الموضوع: سياسه جديده لبعض البنوك عند فتح حساب او الحصول على كارت مدفوع مقدماً

السلام عليكم ورحمة الله وبركاته

كنت شوفت هنا في المنتدى بعض الأعضاء قالت ان في سياسه جديده في البنوك
بتشترط يكون لك وظيفه علشان تفتح حساب في البنك

وانا رديت وقولت مفيش الكلام ده .. الى ان أتضحت الحقيقه اليوم بعد هذه التجربه

بطبيعة شغلي الخاص والحر .. انا بحتاج فيزا إنترنت ( أكتر من كارت ) علشان تعاملاتي كتيره ومتعدده وبخصص كل كارت لتعاملات محدده .. وكمان بحتاج استقبل فلوس من الخارج .

كنت عامل كارت فيزا إنترنت كريدي اجريكول من سنتين وخلاص بينتهي معاده .. وروحت اعمل كارت جديد .. لأنه مناسب الى حد ما .

وكالعاده موظفين باردين جداً ( لكن انا رايح ومجهز نفسي وعارف ده بحكم التعامل المستمر )
الموظفه تحولت من موظفة خدمة عملاء الى وكيلة نيابه

قاعده عالمكتب رجل على رجل .. فين بطاقتك ( وليس ممكن بطاقة حضرتك ) مع العلم انا شكلي ومظهري محترم جداً وابن ناس اوي مش رايح شعري منكوش وبنطلوني مقطع .

تقلب فيها وش وضهر وبنفس الوقت حزمة أسئله .. انت شغال ايه .. هتعمل بالكارت ايه .. اممم ااه ايوه طيب .. واسلوب غريب جداً .

بنفس الوقت موظف تاني قاعد في اوضه ازاز قافل الباب وماسك التليفون ضحك وشقلبه وصوت عالي وكلمات سوقيه وبذيئه جداً بينه وبين اللي بيكلمه غالباً صاحبه
كلمات تسمعها في حواري شعبيه بين سرسجيه .. والبيه فاكر ان الصوت مش طالع برا .

وبعدين قالتلي لازم يكون ليك وظيفه مثبته وتجبلي مفردات مرتب .. ولو عمل حر تجبلي بطاقه ضريبيه وسجل تجاري .. ونفس الشروط لو عايز تفتح حساب

تقريباً اسمي وشغلي وعنواني ماجاش على هواها . ( في اديها تمشي الدنيا بدون تعقيد لو ليها مزاج )

نفس الموظفه دي كنت مقدم فيها شكوى من سنتين بردو .. لكن تقريباً مفيش فايده .

كل ده علشان اخد كارت فيزا انترنت ب 20 جنيه .. بيخلص في تلات دقايق وتاخده وتمشي

و طبعاأ انا لا موظف ولا عندي سجل ولا الهوسه دي كلها ..

وبقى مش من حقي افتح حساب بنكي ولا احصل على كارت فيزا انترنت حتى .. اللي انا بستخدمه بقالي 9 سنين وعرفت الدنيا كلها بيه .. دلوقت بقى مش متاح ليه .

توجهت للعربي الافريقي الدولي .. فتح الحساب يحتاج وظيفه .. لكن فيزا الانترنت لسه بالطباقه الشخصيه فقط .. لكن انا بخلي العربي الافريقي اخر حاجه لأنه بيطلع عيني في شحن الكارت وديما السيستم واقع .

اما بنك qnb لقيت الموظفه بتبتسم في وشي وبترحب وامر واتفضل

ايووه تقدر تاخد كارت فيزا انترنت حالا .. لكن لازم تفتح حساب توفير الاول بحد ادنى الف جنيه والفيزا انترنت والحساب بالبطاقه لاشخصيه فقط ولا عايزين وصل نور حتى .. وكله دلوقت لو عايز .

طبعاً انا مش مرتاح نفسياً ل qnb لكن سألت من باب العلم بالشىء .

فمن الواضح ان السياسه دي ماشيه في بنوك وبنوك تانيه لأ .. ولكنها مؤشر للتعميم على الكل

وكالعاده قررات ذكيه .. ولكن مع شعب بردو ذكي مابيغلبش

مع العلم انا عندي حساب توفير في بنك مصر .. وعامل فيزا انترنت فيه .. وبستقبل حوالات عليه

وعايز اقول انه مريحني جدا جدا .. وحاسس ان الناس ظلماه بنك مصر ده

عيبه بس ان الفيزا انترنت مسموحلك كارت واحد والحد الاقصي للتعامل الشهري عليها 15.000

لكن خدمة عملاء ودقه ونظام وإستجابه فعليه للشكاوي .. والله بنك محترم .. وبيحترم العميل جداً .
وبيمشي المراكب العطلانه عن تجارب كتير .

بعد اللي شوفته مع البنوك الخاصه واسلوب التعامل .. بنك مصر يعتبر فايف ستار جنب كريدي اجريكول ولا العربي الافريقي .

السؤال دلوقت : هي البنوك دي دلوقت هتشتغل على مين ؟ ولا فاتحه ليه ؟

ده في بنوك الواحد مابيسمعش عنها اصلاً وشغاله وفاتحه وبتقبض مرتبات عاليه للموظفين ومعندهاش عملاء ولا معروفه خالص

البلد فيها 27 بنك ! و مزهئنا بالاعلان بتاع ( لازم يكون ليك بنك .. وماتجوم تطمن على فلوسك )

طب مانا عااااايز يكون ليه بنك !

عندي تجارب كتير إيجابيه مع بنك مصر .. واخرى مضاده لها سلبيه مع كريدي اجريكول والعربي الافريقي .. لكن مفيش مجال نحكيها .. واسف عالإطاله .