ان حضرتك مركز صيانة ابو رواش
اكبر من بتاع العبور اضعاف

يعني مش هتبقى بالنص زي ما حضرتك حسيبها

ممكن اعرف موديل عربيتك ايه ولونها وحضرتك ميعاد صيانتك امتى بالظبط

المشاركة الأصلية كتبت بواسطة أبو عبدالله

يعني حضرتك لما قولتلهم انك هتشتكي ليه بتعتبرها انك هددتهم وعلشان كده اعطوك ميعاد جديد

باتفق معاك يابو عبد الله
تعليقاً على الجزء المقتبس
انا لما اشتكيت من بعد المعاد كلموني واعطوني المعاد اللي طلبته من غير ولا تهديد ولا حتى حدة في الكلام
انا مقتنع إن ممثل خدمة العملاء خصوصاً في دايهاتسو للأسف شاهد ما شافش حاجة وبالتالي مش باقسى عليه في كلام
أخذت عليهم تأخرهم في الرد على شكوتي كام يوم
بس في الآخر وللأمانة هما في الاخر اعطوني المعاد اللي انا طلبته

انا فاهم وجهة نظر أخينا أحمد
وعارف انه عاوز يقول ان فيه مشكلة مزمنة يجب أن يوجد لها حل
وإن الشكوى في التوكيل وتحديد معاد مش حل
وأظن معظمنا متفق معه في رأيه
بس هارجع وأقول بالرغم من إني باعاني معاناة شديدة من توكيل العبور لكن انا أكيد فيه ملابسات وتفاصيل مش ملم بيها مأخرة افتتاح أبو رواش لأن مش منطقي إن التوكيل شايف أد ايه هو بيخسر رصيد عند ملاك دايهاتسو وهو واقف موقف المتفرج
وبالتالي مش قدامي غير الانتظار
وإني أحاول أحجز معاد بدري بقدر الامكان مادامت هي صيانة دورية

سبب تاني لرد فعلي اللي أنا معترف إنه سلبي هو إني مقتنع إن الشكوى في حماية المستهلك وماشابه مش هاتقدم جديد ومش هاتحل مشكلة

استاذ احمد السيد
مفيش حد زعلان ولا متضايق ان شاء الله
هو التوكيل مش بتاعنا
ومصلحة الجميع عندنا هيا اول اولوياتنا ان شاء الله
وعمرنا ما دافعنا عن حاجه ليست صحيحه

يعني لن نتحامل على احد على حساب اخر
لأنه مش بيأكلونا ولا بيشربونا وحتى لو كده صدقني انا اول واحد هقف امامهم برضه
وعلى فكره توكيل دايهاتسو غير عربيتين قبل كده لأصحابهم بدون الرجوع لحماية المستهلك ولا اي جهة تانيه
يعني عملوها من غير اي ضغط

هل ده بيدل انهم بيستهتروا بالناس

اسمحلى هعلق على نقطة نقطة

النقطة ان مينفعش تطلب من كل الناس انهم لما يتصلوا ياخدوا ميعاد انهم يقولوا دورلنا على ميعاد قريب
طيب لو كل اللى فى نايل موتورز مثلا طلبوا ميعاد تانى حيجيبوا مواعيد احتياطى منين؟

والعملا اللى ميعرفوش حكاية ان حيبقى فى استجابة وفاكر ان المواعيد اللى بيخدها هى دى المواعيد فعلا يعمل ايه؟

اولا التوكيل حاليا بينصح الناس انها تحجز بدرى بسبب الضغط العالى فى المواعيد.

حضرتك اللى ليك انك لما تتصل و يبقى عندك ظروف و عاوز تبكر الميعاد, يقدموه لك, لكن ازاى يلاقوا مواعيد تناسب كل اعضاء نايل موتورز و كده, دى حاجة متخصناش. انا كعميل كل اللى يهمنى انى الاقى ميعاد يناسبنى

اما العميل اللى ميعرفش الموضوع ده, اكيد انا مش هشيل هم كل ملاك دايهاتسو. اى حد هيحصل معاه مشكلة فى الميعاد, هيعمل حاجة من اتنين: يا إما هيعمل شكوى زى ما انا عملت او حضرتك عملت, او هيلجأ لصيانة العربية خارج التوكيل.

معلش مفيش حاجة اسمها التمسلهم عذر لانى مش بتكلم على واحد كسر عليا فى الشارع وقالى معلش
انا بتكلم عن مؤسسة كبيرة عندها تخطيط وتنظيم لامورها وعارفة ان الصيانة مهمة زى التسويق
ممكن يتاخر شهر او شهرين او تلاتة نقول فعلا ظروف لكن كل الفترة دى معلش ميتقالش عليها ظروف
واذا مكنش عارف يحل مشاكله كل ده يبقى ميحملناش احنا يحاول يحل مشكلته بمليون حل
زى مقلنا يسمح بمراكز معتمدة زى متوكيلات كتيرة عاملة
يزود ساعات العمل اهو الاخ على بيقول تويوتا زودوا لغاية 8 مساء (اعتقد ان التوكيلين عبد اللطيف وفى نفس المنطقة علشان محدش يقول اصل العبور مينفعش نشتغل فيها بالليل)

يشتغلوا جمعة

يلغى ساعة البريك (حتفرق برده)

ادى مليون اقتراح اتقال ولا حد سال

خلاص يبقى احنا عملنا اللى علينا وادناله بدل الفرصة عشرة ومعملش حاجة
وشوفوا اذا مجاش شهر يناير ولا فبراير ولقيت الحجز بعد شهرين ونص

محدش قال التمس لهم عذر خالص

هما بدأوا اخر 2006, يعنى بقالهم حوالى سنتين فى السوق

فى السنتين دول عندهم مركز خدمة فى القاهرة, و مراكز معتمدة فى كل من: الاسكندرية, المنصورة و الاقصر

و بالرغم من ده محدش بيثق انه يعمل صيانة لعربيته الا فى التوكيل. يعنى الناس بيجوا سواء من اسكندرية او من الصعيد او حتى من وجه بحرى علشان يعملوا الصيانة هنا (و انا معاهم فى الموضوع ده لأنى بثق فى التوكيل فقط)

حضرتك ممكن تطرح اسم مركز خدمة واحد معتمد تثق فيه و سمعته حلوة؟ و الله انا دورت على اسم اقترحه عليهم ملقتش خالص

بالنسبة للاقتراحات الخاصة بمواعيد الاجازة زى يشتغلوا الجمعة, او يعملوا الفترة المسائية فالفكرة مطروحة عندهم, و بدأت بموضوع ال "2manoperation" اللى اختصرت وقت الشغل فى العربية لاكتر من النصف تقريبا و بذلك مركز الصيانة بقى يستوعب عدد اكبر بكتير

و على اثره بدأوا يتصلوا بالناس اللى حجزن متأخر علشان يقدموا لهم مواعيد الصيانة بعد التغييرات الاخيرة

لكن نقطة الغاء ساعة البريك, اظن دى ظالمة جدا لأن العمال مش "مكن", و ساعة البريك دى تستغل لصلاة الظهر, بالاضافة الى الاكل. و بلاقى عمال بيخلوصا بسرعة و يبداوا يشتغلوا فى العربيات قبل انتهاء البريك علشان ينجزوا الناس

اما مركز حماية المستهلك فالحقيقة هو عمل شغل كتيرمع توكيلات كتير ووصل مع توكيلات انه اجبرهم يرجعوا ثمن العربية او بيدلوها بعربية جديدة ودى حاجة مش متعودين عليها فى مصر ابدا

والحقيقة الناس اهتموا وبيكلمونى يوميا تقريبا علشان يجمعوا كل البيانات والمستندات

فاهو تجربة نفعت اهلا وسهلا منفعتش ادينا عملنا اللى علينا وفهمنا الناس اللى فى التوكيل انكم فوقوا شوية علشان العملا بتوعكم ليهم حقوق

غير كده انا مش حقف عند حماية المستهلك وبس
لا حبدا ابعت للجرايد يعنى ملحق الاهرام، بريد الاهرام،.....الخ
وبكده التوكيل يتعلم ان الموضوع مش تسويق واعلانات ومبيعات كويسة وكده يبقى كله تمام
لا الموضوع انك عندك عميل بتحافظ عليه وبتخدمه بعد كده لان العميل ده هو اللى بيعملك تسويق سلبى او ايجابى ولان سمعتك كلها جاية من العميل ده

ممكن حضرتك نفكر مع بعض, جهاز حماية المستهلك ممكن يعمل ايه اكتر من انه يجيب لحضرتك ميعاد بدرى؟

مش هيقدر يجبرهم يفتحوا مركز جديد فى التو و اللحظة
مش هيقدر يوقف استيرادهم لعربيات
مش هيقدر يجبرهم على تعيين مراكز خدمة معتمدة

كل اللى ممكن يعمله يناشد التوكيل سرعة الانتهاء من مركز ابو رواش, او اعادة النظر فى موضوع مراكز الخدمة المعتمدة, لكن انه يعملهم حاجة جامدة... شبه مستحيل

طيب ليه بدل ما ابدأ الموضوع بشكوى فى جهاز حماية المستهلك, ابدأ الاول مع التوكيل, و اوصل لل Top Managment بتاعتهم و لو لقيت الموضوع مش جايب همه, ساعتها يبقى ده الحل التانى ( مع احتفاظى برأى انهم مش هيقدروا يعملوا حاجة)

يعنى هنا فى المنتدى فى اى شكوى لأى عضو, لو وصل لحارة سد مع التوكيل, بنقوله ابعت للشركة الام, و لو مفيش رد يبقى جهاز حماية المستهلك

انا معنديش اسلوب انى اقولك طب ما تشوف التوكيل الفلانى بيعمل ايه فى عملائه و كده, لكن لو تحب اقولك على لسته توكيلات عريقة جدا فى مصر, لغاية قريب كان يملكوا مركز صيانة واحد فقط على مستوى الجمهورية!!!!

و ده مش مبرر بسوقه لتوكيل دايهاتسو انه يكون زيهم, لأ انا فعلا اتمنى احصل منهم على احسن خدمة, و علشان كده بحاول ابقى ايجابى, و اى حاجة شايفها تقصير من ناحيتهم او محتاجة مجهود اكتر بتصل على رقم 16168, قسم الشكاوى و الاقتراحات, و بكتب ورقة فى مركز الصيانة, و ببلغ الناس هناك, و بلاقى استجابة فعلا

وفى الاخر الناس هنا المفروض متتضايقش من تصرفى ده
لانى اولا مش بتجنى عليهم ولا انا واحد مثلا مدسوس وبحاول ابوظ سمعة توكيل
ثانيا لان فى الاخر دى خطوة بتهدف لمصلحة كل الناس مش مصلحتى انا بس

اولا محدش مضايق على الاطلاق من تصرف حضرتك (او على الاقل انا)
بس علشان اكون صريح معاك, مستغربه.
يعنى الناس اتصلوا بيك و ادوك ميعاد بعد يومين و انت رفضته!!!!
اكيد مش هتصلح الكون بين يوم و ليلة, و فى تأكيد من التوكيل انهم هيخلصوا ابو رواش فى شهر مارس 2009. ايه اللى هيضر لو استنينا ال 4 شهور دول؟
اصل ده مركز اضعاف المركز الحالى(على الاقل 4 اضعاف) اكيد مش هيتبنى بين يوم و ليلة
حضرتك راجع مشاركاتى فى قسم الدايهاتسو, لما بلاقى حاجة كويسة بقول عليها, و لما بيكون فى تقصير بذكره برضه


انا كعميل طلباتى تتلخص فى معاملة كويسة, و توافر قطع غيار باستمرار و بأسعار فى المتناول, و سهولة حجز للصيانة

بحاول معاهم باستمرار, و بذكر لهم باستمرار اوجه القصور اللى شايفها, لأن دى منظومة كاملة, و التغيير فيها بياخد وقت سواء رضيت ام لم ارضى, فلازم يبقى نفسى طويل و ابحث عن نتائج على المدى البعيد مش بين يوم و ليلة.

اتمنى انى اكون قدرت اوصل وجهة نظرى لك

و اتمنى فعلا ان حضرتك تتقبل كلامى بصدر رحب :)

(و بعيد عن كل ده نتمنى نتشرف بمعرفتك فى مقابلة الدايهاتسو الثانية :) )