استلمت سوزوكي سويفت ديزاير 2015 - تقرير متجدد

**Mahmoud.Fathy** · 22-02-2015 03:54 PM

النهاردة خصلت اجراءات التأمين على السيارة قبل ما ارخص
اخترت المجموعة المصرية العربية للتامين gig ... نسبة التأمين 3.25% من قيمة السيارة شامل الدمغات والضرائب وكل حاجة ...
العميل بيدفع فقط 10% من قيمة قطع الغيار اما باقي قطع الغيار ومصنعيات التصليح بالكامل بتدفعها شركة التامين .... والعميل بيتحمل 150 ج عن كل تعويض ... يعني العميل بيدفع 10% من قطع الغيار و 150 ج ... الميزة ان الشركة هي اللي بتحاسب التوكيل مش العميل يدفع وبعدين يسترد فلوسه بشيك ... نسبة التأمين 3.25% والتامين بيغطي 100% من حالات السرقة والسطو والاهلاك الكلي لكن طبعا 100% من قيمة العربية وقت الحادث او السرقة مش قيمتها اللى انت شاريها بيها وده طبعا بتقل مع مرور الوقت ... واللى بيحدد القيمة دي لجنة مختصة من شركة التأمين ... بالنسبة للسرقة السطو مبلغ التامين بيتدفع بعد مرور 6 شهور على الحادث وقبل ما تاخد المبلغ بتعمل لشركة التأمين عقد مسجل وتبعلهم العربية عشان لو العربية ظهرت في اى وقت بعد كده تبقى بتاعتهم وانت خدت تمنها ... أى حادث للعربية قيمة اصلاحه اكبر من 10000 ج لازم تعمل محضر في القسم لو قيمة الاصلاح اقل من لازم محضر ... ومندوب شركة التأمين قالي لما يحصل اى حاجة لا قدر الله بتكلمنا وانا اقولك تعمل ايه بالظبط ...

**Mahmoud.Fathy** · 08-03-2015 08:56 PM

قربت اوصل لل 1000 كيلو والمفترض اروح اعمل الصيانة يوم السبت 14 مارس القادم ... انبطاعي عن السيارة

السيارة رائعة وممتازة للناس اللى مشاويرها معظمها جوه المدينة ... عربية صغيرة نسبيا من الخارج .. صالونها واسع من الداخل .. سهلة جدا في القيادة وابعادها مريحة .. مناورتها اكثر من رائعة وقطر دورانها صغير جدا ... عفشة ناشفة نسبيا ولكن عالية عن الارض ومناسبة جدا لشوارع المحروسة

سافرت بالعربية من القاهرة الى الاسكندرية صد رد في نفس اليوم ولم اشعر بالتعب اطلاقا من القيادة .. بالعكس السيارة ممتعة جدا وكانت عاوز تجري وتسحب جامد بس لاني في ال 1000 الاولى لم اتجاوز سرعة 100 ك وفي بعض الاوقات وصلت لل 120 غصب عني ولكن سرعان ما كنت برجع لل 100 او 90 عشان فترة التليين الاولي ... لكن من اداء العربية واضح انها ممكن تروح لل 150 و 160 مرتاح جدا

استهلاك بنزين اكثر من رائه لحد دلوقتى متوسط استهلاكي على الكمبيوتر 16.5 كيلو لكل لتر وطبعا منتظر المعدل ده يتحسن كمان بعد الصيانة الاولى

التقفيل من جوه والعزل ممتاز ... لما تقفل الازاز كله بتنفصل تماما عن العالم الخارجي وياسلام على الساوند سيستم الرائع والمزيكا ... عالم تاني فعلا :) :) :)

التكييف جربته في السفر وجربته في يومين الحر دول ... التبريد ممتاز جدا جدا خصوصا ان حجم الصالون مش كبير اوي فالتكييف بيبرده بسرعة ... يعني على اول او ثاني درجة بالكتير الصالون بيكون ساقع جدا ... ماحتجتش ابدا اجيبه على 3 او 4 ... لكن اعتقد مع دخول الصيف وزيادة درجات الحرارة هقدر احكم اكتر على اداء التكييف .. لكن البداية مبشرة

ده انبطاعي المبدأي من اول 1000 كيلو

**Mahmoud.Fathy** · 15-03-2015 11:45 AM

صيانة ال 1000 النهاردة في ابو رواش

المكان مش بالسوء اللى الناس متصوراه .. بالعكس مكان ظريف ومعقول

الصيانة بيتم فيها تغيير زيت - فلتر زيت - مراجعة العفشة والسوائل والانوار وكمبيوتر السيارة وأى شكاوى اخرى وفي النهاية غسيل العربية .... انا حطيت توتال كوارتز (10000كم) ... والتكلفة 395 ج

الوقت تقريبا ثلاث ساعات .... انا وصلت الساعه 10 ونص العربية دخلت الساعه 11 والساعه 2 كنت خارج من البوابة
بعد الصيانة حسيت ان العفشة بقت انعم نسبيا ... طبعا السحب خصوصا في السرعة تحت 100 اتحسن كتير ... والعربية جابت 140 مرتاح بالتكييف لكن الطريق مساعدنيش اجيب اكتر من كده ...

**D . a .\ AYMAN** · 28-03-2015 01:19 AM

ألف مبروك
ربنا يحفظهالك ويحفظك بيها يارب

**egyptiandiver** · 28-03-2015 06:57 AM

الف مبروك وربنا يباركلك فيها ويديك خيرها

**Mahmoud.Fathy** · 07-04-2015 12:16 PM

صباح الخير .... امبارح والنهاردة كنت على طريق السخنة رايح جاي لمسافة حوالي 350 كيلو ودي اول تجربة سفر بالعربية بعد صيانة ال 1000 ... يعني كانت القيادة بدون محاذير التليين المعتادة ... طبعا مش هتكلم عن الثبات والراحة والرفاهية والكلام اللى الاعضاء اتفضلو شرحوه قبل كده ... هتكلم عن نقطتين مهميين جدا ( استهلاك الوقود - التسارع)
أول حاجة استهلاك الوقود
انا مشيت على سرعات مختلفة طول الطريق وكنت جايب على الكمبيوتر الاستهلاك اللحظي ولقيت الاتي ...
أفضل استهلاك على الاطلاق بيكون ما بين السرعة 80 الى 110 ... استهلاك اكثر من مذهل مش بيقل عن 20 كم/لتر ... وبيوصل في بعض الفترات ل 28كم/ لتر ... لما السرعة توصل لل 120 تقريبا بيزيد الاستهلاك وبيوصل ل 15 كم/لتر ... ولما توصل لل 140 بيكون الاستهلاك حوالي 12.5 كم/لتر .... اما عند ال 160 فكان الاستهلاك 10 كم/لتر ... وتحت السرعة ال 80 لحد ال 50 مثلا الاستهلاك ما بين ال 15كم/لتر الى 20 كم / لتر ......
فيه ملحوظة تانية مهمة لاحظتها ... وانت على سرعة عالية مثلا فوق ال 100 وشيلت رجلك من على دواسة البنزين وسبت العربية تمشي بسرعتها من غير ضغط على الدواسة الاستهلاك بيقل جدا وبيوصل ل 28 كم/لتر بغض النظر عن السرعة اللى انت عليها ... حتى لو كانت 150 ... ولو سبت العربية لمدة 20 ثانية مثلا والسرعة نزلت شوية وصلت لل 140 او 130 وسندت خفيف على دواسة البنزين بحيث انك تحافظ على السرعة ... الاستهلاك بيفضل قليل لفترة كويسة وبعدين يزيد لحد اما يوصل للمعدلات اللى انا كاتبها فوق دي ...
ثاني حاجة التسارع
طبعا موضوع السحب قتل بحثا من الاعضاء لكن فيه ناس كتير اشتكت ان العربية مش بتجيب اكتر من 140 ... وده حقيقي في حالة انك سايب العربية تسحب بطبيعتها من غير ما تحرق انت ... يعني لو الطريق مستوي والاسفلت كويس وانت دايس دوسة متوسطة العربية هتوصل لل 140 بسهولة لكن هتثبت على السرعة دي مش هتزيد تاني بنفس المعدل ... عشان تعدي السركة دي لازم تعمل كيك داون ... يعني تدوس على الدواسة للاخر خالص .. تلزقها في الارض يعني ... الناس اللى بتلعب العاب سباقات العربيات عارفة (النيتراس) لما تبقى عاوز العربية تاخد دفعة سرعة قوية بتدوس على النيتراس ... بيحصل نفس الموضوع تقريبا لما تكبس الدواسة للاخر .. تلاقي الار بي ام علي .. وده معناه انك نزلت نقلة لتحت عشان تاخد تسارع اعلى وعزم اكبر .... وتحس ان العربية انطلقت بتسارع رهيب وصوت الموتور علي ومؤشر السرعة بيعدي ال 140 بمنتهى السهولة ... انا جربت الحركة دي جمب كذا عربية على الطريق ولقيت نتايج كويسة جدا في التسارع لدرجة انهم اختفوا ورايا ... وبالطريقة دي وصلت لل 160 وكان ممكن اجيب اكتر من كده بس بيني وبينكم خفت شوية .... كل ده من غير ما استخدم زرار فصل ال Over Drive ... انا جربت استخدمه بس لمجرد انى اتاكد انه شغال لاني مكنش جربته قبل كده وانا على سرعة عالية ... وفعلا لما بتدوس على الزار بيحصل نفس اللى بيحصل لما تكبس الدواسة للاخر ... يعني الار بي ام بيعلى وده معناه انك نزلت من الرابع للتالت ... يعني الغاء ال over drive مش هتس بتأثره طول مانت تحت ال 100 كيلو سرعة ... لكن فوق ال 100 هتحسه لان فوق ال 100 الفتيس بيكون جاب الرابع تقريبا ولما تستخدم زارا ال OVER DRIVE بتلغي الغيار الرابع وبتفضل على التالت ... انما الكبس على الدواسة أو الكيك داون بتحسه مع اى غيار لانه بيأخر النقل بين الغيارات مش بيلغي الغيار الاخير ...
اتمنى اكون نقلت التجربة بشكل مبسط ... كان نفسي اصورلكوا الكلام ده بس لو كنت صورتوا كان زمانكو بتقروا على روحي الفاتحة ... الطريق ملوش أمان
تحياتي

-

الموضوع: استلمت سوزوكي سويفت ديزاير 2015 - تقرير متجدد

LinkBack

أدوات الموضوع

عرض

-

-

-

-

-

المواضيع المتشابهه

بحمد لله استلمت ورخصت سوزوكي سويفت 2015 ديزاير سيدان

بحمد لله استلمت سوزوكي سويفت 2015 هاتشباك

محتار بين صني 2015 ex و سويفت ديزاير 2015

فين تقرير بعد استخدام سوزوكي سويفت 2015

سعر سوزوكي سويفت ديزاير اوتوماتيك

الكلمات الدلالية لهذا الموضوع

المفضلات

المفضلات

ضوابط المشاركة