الموضوع: تقرير صيانة شاملة لسيارتي فيكترا 2002 1600 مانيوال

بسم الله الرحمن الرحيم
في الاول احب اشكر الاعضاء اللي ساعدوني في استفساراتي ..
اولاً العربية اشتريتها من حوالي شهرين
فيكترا 2002
1600 مانيوال 1 كامة

حالتها كانت كويسة ما شاء لله بس كانت عايزة شوية حاجات صغيرة عملت معظمها الحمد لله
دلوقتي هكتب ليكو قطعة الغيار وسعرها و اشتريتها منين
مع العلم ان الحاجة غالية وانا عارف بس للاسف مكنتش بعرف الف واجيب اسعار عشان لسه ماشي بعكاز من ساعة الحادثة بس الحمد لله على كل شئ

طقم بوجيهات جي ام 2 شمعة : نيو جي ام : 130
سير كاتينة جايتس انجليزي : الوطنية : 130
سير دينامو جايتس انجليزي :الوطنية: 120
بكرة سير دينامو تركي مش فاكر نوعها :الوطنية: 90
فلتر بنزين فيبي الماني :الوطنية: 50
فلتر تكييف mann :الوطنية: 80
فلتر هواء wix :الوطنية: 60
طقم تيل امامي rh واكتشفت انه بتاع مازدا 3 مش اوبل :الوطنية: 250
2 بارات دركسيون خارجي دلفي :الوطنية: 200
2 تيش ميزان دلفي :الوطنية:200
2 كاوتش ميزان ايطالي :الوطنية:60
2 مقص امامي توبران :الوطنية: 750
2 كاوتش كوبلن :الوطنية: 100
2 صدادة مساعد خلفي :البوشي:40
2 راس كوبلن خارجي فايكو الماني : نيو جي ام:600
2 مساعد خلفي دلفي : الغنيمي: 750
اكس كوبلن استيراد : محمد هاشم : 50
صليبة دركسيون : 150
وبعد كل ده وانا راجع من الحرفيين جابت اسطوانة وديسك
اول ما عرفت اتصدمت عشان الاسعار اللي سمعتها هنا في المنتدى
المهم :
طقم دبرياج -اسطوانة وديسك- فاليو كوري : الغنيمي : 695
بلية دبرياج kaager الماني : نيو جي ام : 800

بالاضافة الى :
2 دشمة سكاكين للفرامل الخلفية بمواسير الزيت وسلك الهاند : الفولي : 400
2 مكن زجاج خلفي كهرباء : الفولي : 300
2 زرار زجاج كهرباء خلفي : الفولي :100
بدلت الزريرين اللي جنب الفتيس بتوع الازاز بطقم 4 زراير ودفعت 150 فرق
فانوس للصالون بزراير بس لسه معدلتوش :الفولي:50
وفي اخر المطاف :
غيرت زيوت :
زيت باور :لتر atf : زيت احمر :75
نصف لتر زيت باكم ate : الغنيمي : 55
2 لتر زيت فتيس maxxus الماني : الغنيمي: 250 : اللتر ب 125
وطريت على نفسي بكاسيت بايونير 2750 deh ب 690 من ارخصهم في التوفيقية
ملحوظاتي :
في فرق رهيب في السحب عشان البوجيهات كانت مرطبة وفلتر البنزين كان شبه مكتوم
طبعاً ظبط زوايا بسم الله ما شاء الله
العربية الله اكبر ع الطريق فرق شاسع ما شاء الله
بس زي ما الفرق شاسع
قلت اطمن على استهلاك البنزين
اكتشفت ان العربية بتخلص ال 60 لتر في حوالي 400 كيلو
مع العلم اني في الفترة اللي فاتت ماشي متابع البنزين باستمرار
بس نقول اللي لينا واللي علينا
انا بحرق جامد ودايماً بجري! بس ما اظنش انها تخلص في 400 كيلو
النيسان اللي كانت معايا كانت 55 لتر بيخلصو في 650 كيلو كيك داون بس !
انا مندهش من الاستهلاك ! ومحتاج رأيكم !
الحاجة دي معظمها اتغيرت عند مهندس : محمد هاشم في بنزينة وطنية الوفاء والامل
وتقييمي للمكان عنده كويس ما شاء الله وربنا يباركله
ثانياً
في صوت زي كركرة كده من العجل ادام
العفشجي قال علبة دركسيون
ورحت لميكانيكي قال علبة دركسيون
بتاع الباور وعلب الدركسيون قال عفشة
وانا بقول عدس !
حد يقول حاجة مفيدة في الموضوع ده والنبي عشان تعبت
واخيرا اتمنى اكون قدرت افيدكم بشئ بسيط قدرت اقدمه ليكم !
وشكراً..

على فكرة طقم التيل راكب عندي
الفرق بس في السمك ان بتاع المازدا سمك اكتر من الاوبل
عملي ريحة شياط رخمة وكان بيسخن الجنط بس رحت لبتاع الفرامل صنفره وركبه ومبقاش يطلع الريحة دي الحمد لله

ربنا يجعلها اخر الاحزان والف مبروك الشغل وربنا يديك خيرها ويكفيك شرها بس ليه ملفتش وسألت على قطع الغيار عند كذا حد لان وطنية (اللي في الحرفيين) اسعاره خزعبلية

مبروك عليك يا كبير و ماتشغلش بالك بفرق الفلوس .. الفروق حجات بسيطه بس عشان انت جبت حجات كتير فسمعت معاك .. بس عادى كبر دماغك و استمتع بالعربيه ..و ان شاء الله اخر المصاريف والاحزان و سلامتك .
السؤال بقا : تيل ال rh دا صناعته ايه و هل حلو معاك ولا لأ و هل فى مشاكل تانيه من تصفير او صوت خشانه او احتكاك عالى مثلا ؟ و بيطلع رايش جامد على الجنوط اللى قدام ولا لأ ؟
و التيل ورا :هل كملت بالتيل بتاعها الاستيراد ولا ايه ؟ و هل التعديل فارق عن قبل كدا ؟
تقبل تحياتى

المشاركة الأصلية كتبت بواسطة مصطفى فراج

ربنا يجعلها اخر الاحزان والف مبروك الشغل وربنا يديك خيرها ويكفيك شرها بس ليه ملفتش وسألت على قطع الغيار عند كذا حد لان وطنية (اللي في الحرفيين) اسعاره خزعبلية

استاذ مصطفى الله يبارك فيك
ملفتش عشان كنت ماشي ب عكاز ف اظن صعب الف في الحرفيين انا كان اخري اتحرك في شارع المرسيدس مقدرتش الف واجيب اسعار بصراحة
وموضوع الوطنية ده انا اكتشفته متأخر بس الحمد لله على كل شئ مش مشكلة
نعوضها المرة الجاية

المشاركة الأصلية كتبت بواسطة m7nsh

مبروك عليك يا كبير و ماتشغلش بالك بفرق الفلوس .. الفروق حجات بسيطه بس عشان انت جبت حجات كتير فسمعت معاك .. بس عادى كبر دماغك و استمتع بالعربيه ..و ان شاء الله اخر المصاريف والاحزان و سلامتك .
السؤال بقا : تيل ال rh دا صناعته ايه و هل حلو معاك ولا لأ و هل فى مشاكل تانيه من تصفير او صوت خشانه او احتكاك عالى مثلا ؟ و بيطلع رايش جامد على الجنوط اللى قدام ولا لأ ؟
و التيل ورا :هل كملت بالتيل بتاعها الاستيراد ولا ايه ؟ و هل التعديل فارق عن قبل كدا ؟
تقبل تحياتى

استاذي الفاضل اشكرك , محدش بيتعلم ببلاش بقا ان شاء الله الواحد يعمل حسابة في موضوع الاسعار بعد كده
التيل ال RH ده اسمه Road H__ مش فاكر الاسم بصراحة و مش فكر برضو صناعة ايه بس اعتقد اسباني او حاجة زي كده
مفيش صوت صفارة ولا خشانة بس مجرد ما ركبته الجنوط بقت بتسيح من السخونة
وبشم ريحة شياط فظيعة
لما رحت لبتاع الفرامل قالي التيل ده مش بتاع العربية ف قولتلو ازاي ده هو هو نفس اللي كان راكب فيها
قالي التيل ده هو نفسه بتاع البي ام والمازدا 3 بس الفرق ان بتاع الاوبل سمكه اقل شوية عشان ميحملش ع الطنابير
ودليل كده اننا لما فكينا التيل لقيت التيل اتشرخ !!
وطلعناه بالعافية لانه كان راكب محشور مش راكب مرتاح في مكانه
هو صنفره شوية من الجنبين وركبة والريحة خفت بس لسه موجودة !
الخلاصة : هات الريمسا ومتركبش النوع ده في عربيتك !
بالنسبة للتعديل للفرامل اللي ورا الدشمتين كانو زيرو والتيل كان لسه زيرو بحالته
يعني كملت بالتيل ومصنفرتش حتى الطنابير
بالنسبة للفرق : هتفرق معاك ع السرعات اوي اوي اوي خصوصاً ان ال اي بي اس مش شغال عندي ف حسيت بفرق جامد

المشاركة الأصلية كتبت بواسطة احمد فهمى

مبروك وعربيه من اخر افضل ما انتجت اوبل انا عملت بيها نص مليون كيلو بس على 3 عربيات فيكترا بي وتقريرك ممناز بصراحه والاسعار مهمه ﻷفادة الجميع هضيف الموضوع ده فى الورشه

استاذ احمد فهمي
الله يبارك فيك وشرف ليا ان الموضوع يتضاف للورشة والناس تستفيد

___
بالنسبة لاستهلاك البنزين وموضوع علبة الدركسيون ده محدش رد عليا ليه !
ارجو الافادة للي يعرف المشكلة ممكن تكون من ايه
وشكراً

المشاركة الأصلية كتبت بواسطة احمد فهمى

مبروك وعربيه من اخر افضل ما انتجت اوبل انا عملت بيها نص مليون كيلو بس على 3 عربيات فيكترا بي وتقريرك ممناز بصراحه والاسعار مهمه ﻷفادة الجميع هضيف الموضوع ده فى الورشه

استاذ احمد
اعتقد حضرتك نسيت تضيف الموضوع للورشة ,
ع الاقل ممكن يتضاف جنب موضوع الاستاذ سامح لافادة الاعضاء..

لو قصدك road house دا نضيف جدا و المفروض ان فى للاوبل مخصوص عادى .. المشكله ان الريمسا اتضرب من فتره و بقى وحش جدا و بيصفر ..

البنزين : انا باعمل بسبب القرص و الجرى اللعينين حوالى 8 كيلو فى اللتر و احيانا 7 .. انت كدا معدلك 6.6 ودا فعلا كتير حبتين ..حاول تسوق سواقه معتدله بدون حرق على طريق وفوّل قبل المشوار و بعده لأول فصله فى المسدس بس و شوف خدت كام لتر و احسب .. لو طلع منطقي يبقى المشكله فى رجلنا يا صديقى ..

مشكله صوت العجل دا : عادى جدا تكون مشكله فى علبه الدركسيون تعمل الدربكه دى .. هى بتعمل فى حدود 800 900 جندى .. لو الصوت مش مأزمك أوى رأيى تعايش معاه !

المشاركة الأصلية كتبت بواسطة m7nsh

لو قصدك road house دا نضيف جدا و المفروض ان فى للاوبل مخصوص عادى .. المشكله ان الريمسا اتضرب من فتره و بقى وحش جدا و بيصفر ..

البنزين : انا باعمل بسبب القرص و الجرى اللعينين حوالى 8 كيلو فى اللتر و احيانا 7 .. انت كدا معدلك 6.6 ودا فعلا كتير حبتين ..حاول تسوق سواقه معتدله بدون حرق على طريق وفوّل قبل المشوار و بعده لأول فصله فى المسدس بس و شوف خدت كام لتر و احسب .. لو طلع منطقي يبقى المشكله فى رجلنا يا صديقى ..

مشكله صوت العجل دا : عادى جدا تكون مشكله فى علبه الدركسيون تعمل الدربكه دى .. هى بتعمل فى حدود 800 900 جندى .. لو الصوت مش مأزمك أوى رأيى تعايش معاه !

مش فاكر بصراحة نوع التيل بالظبط !
البنزين بقا انا برضو مش مقتنع حاسس ان في حاجة غلط !
لما ال 1600 كده امال لو ركبت 2000 هصرف منين بقا
المشكلة في موضوع الصوت ده اني مبحبش اسمع صوت من العربية وانا ماشي
عشان مبقاش مجدد كل ده واحس ان العربية مهلهلة
الاصوات دي بتستفذني
ع العموم هسيبها تجيب اخرها واغيرها ان شاء الله
تحياتي