اوبلتي اتخبطت يا عصابة الاوبل

**abdelaziz-waleed** · 07-11-2008 04:06 AM

انا مش عارف ابدأ ازاي
يوم السبت اللي فات كنت مروح البيت في حدائق حلوان ومعايا والدي واخويا وكنت على الكورنيش عند طرة عند مصنع النشا والجلوكوز بالليل

وانا ماشي كان فيه عربية نقل كبيرة عليها فنطاس مياه واقفة على اليمين
انا باجي في الحتة ديه وامشي على مهلي وانا اصلا مش من هواة الجري
المهم توقعت ان اللوري ممكن يلف اليو ترن فهديت اكتر وهوب راح اللوري واخد اليوترن من اقصى اليمين. طبعا انا توقفت بسهولة لأني لم اكن مسرع اطلاقا

وبدأ اللوري ياخد اليوترن وهوب سمعت صوت فرملة ورايا جامد جدا ولمدة طويلة وهوب طاااااااااااخ
عربية نوبيرا دخلت فيا من ورا وراحت مدخلاني في صندوق البطاريات بتاع العربية النقل لأن العربية النقل كانت لسة واخدة عرض الطريق بالكامل

طبعا سواق العربية النقل نزل والطريق توقف تماما لمدة ساعة لأني رفضت
تماما ان اي عربية تتحرك لغاية ما يجي البوليس علشان اثبت اني مش غلطان واخد حقي

المشكلة اني حاولت اتصل بالنجدة 122 يقولي كل مش عراف ايه مشغولون مع بلاغات اخرى. حاجة تهلك من الضحك للاسف ما عرفتش اتصل بالنجدة لغاية ما الطريق وقف لغاية المعادي. اضطرو يبعتو ضابط يشوف ايه الحكاية

المهم اهل سواق النقل قالولي انهم مستعدين يصلحولي كل حاجة في العربية
ومستعدين لأي تكاليف. بس لما عرفو ان العملية هاتتكلف لأني جبت السمكري في موقع الحادث وخليته يقدر التكلفة وقال انها هاتعدي 3000 جنيه

طبعا انا عارف اني لو المهعملت محضر مش هاخد حقي وخصوصا اني مش مأمن
ولكن برده العربية النقل مالهاش اي ورق او رخص واصحابها كانو خايفين موت

المهم ان السواق هايحاول يستلف الف ونص ويجيبهوملي وده كل اللي يقدر عليه
بصراحة فعلا الواد سواق النقل غلبان جدا واهله ناس محترمين جدا
لدرجة ان خالي لما راح معاه يجيب الفلوس لفو على بيوت كتير يستلفو منهم الفلوس
بس بصراحة انا اخدت الفلوس علشان يتعلم ان ارواح الناس مش لعبة
لأن المفروض كان يستنى لما الطريق يفضى. وبرده اللي جاي من ورا كان غلطان

الحمد لله جت بسيطة
التلفيات كبوت وردياتير وخزنة زيت باور ومراية يمين
الغريبة ان التلفيات ورا لا تذكر او تقريبا مافيش. وده خلاني احترم العربية ديه جدا

انا اتصلت بالشيخ محمد قشطة اللي في الحي السادس وطلبت منه قطع الغيار
وهو بصراحة اداني قطع الغيار باسعار مش هاقدر اقولها لأنه ادهاني اقل من كل تجار الاستراد بكتير جدا اللي في الحرفين والطالبية وكله

هية العربية ممكن تدخلها في 3500 بعد السمكرة والرش وكله
كل اللي انا بفكر فيه اني ارجع الفلوس للسواق بتاع النقل
لأني حاسس ان حالته المادية فعلا تعبانة جدا
وانا الحمد لله مش محتاج فلوسه. انا بس عاوزه يتعظ ويتعلم الادب

انا عندي سؤال لعصابة الاوبل
بعد ما العربية اتخبطت بطلتها. ولكن المراوح فضلت شغالة لغاية ما شلت كابل البطارية.

وبعد ما ركبت الردياتير الجديد لاحظت حاجة غريبة. ان اول ما افتح الكونتاكت الاقي المراوح تشتغل على طول وما تقفشي غير لما ابطل العربية

هل ده معناه ان الكتاوت بتاع المراوح معلق ولا ايه؟
انا طبعا برمجت ماكينة الرفع تاني علشان البطارية اتشالت واتحطت. بس برمجتها سهلة جدا
انك مجرد تقفل القزاز وتفضل مثبت ايدك على الزرار 3 ثواني هاتسمع صوت تك كدة تمت البرمجة لكل قزاز باب على حدة

يا جماعة نصيحة اي حد يكون ماشي على الكورنيش يخلي باله في الحتة بتاعت طرة ديه جدا خاصة من عربيات المياه لأن معظم اصحابها ما بيعرفوش يسوقو وبيضربوا مخدرات والمكان مظلم جدا. ربنا يكفيكم شرهم

الحمد لله قدر الله وما شاء فعل

**SuMo** · 07-11-2008 04:28 AM

ألف سلامة عليك يا وليد يا حبيبى و قدر الله وما شاء فعل

**danash** · 07-11-2008 08:33 AM

ألف سلام يا أستاذ وليد وحمد الله على السلامة أول ما قرأت عنوان الموضوع والله يا عم إنزعجت جداً قدر الله ما شاء فعل مين عالم ربنا لطيف بعبادة فى المواقف اللى زى دى إسجد سجدة شكر لله
أحمد دنش

**abdelaziz-waleed** · 07-11-2008 11:36 AM

المشاركة الأصلية كتبت بواسطة SuMo

ألف سلامة عليك يا وليد يا حبيبى و قدر الله وما شاء فعل

ربنا يخليك يا سومويا حبيب قلبي.
انت فين يا عم الحاج اكيد هانشوفك بكرة ان شاء الله

المشاركة الأصلية كتبت بواسطة danash

ألف سلام يا أستاذ وليد وحمد الله على السلامة أول ما قرأت عنوان الموضوع والله يا عم إنزعجت جداً قدر الله ما شاء فعل مين عالم ربنا لطيف بعبادة فى المواقف اللى زى دى إسجد سجدة شكر لله
أحمد دنش

ربنا يخليك يا احمد باشا
الحمد لله على كل شيء وانا مش زعلان خالص
انا اللي مزعلني ان الخبطة جت نتيجة غباء البهايم وبصراحة العربية
ديه عزيزة عليا جدا. لأنها ما شاء الله ما بتعملشي اي مشاكل او اعطال خالص

صحح سؤال برده
انا جيبت الكبوت استيراد اصلي بس جبته لونه اخضر وانا عربيتي كحلي زي
بتاعة احمد نونيم.
انا بفكر اسيب الكبوت من جوة ما ارشهوش علشان يبقى بدهان الفابريقة.
انا كدة كدة لما هاجي ابيع هاقول للي هابيعله اني مغير الكبوت علشان ما كونشي بخدعه. بس لو سيبته من جوة هيبقى دليل على ان الكبوت اصلي
مش من الجداد التعبانين

انتو رأيكو ايه

**Ahmad Allawy** · 07-11-2008 01:07 PM

اولا. الف الف سلامة عليك.. و الحمد لله ان محدش جراله حاجة..
فداك اي حاجة بجد.. و العربية ان شاء الله هترجع زي الاول و احسن..

عموما.. انا هاقولك رأيي في موضوع السواق.. اي نعم هو غلطان.. بس القدر كده بقي.. يعني انت وقفت و الموضوع كان هيعدي.. لكن نصيبك بقي ف اللي كان جاي من ورا..
انا رأيي انت كده فعلا خوفته كفاية..و رجعله الفلوس.. و ربنا يعوض عليك ان شاء الله..
انت كده هتبقي قدرت و عفوت عنه.. و دي حاجة ثوابها كبير جدا عند ربنا.. ولو ان ده حقك.. لكن انت فكرت في كده و ربنا يجازيك كل خير علي الكلام ده..
العربية بقي.. انا رأيي قبل ما ترشها ولا حاجة حاول تشوف كبوت تاني نفس اللون.. و هتلاقيهه كتير علي فكرة.. حتي لو جيبته اغلي شوية.. هيكون افضل.. بدل ما ترش و دواخل و لون الفبريكة و الكلام الكتير ده,,.
موضوع الكتاوت و المرحة و الكلام ده انا بصراحة ماعرفش فيه عشان كده مش هافتي.. :)
اكيد حد من الناس اللي عارفة الكلام ده هيفيدوك ان شاء الله..
ولو هتخلي الكبوت الاخضر ده.. يبقي مترشوش.. من جوة.. و خلي القديم عندك.. حتي لو مبهدل خالص.. عشان اللي هيشتري ولا حاجة.. يشوف القديم..
و بالنسشبة للخبطة من ورا.. اصل اللي كابس فرامل ده كان كده وش العربةي عنده واطي علي الارض خالص.. عشان كده الخبطة معملتش اي حاجة الحمد لله.. بس برضه شيك علي التان احسن يكون كبوت النوبيرا خبط فيه من تحت..
مقولتلناش النوبيرا المسكين ده حصل فيه ايه..؟؟ اكيد اتبهدل اكتر منك..

عموما.ز الف سلامة عليك.. و فداك الفلوس و العربية و اي حاجة.. كل ده بيروح و ييجي المهم انك انت و الاسرة و اللي كانوا معاك بالف خير..

**ouba2** · 07-11-2008 01:10 PM

الف سلامة عليك

**Ahmad Allawy** · 07-11-2008 01:12 PM

سبحان الله.. انا بقالي فترة كبيرة بتاع 3 اسابيع شغلي ف المعادي.ز و باروح و ارجع من الطريق ده..
مش عند الكوبري اللي بيطلع عند سجن طرة..؟؟
حاجة وحشة والله.. و فعلا واحد من العيال دول كان هينني بس ده كان الصبح.. وهو ماشي علي الكوبري و مش راضي يعديني.. اما كنت هاشتمه..
ربنا يسترها معانا جميعا ان شاء الله..

**ENG\AHMED** · 07-11-2008 02:37 PM

الف سلامة ياباشا على العربية والحمد للة انك بخير
معلش دة حال بلدنا وشوارعنا والقرف اللى بنشوفة كل يوم

بالنسبة لموضوع المروحة الكلام دة اول لما تدور ولا على طول وبتفصل ولا لأ
على فكرة لما بتفصل البطارية وتوصلها تانى بتلاقى المراوح تشتغل اول لما تدور حتى لو باردة وبتقعد تفصل وتشتغل وبتقعد شوية لما ترجع لوضعها الاصلى .. بتعمل زى reset للكمبيوتر فابيشتغل safe mode

بالنسبة للكبوت رأيى ياتشترى واحد كحلى ياما ترشة كلة بلون العربية لأن شكلة هيبقى مستفز لما تفتح الكبوت وبالنسبة للبيع دة ملوش دعوة بدواخل ولا خوارج الحوض سليم يبقى خلاص مش همشى بالعربية تكنى كالار علشان لما ابيع :)

**M.Mokhtar** · 07-11-2008 03:24 PM

الف سلامه يا وليد
بجد زعلت جدا
انا لسه واخد بالى من الموضوع دلوقت
الحمد لله انها جت على قد كده

بالنسبة لموضوع الفلوس انا من رأيى ترجعاله واحتسب عند ربنا هتاخد صواب كبير جدا
بالنسبة لموضوع المروحه لو بتفصل بعد شويه يبقى مش مشكله
لو بتشتغل على طول يبقى لازم تراجع على الكتاوت
بالنسبة لموضوع الكبوت
ايد هتلاقى كحلى بالهبل فى الحرفيين والمناطق دى
ممكن يكون سعره اخلى من الراجل الطيب اللى بتتعامل معاه بس مش مشكله
حتى عشان لما تفتح الكبوت مش تتضايق من المنظر وتفتكر اللى حصل

وحمدلله على السلامه يا باشا
وربنا يسترها على الجميع

**KHALED AYMAN** · 07-11-2008 03:40 PM

اولا و قبل اى حاجه حمدا لله على سلامتك انت و الى معاك .
انا من رايى انك ترجع للراجل فلوسه لانه واضح ان ظروفه صعبه(طبعا هو غلطان )بس العفو عند المقدره و بكده هيكون ليك ثواب كبير عند ربنا .وان شاء الله العربيه ترجع احسن من الاول.

الموضوع: اوبلتي اتخبطت يا عصابة الاوبل

LinkBack

أدوات الموضوع

عرض

اوبلتي اتخبطت يا عصابة الاوبل - انشر الموضوع فى :

-

-

-

-

-

-

-

المواضيع المتشابهه

الحقوني يا عصابة الاوبل !!

طلب استشارة من عصابة الاوبل - العربية هتطير البرج الي فاضل

العربية الاوبل دي تسوا كام نرجو الرد من خبراء الاوبل ولكم جزيل الشكر ؟؟؟

ارجوا المساعدة من عصابة الاوبل موتور 1600 ايكوتك

الى عصابة الاوبل الاعزاء

الكلمات الدلالية لهذا الموضوع

المفضلات

المفضلات

ضوابط المشاركة