الاخوة الافاضل السلام عليكم . حبيت انقل لكم تجربتى فى موضوع كاميرات المراقبة وخصوصا بعد مالقيت ندرة فى المواضيع اللى بتتكلم عنه مع انى بحثت كتير جدا على النت
المهم . الفكرة جات لى بعد ماشفت كذا حادثة سرقة متصورة ووجدت ان الموضوع زاد قوى . طبعا الكاميرات هتركب فى مكان العمل . ابتديت ابحث عند كام شركة واعرف الاسعار وادخل على الانترنت . لقيت الحوار كبير قوى والسمة المشتركة ان محدش عايز يفهمك يعنى يدخلك فى حوارات وميريحكش المهم رسيت على شركة بتاع واحد معرفة ورحت اتفرجت طبعا هو عارض قدامه كذا صورة لكذا كاميرا علشان يوريك الفرق بس برضه مش فاهم . المهم قلت له شوف لى حاجة كويسة وبعد مدة واخذ وجذب فهمت الى حد ما واليكم الملخص
السيستم بيتكون من كاميرات وجهاز dvr وتوصيلات سلوك وباور كهربا
الكاميرا انواع تبتدى بال cctv وهى اقلهم سعرا ثم cvi اللى هى hd ثم ال ip طبعا كل مازاد السعر زاد وضوح الصورة
ال dvr اما يشيل 4 كاميرات او 8 كاميرات بس المشكلة ان كل نوع من الكاميرات بيشتغل على نوع dvr معين يعنى ماينفعش نركب كاميرا cctv مع واحدة hd مع ان ده مهم جدا وكان نفسى اعمله لان الكاميرا ال hd صورتها ماشاء الله واضحة بس للاسف غالية .
الdvr بتشترى له هارد دسك علشان التخزين وكل مازادت جودة الصورة بتحتاج لهارد اكبر
الكاميرات انواع يعنى فى العادية خالص بتنقل صورة بس وفى اللى بتعمل زووم على اى شخص داخل المكان وفى اللى بتتتبع الصوت وتمشى وراه بس طبعا كله بتمنه وخلوا بالكم شفت صورتى على احدى الشاشات وحاولت اعرف مكان الكاميرا مقدرتش وصاحب الشركة تحدانى وبرضه ملقتهاش وفى الاخر ورهالى اتضح انها عبارة عن كاميرا فى حجم وشكل الدبوس الضغط اللى كنا بنركبه فى الصالون طبعا الكاميرا دى مصيبة ومش عارف بيسمحوا بيها ليه.
طبعا نقطة مهمة جدا لازم نعرفها ان الانواع المضروبة كتير فلازم تجيب من واحد يديك ضمان .
بعد كده بييجى فنى تركيب يركبلك الكاميرات بزوايا معينة تكون جايبة المكان كله ثم بعد كده بقى وده الجزء الاهم حوار تشغيل الكاميرات على الموبايل.
طبعا لازم فى البداية تطلب من البائع dvr من غير ستاتيك ip هو اسمه كده بحيث يشتغل على اى نت وبعد مابتوصله النت لل dvr بتقدر تنزل برنامج على الموبايل وتدخل على الكاميرات من اى مكان انت فيه .ارجو انى اكون افدتكم
المفضلات