النصيحة من الزملاء والأستاذ أحمد البرعى

**yk_5** · 15-02-2015 03:31 PM

السلام عليكم
اشتريت عربيتى فولفو 940 تربو موديل 93 عاملة حوالى 300 ألف كم ومعرفش المالك القديم كان بيستعمل زيت ايه المهم سمعت كلام الميكانيكي وحطيت زيت SAE 20w-50 حوالى 3 تغيرات وبعدين واحد ابن حلال نصحنى باستخدام لزوجة أقل استخدمت زيت تخليقى SAE 5w-50 طبعاً لقيت فرق شاسع فى الآداء واستهلاك بنزين أقل بس مقابل كده الزيت نقص حوالى 1 لتر بعد 5000 كم بس مفيش أى دخنة والحمد لله وموضوع النقصان ده مش فارق معايا وممكن أزود.
ركزت شويتين مع موضوع الزيت من خلال موضوعات المنتدي المحترم وخصوصاً الأستاذ أحمد البرعي ونصيحتة باختيار الزيت من الموصي به فى الكتالوج وبالبحث وجدت الموصي به بالكتالوج :
SAE 5w-30
SAE 5w-40
SAE 10w-30
SAE 15w-40
أرجو من الزملاء الأفاضل وخاصة الأستاذ أحمد البرعى النصيحة (استخدم زيت ايه)
شكراً

**borio1704** · 15-02-2015 07:26 PM

أولا.. أشكرك على ثقتك الغالية.. ويارب أقدر أساعدك فعلا.. :-)

مبدئيا.. كون العربية ماشية فوق الـ١٠٠ ألف فده هيخلينا نروح للزوجات الأعلى .

طبعا.. ده بفرض إن الموتور ما عملش عمرة قبل كده.

وما دام حضرتك عايز تروح على الزيوت التخليقية.. فالاختيار الأمثل هنا يبقى للزوجة 5w-40.. وطبعا.. كود الـAPI هيكون بالتأكيد أعلى من المطلوب في الكتالوج.

مهم كمان ناخد بالنا من كود الـACEA.. لإن ده له دخل بمعدل نقص الزيت... خصوصا لو كان الموتور بحالته

من وجهة نظري.. أفضل اختيار في حتة كود الـACEA إنه يكون A3 أو A5.

لو تقدر تصورلنا صفحة الزيت في الكتالوج يبقى أحسن كتييير.

بس علشان تتأكد من موضوع نقص الزيت ده.. لازم تعمل اختبار كبس وتشوف إذا كان الموتور حالته كويسة ولا بياكل زيت... لإنه لو بياكل زيت فعلا.. يبقى حرام تحط زيت تخليقي..

وفي الحالة دي يبقى خليك في الزيت المعدني بلزوجة 15w-40

...

**borio1704** · 15-02-2015 11:54 PM

يا سلاااام.. الكتالوج دايما بيفرق..

شوف يا سيدي...

حسب المكتوب في الكتالوج.. فالمفروض تجيب زيت "موفر في الطاقة" energy conserving... وده باختصار معناه إن كود الACEA يكون A5 أو A1... والA5 أفضل بدون شك.

بالنسبة للزوجة.. فاللزوجة 5W-30 ما تنفعش معاك خالص.. لإن الكتالوج كاتب وبوضوح إنك لازم تلتزم بدرجات اللزوجة المكتوبة وتكون متناسبة مع درجة حرارة الجو حسب الجدول.

يبقى مفيش قدامك إلا 10W-30.. و 5W-40... ودول آخرهم 40 درجة مئوية

ولو الجو حر قوي أكتر من 40 يبقى تروح على ال15W-40.

وأنا شايف إنك تستخدم ال5W-40 تخليقي في جميع الأحوال.

بالنسبة لموضوع نقص الزيت.. ففعلا ممكن الزيت ينقص من مكان تاني غير الشنابر.. عن طريق بلف الPCV اللي موصل من غطا التاكيهات إلى الكاربيراتير أو إلى مانيفولد السحب في الإنجكشن.

الموضوع ده فيه تفاصيل أكتر عنه
http://www.nilemotors.net/Nile/418186-a.html

فممكن يكون العيب ببساطة من البلف ده.

بالنسبة للكشف على الكبس.. للأسف مش هقدر أفيدك لإني مش عايش في مصر حاليا.. ده غير إني من اسكندرية أساسا..

عموما... البشمهندس عمرو السيسي كان عامل موضوع عن طريقة الكشف
http://www.nilemotors.net/Nile/322350-a.html

تقدر حضرتك تتواصل معاه وهو أكيد هيفيدك أكتر مني.

...

**yk_5** · 16-02-2015 11:06 AM

أنا سألت مستخدمى فولفو بمنتدى أمريكى أجمعوا على نوعيه واحدة شل روتيلا 15 - 40 وواحد منهم أوصى بشل روتيلا 5- 40 واضح ان شل روتيلا ده عامل شغل جامد بره مصر . مش عارف ده موجود فى مصر والا ايه ورأى حضرتك فى الكلام ده؟

**borio1704** · 17-02-2015 12:43 AM

المشاركة الأصلية كتبت بواسطة yk_5

العلام حلو بس مفيش علام من غير معلم
بعد البحث والفحص مفيش أى زيت من اللي بحثت فيهم الACEA بتاعته A5 أو A1 كله A3 مش عارف المعيار ده مهم جدا والا يمكن التغاضى عنه؟
وديه بعض المواصفات للنوعيات اللى شوفتها

أكون شاكر لو حضرتك تبعتلى التوصية بتاعتك من الآخر (اسم منتج - نوعية)
شكراً جزيلاً

أنا دورت شوية على النت ومش لاقي لحد دلوقتي زيت يكون 5w-40 ويكون A5 في نفس الوقت

معظم الA5 بتبقى لزوجتهم 5w-30

عموما.. اصبر شوية كده يمكن نلاقي حاجة توفي المطلوب.

...